ނާޒިމް ވިދާޅުވާ ގޮތުން އެޕާޓްމެންޓް ސްކޭމްތަކަށް މަގުފަހިވީ ހުޅުމާލޭގެ އިމާރާތްތައް ރަޖިސްޓްރީ ނުކޮށް ހުރުުމުން
ހުޅުމާލޭގައި އެޕާޓްމެންޓްތައް ދޭނެ ކަމަށް ބުނެ އޮޅުވާލައިގެން ފައިސާ ނަގާ މައްސަލަ (އެޕާޓްމެންޓް ސްކޭމް) ތަކަށް މަގުފަހިވީ، އެއްމެދު އިމާރާތުގެ ގާނޫނުގައި ހިމެނޭ ސްޓްރާޓާ ސްކީމުގެ ދަށުން އެ ތަންތަން ރަޖިސްޓްރީކޮށްފައިނުކޮށް ހުރުމުން ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
ގައުމީ ސަލާމަތާ ބެހޭ ކޮމިޓީ (241) ގައި އިންނަވާ ނާޒިމް "ދެން" އަށް ވިދާޅުވީ ސްޓްރާޓާ ސްކީމުގެ ދަށުން ހުޅުމާލޭގައި ހިންގާ އިމާރާތްތައް ރަޖިސްޓްރީކުރަން ހައުސިން މިނިސްޓްރީން އޮތީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް އަންގާފައި ކަމަށެވެ.
އެކަމަކު އެޗްޑީސީން އޮތީ އެކަން ނުކޮށް ކަމަށް އޭނާ ވިދާޅުވި އެވެ. ނާޒިމް ވިދާޅުވީ އެކަން އެހެން ނުވެއޮތުމުން އެ މައްސަލަ ހައްލުކުރެވޭނެ ގޮތްތައް 241 ކޮމިޓީން ބަލަން ފަށާފައިވާ ކަމަށެވެ. ނާޒިމް ވިދާޅުވި ގޮތުގައި އެހެން އެކަން ނުވެ އޮތުމަކީ ގައުމީ ސަލަމަތަށް އޮތް ނުރައްކަލެއް ކަމަށެވެ.
"ސްކޭމްތަކަށާއި ހުރިހާ ކަމަކަށް މަގުފަހިވެގެން މިދިޔައީ އެކަމުގެ ސަބަބުން، ކާކު އޯންކުރަނީ ކޯއްޗެއްކަން ނޭނގެ، ޕަބްލިކަލީ އެނގޭނެ އެއްޗެއް ނެތެއް ނުން.. އެ މައްސަލަ ހައްލުކުރަން މިއުޅެނީ, މިހާރު އަސްލު ހުޅުމާލޭގައި ނޭނގޭނެ ނެއިބާ އަކީ ކާކު ކަމެއް އޯނަރަކީ ކާކު ކަމެއްވެސް ނޭނގެ. އެކަންތައް (ރަޖިސްޓްރީ) ކުރަން އެޗްޑީސީއަށް އެންގީމަ އެކަން ނުކޮށް އޮތީ" ނާޒިމް ވިދާޅުވި އެވެ.
އެއްމެދު އިމާރާތްތައް މެނޭޖުކުރުމަށް ހާއްސަ "ސްޓްރާޓާ ޕޯޓަލް" ލޯންޗުކުރީ ޖެނުއަރީ 24، 2024 ގަ އެވެ.
ސްޓްރާޓާ ސްކީމަކީ އިމާރާތެއް ނުވަތަ އިމާރާތްތަކެއްގައި ހިމެނޭ ޔުނިޓްތައް ވަކިވަކި ފަރުދުންނަށް މިލްކުކުރެވޭ ގޮތަށް ހަދާފައިވުމެވެ. އެ އިމާރާތް ނުވަތަ އިމާރާތްތަކުގައި ހިމެނޭ އާންމު ތަންތަން ހުރިހާ ޔުނިޓްތަކުގެ މިލްކުވެރި ފަރާތްތަކުގެ މެދުގައި ހިއްސާވެ އެތަންތަން ހިންގައި ބެލެހެއްޓުން ހިމެނެ އެވެ.
Ads by STO
