ފައިސާ އިތުރުވަންދެން މަޝްރޫއުތައް މަޑުޖައްސަން ނަޝީދު ގޮވާލައްވައިފި
ދިވެހި ދައުލަތުން ކުރިއަށް އޮތް އަހަރުތަކުގައި ބޭރުގެ ގައުމުތަކަށް ބޮޑު ދަރަންޏެއް ދައްކަން ޖެހިފައިވާ ހާލަތުން އަރައިގަނެވޭނީ ފައިސާ ހަރަދު ނުކޮށް ރައްކާކުރުމުގެ ވިސްނުމެއް ގެންގުޅެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މި ވަގުތު ހުންނެވި ޑިމޮކްރެޓްސްގެ ގައުމީ މަޖިލީހުން މި ފަހުން ބޭއްވި ޖަލްސާގައި އޮންލައިންކޮށް ބައިވެރިވެވަޑައިގެން އެމަނިކުފާނު ވިދާޅުވީ ދަރަނި ދައްކަން ޖެހިފައިވާ ހާލަތުގައި އެންމެ ރަނގަޅު ގޮތަކީ މަޝްރޫއުތައް ހިމެނޭހެން ހަރަދުތައް އިތުރު ނުކުރުން ކަމަށެވެ.
"އަޅުގަނޑު މި ދަންނަވާ ވާހަކައަކީ، އެ [ދަރަނިވެރި] ހާލަތުގައި އިހަށް މަޑުކޮށްލާށޭ. އަތަށް ފައިސާކޮޅެއް ލިބި ގިނަވަން ދެން އިހަށް އެއްވެސް ކަމެއް ނުކޮށް މަޑުކޮށްލާށޭ. އަތަށް ފައިސާ އިތުރުވީމައި ދެން އެ ކަމަކައިގެން އަޅުގަނޑުމެން ފަށާށޭ،" ނަޝީދު ވިދާޅުވި އެވެ.
"ދިވެހި ދައުލަތަކު ނެތް އެހާ ވަރަކަށް ފައިސާއެއް. ކޭޝްފްލޯގައި ނެތް. ދަރަނި އިންތިހާއަށް އެބަ އޮތް. އެހެންވީމަ އެހާ ގިނަ ހަރަދު ނުކުރުން، ޕްރޮޖެކްޓްތައް އިތުރު ނުކުރުން. މިހާރު ހުރި ދަރަނި ދެއްކޭތޯ ބެލުން،" ރައްޔިތުންގެ މަޖިލީހުގެ ރައީސް ކަން ވެސް ކުރައްވާފައިވާ ނަޝީދު ވިދާޅުވި އެވެ.
ނަޝީދު ވިދާޅުވީ ރާއްޖޭގެ ރައްޔިތުންނަށް މި ވަގުތުން މި ވަގުތަށް ބޭނުން ޖެހިފައިވާ ވަރަށް ޒަރޫރީ ކަންކަން ވެސް ގިނަ ކަން ގަބޫލު ކުރައްވާ ކަމަށެވެ. ހާއްސަކޮށް ގިނަ އާއިލާތަކަށް އެކަށީގެންވާ ބޯހިޔާވަހިކަން ވެސް ނުލިބޭ ކަން އެމަނިކުފާނު ފާހަގަ ކުރެއްވި އެވެ.
ނަމަވެސް މި ވަގުތު ރައްޔިތުންގެ ތަނަވަސްކަން ވެސް އިތުރުކުރެވެން އޮތީ ދިގު މުއްދަތަކަށް ވިސްނައި ރޭވުންތެރިކަމާ އެކީ މަސައްކަތްކޮށްގެން ކަމަށް، ވާދަވެރި ސިޔާސީ ޕާޓީތަކުގެ ނިޒާމު ރާއްޖެ ތައާރަފުވި ފަހުން އެންމެ ފުރަތަމަ އިންތިހާބުވި ރައީސް ނަޝީދު ވިދާޅުވި އެވެ.
Ads by STO
