ގަވައިދު ހަދާފައި އޮތީ ތައިލެންޑާއި ޔޫއޭއީން އެކަކަށްވެސް އާސަންދަ ނުލިބޭ ގޮތަށް: ޝާހިދު
ތައިލެންޑްއާއި ޔޫއޭއީގެ ހޮސްޕިޓަލުތަކުގެ ތެެރެއިން އާސަންދައިގެ ހިދުމަތަށް އެދުމުގެ ފުރުސަތު ހުޅުވާލި ނަމަވެސް ގަވައިދުގެ ތެރެއިން އެއްވެސް މީހަކަށް އާސަންދަ ލިބިދާނެ ކަމާމެދު އެމްޑީޕީގެ ރައީސް އަބްދުﷲ ޝާހިދު ސުވާލު އުފައްދަވައިފި އެވެ.
ތައިލެންޑާއި ޔޫއޭއީން އާސަންދައިގެ ހިދުމަަތަށް އެދުމުގެ ފުރުސަތު ހުޅުވާލީ އިއްޔެ އެވެ.
މިރޭ އެމްޑީޕީން ކުރިއަށް ގެންދާ ޖަލްސާގައި ޝާހިދު ވިދާޅުވީ އަވައްޓެރި ގައުމުތަކުން އާސަންދައިގެ ހިދުމަތް ނުލާހިކު ލުއި ފަސޭހަކޮށް ލިބެމުން ދަނިކޮށް އެ ގައުމުތަކުން އާސަންދަ ހުއްޓާލުމަށް ފަހު މި ސަރުކާރުން ރައްޔިތުން ސަލާން ޖަހަން ނެރެފައިވާ ކަމަށެވެ.
އެގޮތުން މިއަދު ވެސް ދޮށީ އުމުރުގެ މީހަކާ ބައްދަލުވުމުން ޔޫއޭއީއަށާއި ތައިލެންޑްއިން ހިދުމަތް ހޯދުމަށް ގަވައިދުގައި ހިމަނާފައިވާ ޝަރުތުތަކުގެ ވާހަަކަ ދެންނެވި ކަމަށާއި އޭނާގެ ވާހަކައިން އެ ގައުމަށް ނުދެވޭނެކަން ޔަގީންކަމަށް ޝާހިދު ވިދާޅުވި އެވެ.
"ރައީސުލްޖުމްހޫރިއްވާ ވައުދުވެވަޑައިގެންފައި އޮތީ ދިވެހީން އެތަނަށް ފޮނުއްވާނަމޭ. އެހެންވީމާ މި އޮތީ ގަވައިދު ހަދާފައި. ގަވައިދުގެ ދަށުން ހަމަ ހިލާ އެކަކަށް ވެސް މި ހިދުމަތެއް ލިބޭނެ ގޮތެއް ނެތް." ޝާހިދު ވިދާޅުވި އެވެ.
ތައިލެންޑް އަދި ޔޫއޭއީގެ އާސަންދަ ހިދުމަތް ފޯރުކޮށްދޭ މަރުކަޒުތަކަށް ބަލިމީހުން ރިފަކުރަން ފެށޭއިރު، ފުރަތަމަ އިސްކަން ދިނުމަށް ހަމަޖެހިފައި ވަނީ ކިޑްނީ ޓްރާންސްޕްލާންޓް ކުރުމަށް ބޭނުންވާ ބަލި މީހުންނަށް ކަމަށް އާސަންދައިން ބުނެފައިވެ އެވެ.
އަދި ދެވަނަ އަށް އިސްކަން ދޭނީ ރާއްޖެ، އިންޑިއާ ނުވަތަ ސްރީ ލަންކާގެ މަރުކަޒެއް މެދުވެރިކޮށް، އެތައް ފަހަރެއްގެ މަތިން ފަރުވާ ދެވުނު ނަމަވެސް އެ ފަރާތެއްގެ ބަލި ހާލަތަށް ކުރިއެރުމެއް ނުލިބި، ބަލި ތަހައްމަލު ކުރަމުންދާ ފަރާތްތައް ކަމަށް ވެސް އާސަންދައިން ބުންޏެވެ.
މިރޭގެ ޖަލްސާގައި ޝާހިދު ވަނީ އާސަންދައިގެ ދަށުން ބައެއް ބޭސްތައް ބޮޑެތި ބަލިތައް ތަހައްމަލުކުރާ މީހުންނަށް ވެސް ނުލިބޭކަން ފާހަގަ ކުރައްވައި ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ.
Ads by STO
