ސިހުރު މައްސަލަ: އަލިފުއްޓާއި މީދޫގެ 12 ގެއެއް ބަލައިފާސްކޮށްފި
ރ މީދޫ އާއި އެ އަތޮޅު އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ކުރިއަށްގެންދާ އޮޕަރޭޝަންގައި 12 ގެއެއް ބަލައިފާސްކޮށްފި އެވެ.
އިއްޔެ ހެނދުނު ފުލުހުން ފެށި އެ އޮޕަރޭޝަންގެ މައުލޫމާތުގެ ފަހުގެ ތަފްސީލު ހިއްސާކުރަމުން ފުލުހުންގެ މިޑީއާ އޮފިޝަލް "ދެން" އަށް މިއަދު ވިދާޅުވީ ބަލައިފާސްކޮށްފައިވަނީ މީދޫގެ 7 ގެއަކާއި އަލިފުށީގެ 5 ގެއެއް ކަމަށެވެ.
އެ ގެތަކުން ފުލުހުންގެ ބެލުމުގެ ދަށަށް އެއްވެސް އެއްޗެއް ގެންދިޔަކަމެއް ނުބުނެ އެވެ. އޮފިޝަލް ވިދާޅުވީ މިހާތަނަށް މީހަކު ހައްޔަރުކޮށްފައިނުވާ ކަމަށެވެ.
މީދޫއިން "ދެން" އާ ވާހަކަ ދެއްކި ބައެއް މީހުން ބުނީ މީގެ މަހެއްހާ ދުވަސްކުރިން ސިހުރުގެ މައްސަލަތަކެއް ރަށުގައި ފެންމަތިވި ކަމަށެވެ. އެއީ އެ ރަށުގެ ދެމަފިރިއަކު ދުރުކުރަން ސިހުރު ހެދި ކަމަށް ތުހުމަތު ކުރެވޭ މައްސަލައެއް ކަމަށް އެ މީހުން ކިޔައިދިނެވެ.
މީދޫ އާއި އަލިފުށީގައި ސިހުރު ހަދާކަމުގެ ތުހުމަތުގައި ފުލުހުން ގެތަކެއް ބަލައިފާސްކޮށްފައިވާއިރު، މިދިޔަ އަހަރު ފަހުކޮޅު ކެލާގައި ފުލުހުންގެ އޮޕަރޭޝަނެއް ކުރިއަށްގެންގޮސްފައިވެ އެވެ. އެ މައްސަލައާ ގުޅިގެން ބަޔަކު ހައްޔަރު ވެސް ކުރި އެވެ.
