މި ދައުރުގެ ތެރޭގައި ތައުލީމާއި ސިއްހީ ދާއިރާ ޑިޖިޓަލައިޒް ކުރާނަން: ރައީސް
ވެރިކަމުގެ މި ދައުރުގެ ތެރޭގައި ތައުލީމާއި ސިއްހީ ދާއިރާ އެއްކޮށް ޑިޖިޓަލައިޒް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ތިން ދުވަހުގެ ރަސްމީ ދަތުރުފުޅެއްގައި ރައީސް އެސްޓޯނިއާއަށް ފުރާވަޑައިގެންނެވީ މިދިޔަ ހޯމަ ވިލޭރެ އެވެ. މިއީ އުތުރު ޔޫރަޕްގައި އޮންނަ އެސްޓޯނިއާއަށް ރާއްޖޭގެ ރައީސަކު ކުރައްވާ ފުރަތަމަ ރަސްމީ ދަތުރުފުޅު ކަމުގައި ރައީސް އޮފީހުން ބުނެފައިވެ އެވެ.
ރައީސްގެ ދަތުރުފުޅުގެ ތެރެއިން އެސްޓޯނިއާގެ ރައީސް ޑރ. އަލާރް ކަރިސް އާއި ގާނޫނު ހަދާ މަޖިލީހުގެ ރައީސް ލޯރީ ހުއްސާރް އަދި އެ ގައުމުގެ އެޑިއުކޭޝަން އެންޑް ރީސާޗް މިނިސްޓަރާއި ކްލައިމެޓް މިނިސްޓަރާއި ހެލްތު މިނިސްޓަރާއި ޖަސްޓިސް އެންޑް ޑިޖިޓަލް އެފެއާޒް މިނިސްޓަރުގެ އިތުރުން ސެކްރެޓަރީ ޖެނެރަލް އޮފް ފޮރިން އެފެއާޒް އާ ބައްދަލުކުރައްވާފައިވެ އެވެ.
އެސްޓޯނިއާގެ ރައީސަށް ލަފާއަރުވާ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ރައުންޑް ޓޭބަލް ބައްދަލުވުމެއްގައި ބައިވެރިވެ ވަޑައިގެންނެވި އެވެ. އޭގެ އިތުރުން އެސްޓޯނިއާގެ ދެ ވަނައަށް އެންމެ ބޮޑު ސިޓީ، ޓާރްޓޫއަށް ޒިޔާރަތްކުރައްވައި ޔުނިވާސިޓީ އޮފް ޓާރްޓޫއަށް ވަޑައިގެންނެވި އެވެ. އެސްޓޯނިއަން ޖީނޯމް ސެންޓަރާއި ގްރީނާޖީ ޑޭޓާ ސެންޓަރަށް ވެސް ރައީސް ވަނީ ޒިޔާރަތް ކުރައްވާފަ އެވެ.
ދަތުރުފުޅު ނިންމަވާލެއްވުމަށްފަހު ފުރާވަޑައިގަތުމުގެ ކުރިން ދައުލަތުގެ މީޑިއާއަށް ދެއްވި އިންޓަވިއުއެއްގައި ރައީސް ވިދާޅުވީ ދުނިޔެއަށް އަންނަ ތަރައްގީތައް ބަލައިގަންނަން ޖެހޭ ކަމަށެވެ. އެކަމުގައި އާޓިފިޝަލް އިންޓެލިޖެންސް (އޭއައި) އަކީ ވަރަށް މުހިންމު ދައުރެއް އަދާކުރާނެ އެއްޗެއް ކަމަށެވެ.
"އޭއައި މާސްޓަ ޕްލޭނެއް ހެދި އަޅުގަނޑުމެންނަށް ގައުމު ތަރައްގީ ކުރުމުގައި އޭއައި މުހިންމު ދައުރެއް އަދާކުރާނެ. އެކަމަށް ޓަކައި ކުރަން ޖެހޭ ހުރިހާ ކަމެއް ވެސް ކުރިއަށް ގެންދެވޭނެ،"
އެސްޓޯނިއާއަށް ކުރެއްވި ދަތުުރުފުޅުގެ ތެރެއިން އެ ގައުމުގައި އޭއައިގެ ބޭނުން ހިފައިގެން ކަންކަން ރޭވިފައިވާ ގޮތާއި ރާވަމުންދާ ގޮތް ތަޖުރިބާ ކުރެއްވުނު ކަމަށެވެ.
އެ ގައުމަކީ ދާއިރާއިން އެންމެ ކުރިއަރާފައިވާ ގައުމުކަން ފާހަގަކުރައްވާ ރައީސް ވިދާޅުވި ގޮތުގައި އެސްޓޯނިއާގެ އެހީތެރިކަން ލިބުމަކީ ޑިޖިޓަލައިޒް ގައުމަކަށް ވުމަށް ރާއްޖެއިން ކުރަމުން އަންނަ މަސައްކަތުގައި ލިބޭނެ ބޮޑު ކުރިއެރުމެއް ކަމުގަ އެވެ.
"މި އަހަރުގެ ތެރޭގައި ހާއްސަ ގޮތެއްގައި ޑިޖިޓަލައިޒް ކުރުމަށް ޓަކައި ސަރުކާރުގެ ހުރިހާ ހިދުމަތްތަކެއް، ޕަބްލިކް ސާވިސް ހުރިހާ ކަމެއް، ތައުލީމީ ދާއިރާ، ސިއްހީ ދާއިރާ، ހަމަ އެއްކޮށް ކުރިއަށް އޮތް ތިން ހަތަރު އަހަރު ތެރޭގައި އަޅުގަނޑުމެން ބޭނުންވާ ގޮތަށް ބަދަލު ކުރާނަން،"
އެ މަސައްކަތުގައި ރައްޔިތުންގެ އެއްބާރުލުން ލިބިވަޑައިގަންނަވާނެ ކަމަށް ޔަގީންކުރައްވާ ކަމުގައި އެމަނިކުފާނު ވިދާޅުވި އެވެ. އެންމެ މުހިންމު ކަމަކީ ރައްޔިތުންނާއި މުވައްޒަފުންގެ އެއްބާރުލުން ކަމުގައި ފާހަގަކުރެއްވި އެވެ.
މި ބަދަލު ގެނެވޭއިރު ހިޔާލު ތަފާތުވުން އުފެދުނު ނަމަވެސް، ބަދަލަކީ އީޖާބީ ބަދަލެއް ކަމަށް ދެކި ބަލައިގަތުމަކީ ކުރެވޭ މަސައްކަތް ކާމިޔާބު ކުރުމަށް މުހިންމު ކަމެއް ކަމުގައި ރައީސް ސިފަކުރެއްވި އެވެ.
"އަޅުގަނޑުމެންގެ ގައުމަކީ ފުލީ ޑިޖިޓަލައިޒް ސާވިސަސްތަކެއް ލިބޭ، ހުރިހާ ޕަބްލިކް ސާވިސްއެއް ސަރުކާރުގެ އަދި ޖުމްލަކޮށް ހުރިހާ ޕަބްލިކް ސާވިސްތަކެއް ޑިޖިޓަލައިޒް ކޮށްދެވޭ ގައުމަކަށް ހެދުން ހާސިލުކުރެވިގެންދާނެ ދިވެހި ހުރިހާ ރައްޔިތުންގެ އެއްބާރުލުމާ އެކީގައި މި ދައުރުގެ ބާކީ އޮތް އަހަރުތަކުގެ ތެރޭގައި،"
އެސްޓޯނިއާގެ ރައީސް އަލާރްގެ ދައުވަތަކަށް ރައީސް ކުރެއްވި ދަތުރުފުޅުގެ ތެރެއިން އެ ގައުމާ އެކު ރާއްޖެއިން ވަނީ ތިން އެމްއޯޔޫއެއްގައި ސޮއިކޮށްފަ އެވެ. އެގޮތުން އިންފޮމޭޝަން ޓެކްނޮލޮޖީ، އާޓިފިޝަލް އިންޓެލިޖެންސް ސްމާޓް ޓެކްނޮލޮޖީސް އާއި ސައިބަ ސެކިއުރިޓީގެ ދާއިރާތަކުން އެއްބާރުލުން ދިނުމާ ބެހޭ އެމްއޯޔޫއެއްގައި ސޮއިކޮށްފައިވެ އެވެ. މޫސުމަށް އަންނަ ބަދަލުތަކާއި ތިމާވެއްޓާއި ހަކަތައިގެ ދާއިރާއިން މައުލޫމާތު ބަދަލުކުރުމަށާއި އެއްބާރުލުން ދިނުމަށާއި އެހީތެރިކަން ފޯރުކޮށްދިނުމުގެ އެމްއޯޔޫއެއްގައި ސޮއިކުރި އެވެ. އޭގެ އިތުރުން އެ ގައުމާ އެކު ސިޔާސީ މަޝްވަރާތައް ކުރުމަށާއި އެއްބާރުލުން އިތުރުކުރަން މަގުފަހިކުރުމާ ބެހޭ އެމްއޯޔޫއެއްގައި ވެސް ސޮއިކޮށްފައިވެ އެވެ.
އެސްޓޯނިއާއަށް ކުރެއްވި ދަތުރުފުޅުގައި ރައީސްގެ އަރިހުގައި ފޮރިން މިނިސްޓަރު ޑރ. އަބްދުﷲ ހަލީލާއި ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން އަދި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގެންނެވި އެވެ. އޭގެ އިތުރުން ރާއްޖޭގެ ޓެކްނޮލޮޖީގެ ދާއިރާގެ މަންދޫބުން ވެސް ބައިވެރިވެވަޑައިގެން ޑިޖިޓަލް ވެށްޓަކަށް އެ ގައުމުން ކުރި ދަތުރާ ބެހޭ މައުލޫމާތު ހޯއްދަވައި، އެ މަސައްކަތްތައް ބައްލަވާލައްވާފައިވެ އެވެ.
