ފްލެޓް ލިސްޓް: މާލޭގައި ދިރިއުޅޭ މުއްދަތަށް މެދުކެނޑުމެއް އައި ކަމަށް ބަލާނީ 1 އަހަރަށް ވުރެ ދިގު ނަމަ
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހުކޮޅު "ގެދޮރުވެރިޔާ" ސްކީމުގެ ދަށުން ހުޅުމާލޭގައި އަޅާ 4000 ފްލެޓް ލިސްޓުގެ ވެރިފިކޭޝަން ޕްރޮސެސް ކުރުމުގެ މަސައްކަތް ފަށައި، މާލޭގައި ދިރިއުޅޭ މުއްދަތަށް މެދުކެނޑުމެއް އައި ކަމަށް ބަލާނީ މެދުކެނޑުނު 1 އަހަރު ދުވަހަށް ވުރެ ދިގު ނަމަ ކަމަށް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މިއަދު ވިދާޅުވެއްޖެ އެވެ.
ފްލެޓް ލިސްޓާ ގުޅޭ އެންމެފަހުގެ މައުލޫމާތު ހާމަކުރުމަށް ރައީސް އޮފީހުގައި ކުރިއަށްދާ ޕްރެސް ބްރީފިންގައި މުއްތޮލިބު ވިދާޅުވީ އޭސީސީން ކުރިއަށް ގެންދިޔަ ފްލެޓު ލިސްޓުގެ ތަހުގީގައި އެންމެ ބޮޑަށް ފާހަގަވި އެއް ކަމަކީ މާލޭގައި މެދުނުކެނޑި ދިރިއުޅެމުންދާ މުއްދަތު ބެލުމުގައި އެއް ހަމައެއް ގެންގުޅެފައިނުވާކަން ކަމަށެވެ.
ވަކިން ހާއްސަކޮށް މެދުނުކެނޑި މާލޭގައި ދިރިއުޅުން މާނަކޮށްފައި ނުވާތީ، އެކި ގޮތް ގޮތުން އިވެލުއޭޓްކުރި ފަރާތްތަކުން އަމަލުކޮށްފައިވާކަން ވެސް ފާހަގަވި ކަމަށް މިނިސްޓަރު ވިދާޅުވި އެވެ.
"ލިސްޓުގެ ވެރިފިކޭޝަން ކުރިއަށް ގެންދާއިރު އަޅުގަނޑުމެން ބަލާފައި ވާނީ މާލޭގައި ދިރިއުޅޭ މުއްދަތަށް މެދުކެނޑުމެއް އައި ކަމަށް ބަލާނީ 1 އަހަރު ދުވަހަށް ވުރެ ދިގު މުއްދަތަކުގެ މެދުކެނޑުމެއް އައުން،" އޭނާ ވިދާޅުވި އެވެ.
އެގޮތަށް ނިންމި މައިގަނޑު ސަބަބަކީ އެ މެދުކެނޑުން ބޯހިޔާވަހިކަމުގެ ސްކީމުގައި މާނަކޮށްފައި ނުވާތީ އާއި 2015 އަހަރުގެ ގެދޮރުވެރިކަމުގެ ޕްރޮގްރާމްގައި މެދުކެނޑުމެއް ކަމަށް ބަލާފައި ވަނީ އެއް އަހަރު ދުވަހުގެ މެދުކެނޑުމެއް ކަމަށް ވާތީ އެވެ.
އަދި އެއީ ކުރިން ކަންކޮށްފައިވާ ގޮތަށް ވަޒީފާއެއް ނެތުމުގެ ސަބަބުން ނުވަތަ އެހެންވެސް ސަަބަބަކާ ހެދި މާލޭގައި އުޅޭ ކަމުގެ ލިޔުން ނެތް މުއްދަތުގެ ސަބަބުން ޝަރުތު ހަމަނުވާ ފަރާތްތައް ލިސްޓުން އުނިވުމުގެ ފުރުސަތު ކުޑަކުރުމަށް ޓަކައި ކަމަށް ވެސް މުއްތޮލިބު ވިދާޅުވި އެވެ.
