ވަޒީފާގެ ސިއްރުތައް ހިފަހައްޓަން ހުތުބާގައި ގޮވާލައިފި
މުއައްސަސާގެ މުހިންމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީ އަމާނާތެއް ކަމަށާއި އޮފީހުގެ ސިއްރުތައް މީސްމީޑިއާގެ މަންސަތަކުގައި ފެތުރުމުން ދުރުހެލިވާން މިއަދުގެ ހުކުރު ހުތުބާގައި ގޮވާލައިފި އެވެ.
މަސައްކަތުގެ އަހުލާގުގެ މައްޗަށް އަލިއަޅުވާލައި ހުތުބާގައި ބުނީ މުޖުތަމައުގައި ހިމެނޭ ގިންތިތަކުގެ ތެރެއިން މުވައްޒަފުންނަކީ އެންމެ މަތިވެރި ސުލޫކުން އެންމެ ފުރިހަމައަށް ޒީނަތްތެރިވާން ޖެހޭ މީހުން ކަމަށެވެ. ވަޒީފާގެ މައިދާނުން ރީތި އަހުލާގީ ސިފަތައް ފެންނަން ޖެހޭ ކަމަށެވެ. ކޮންމެ މުވައްޒަފަކީ ކޮންމެ ތަނެއްގައި ހެއްދެވި މަގުސަދުގެ މަތިން ހަނދާންކޮށް، އެ މަގުސަދު ހާސިލުކުރަން މަސައްކަތް ކުރަން ޖެހޭ މީހެއް ކަމަށެވެ.
އިސްލާމީ ޝަރީއަތާ އަދި ވަޟައީ ގާނޫނު ބުނެދޭ މަތިވެރި އަހުލާގުގެ އެންމެ ކުރީގައި ވަނީ އަހުދަށް ރައްކާތެރިވުން ކަމަށާއި ހަވާލުކުރެވޭ ޒިންމާ ފުރިހަމައަށް އަދާކުރުން ކަމަށެވެ. މުވައްޒަފެއްގެ ހައިސިއްޔަތުން އެއްބަސްވެ، ސޮއިކުރި ވަޒީފާ ބަޔާނާ އެއްގޮތަށް އަމަލުކުރުމެވެ. ވަޒީފާގެ މަސްއޫލިއްޔަތަކީ، މުވައްޒަފު ރައްކާތެރިވާން ޖެހޭ ބޮޑު އަމާނާތެއް ކަމަށާއި ވެވޭ އަހުދަކާއި އަގުދެއް ކަމަށެވެ.
ކީރިތި ރަސޫލާ ހަދީސްކުރެއްވި ބަސްފުޅެއްގެ މާނައިގައިވެ އެވެ. "ހަމަކަށަވަރުން ތިޔަބައިމީހުންކުރެ މީހަކު މަސައްކަތެއްކުރާ ނަމަ، އެ ކަމެއް ވީ އެންމެ ފުރިހަމައަށް ކުރުމަށް މާތް ﷲ ލޯބިވެވޮޑިގަންނަވަ އެވެ."
އޮފީހުގެ ވަސީލަތްތަކަކީ އަމާނާތަކަށްވާ ފަދައިން ވަޒީފާއަށް ކަނޑައެޅިފައިވާ ވަގުތަކީ އަމާނާތެެއް ކަމުގައި މިއަދުގެ ހުތުބާގައި ބުންޏެވެ. މުއައްސަސާގެ މުހިންމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީ ވެސް އަމާނާތެއް ކަމަށެވެ. އޮފީހުގެ ސިއްރުތައް މީސްމީޑިއާގެ މަންސަތަކުގައި ފަތުރާއިރު، ފަހުން ހިތާމަކުރަން ޖެހޭނެކަން ފާހަގަކޮށް ހުތުބާގައި ވަނީ އެފަދަ ކަންކަމުން ރައްކާތެރިވާން ގޮވާލާފަ އެވެ.
ވަޒީފާގެ ވެށި ތަހުޒީބު އަމާން ވެށްޓަކަށް ހެދުމަކީ ކޮންމެ މުވައްޒަފެއްގެ ވާޖިބެއް ކަމަށެވެ. މުވައްޒަފުންގެ މެދުގައި އޮންނަން ޖެހޭ އަހުވަންތަ ގުޅުންތަކަށް ބުރޫ އަރާފަދަ އަމަލުތައް ކުރުމާއި އެފަދަ ވާހަކަތައް ފެތުރުމަކީ ވަޒީފާގެ ވެށި ކިލަނބުކޮށް، ތަގައްޔަރުކުރާ ކަމެއް ކަމަށެވެ. އެހެންކަމުން އެފަދަ އަމަލުތަކުން ދުރުވުމަށް ވަނީ އިލްތިމާސްކޮށްފަ އެވެ.
ހުކުރު ހުތުބާގައި ބުނި ގޮތުގައި އިންސާނީ ކަރާމަތާއި ހައްގަކީ ބޮޑުވެގެންވާ އަމާނާތެއް ކަމުގަ އެވެ. ކޮންމެ ވަޒީފާއެއްގައި ވެސް ހައްގުތަކާއި ވާޖިބުތަކެއްވާއިރު، މުވައްޒަފުގެ މައްޗަށް ވާޖިބުތަކެއްވާ ފަދައިން ވަޒީފާ ދޭ ފަރާތުގެ މައްޗަށް ހައްގުތަކެއް ވެސް ވާ ކަމުގަ އެވެ. މުވައްޒަފުގެ ސަލާމަތާއި ރައްކާތެރި ކަމަށް ސަމާލުވެ، ކަނޑައެޅިފައިވާ މުސާރަ އާއި އިނާޔަތްތައް ގަވާއިދުން ދޭން ޖެހޭ ކަމުގަ އެވެ. ވަޒީފާގެ އުސޫލުތަކުގެ ތެރެއިން ދޭން ޖެހޭ ޗުއްޓީ އާއި ހުސްވަގުތުދީ، މުވައްޒަފުންގެ މެދުގައި އަދުލުއިންސާފު ގާއިމުކޮށް، އޯގާތެރިކަމާ އެކު މުއާމަލާތު ކުރަން ޖެހޭނެ ކަމުގަ އެވެ.
އިންސާނާގެ ކަރާމަތާއި އަގު ހިފަހައްޓައިދޭ އަސާސަކީ، މަތިވެރި އަހުލާގު ކަމަށް ހުތުބާގައި ބުންޏެވެ. އިސްލާމީ އުންމަތް އެހެން އުންމަތްތަކާ ތަފާތުވަނީ މަތިވެރި އަހުލާގުގެ ސަބަބުން ކަަމަށެވެ.
އިންސާނާގެ ކިބައިގައި މަތިވެރި އަހުލާގު ނުވާ ނަމަ، އެ މީހަކު ކުރާ އަމަލުތައް ފާސިދުވާނެކަން ބަޔާންކުރައްވާ މާތް ނަބިއްޔާ ހަދީސްކުރެއްވި ބަސްފުޅެއްގެ މާނައިގައިވެ އެވެ. މާނައީ: "ސުރުކާހުތުގެ ސަބަބުން މާމުއި ފާސިދުވާ ފަދައިން ގޯސް އަހުލާގުގެ ސަބަބުން އަމަލުތައް ފާސިދުވެދެ އެވެ."
އާއިލާ އާއި މުޖުތަމައުގެ އުފެއްދުންތެރިކަމާއި ފުދުންތެރިކަން އިތުރުކުރަން ވަޒީފާއަށް ދޭން ޖެހޭ ވަގުތާއި ސަމާލުކަން ފުރިހަމައަށް ދޭން ޖެހޭ ކަމަށެވެ. މުޖުތަމައު އާ އުސްމިންތަކަށް ގެންގޮސް، ނަފްސަށް ހަމަޖެހުމާއި އަރާމު ލިބިދެވޭނީ މަސައްކަތުގައި ތެދުވެރިކަމާއި އަމާނާތް އެކުލެވިފައިވާ މިންވަރަކުންކަން މިއަދުގެ ހުކުރު ހުތުބާގައި ވަނީ ފާހަގަކޮށްފަ އެވެ.
