3،000 އަށް ވުރެ ގިނަ މެމްބަރުން ޕީއެންސީއަށް 'ވަގަށް' ވައްދާފައިވާ ކަމުގެ ޝަކުވާ ލިބިފައިވޭ: އެމްޑީޕީ
ސައްހަ ނޫން ފޯމު ހުށަހަޅައިގެން ވެރިކަން ކުރާ ޕާޓީ، ޕީޕަލްސް ނޭޝަނަލް ކޮންގްރެސްއަށް އެ ޕާޓީގެ 3،000 އަށް ވުރެ ގިނަ މެމްބަރުން ވައްދާފައިވާ ކަމުގެ ޝަކުވާ މިހާތަނަށް ލިބިފައިވާ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
އެމްޑީޕީން މިދިޔަ ބުރާސްފަތި ދުވަހު ބުނީ ރައްޔިތުންގެ ޒާތީ މައުލޫމާތުން ވައްކަންކޮށް، ވަގު ފޯމް ފުރައިގެން ކޮންގްރެސް ޕާޓީއަށް ވެއްދި މައްސަލައިގެ ޖިނާއީ ކުށްތައް ތަހުގީގު ކުރުމަށް ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހަޅާފައިވާ ކަމަށެވެ. އަދި މައްސަލަތައް ތަހުގީގު ކުރުމަށް އެ ދެ އިދާރާގެ މައްޗަށް އަމުރުކޮށްދެއްވުމަށް ޕްރޮސެކިއުޓަ ޖެނެރަލްގެ ކިބައިން ވެސް އެދިފައިވާ ކަމަށެވެ.
އޭގެ އިތުރުން ކޮންގްރެސް ޕާޓީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި ޕްރޮސެސްކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން ކަށަވަރު ކުރުމަށް އިލެކްޝަންސް ކޮމިޝަން (އީސީ) އަށް ސިޓީ އެއް ފޮނުވާފައިވާ ކަމަށް ވެސް އެމްޑީޕީން ބުނެފައިވެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ގާނޫނީ ކޮމިޓީގެ މެމްބަރު އިބްރާހިމް ޝިޔާމް ވިދާޅުވީ މައްސަލަ އާ ގުޅިގެން މިހާތަނަށް 3،000 އަށް ވުރެ ގިނަ މީހުންގެ ޝަކުވާ ލިބިފައިވާ ކަމަށެވެ.
"ޝަކުވާތަކުގެ މައްޗަށް ބަލާލައިފި ކަމަށްވާ ނަމަ، އެބަހުރި ކުރީގެ އައިޑީކާޑުގައި ހުރި ފޮޓޯ ބޭނުންކޮށްފައި. ފޯޖް ސައިން ބޭނުން ކޮށްފައި. ފިންގަޕްރިންޓް ފޯޖް ކޮށްފައި އެބަހުރި ކަމަށް ތުހުމަތު އެބަކުރޭ އެ ޕާޓީ މެމްބާޝިޕް ކަމަށް ފޯމު ހުށަހެޅި ކަމަށް ބުނާ ފަރާތުން،" ޝިޔާމް ވިދާޅުވި އެވެ.
އޭނާ ތުހުމަތު ކުރެއްވި ގޮތުގައި ސައްހަ ނޫން ފޯމުތައް ފުރުމުގައި ސަރުކާރުގެ ހިއްސާވާ ކަމުގަ އެވެ. ސަބަބެއް ކަމުގައި ފާހަގަކުރީ އާންމު މަސްލަހަތާ ގުޅިފައިވާ މިފަދަ ބޮޑު ކަމެއްގައި ޝަކުވާތަކެއް އުފެދިފައިވާއިރު، އެކަން ބެލުމަށް ޕީޖީގެ ފަރާތުން މިހާތަނަށް އަމުރުކޮށްފައި ނުވުމެވެ.
އެމްޑީޕީގެ ލީގަލް ޑިރެކްޓަރު މަހްފޫޒް ސައީދު ވިދާޅުވި ގޮތުގައި އެ ޝަކުވާތަކުގެ ތެރެއިން 68 މައްސަލައެއް ފުލުހުންނަށް ހުށަހަޅާފައިވާ ކަމުގަ އެވެ. އޭގެ ތެރެއިން އެންމެ މައްސަލައެއްގެ ތަހުގީގު ކުރިއަށް ގެންދިޔަ ނަމަވެސް، މުޅި ހަރަކާތް ހިންގާފައިވާ ގޮތް ނިއުޅިގެންދާނެ ކަމުގަ އެވެ.
ކަމަކީ ޒާތީ މައުލޫމާތުން ވައްކަން ކުރުމުގެ މައްސަލައެއްކަން ފާހަގަކުރައްވާ މަހްފޫޒް ވިދާޅުވީ ކޮންމެ މީހެއްގެ ވެސް ޒާތީ ދިރިއުޅުން ރައްކާތެރިކުރުމަކީ ގާނޫނު އަސާސީން ކަށަވަރުކޮށްދޭ އަސާސީ ހައްގެއް ކަމަށެވެ.
"އަރައިގަނެވުނީ އަސާސީ ހައްގަކަށް. އެއާ އެކު ބައިވަރު ޖިނާއީ ކުށްތަކެއް ހިނގައިން މި ދިޔައީ. އެހެންވީމާ މި މައްސަލަތައް ތަހުގީގުކޮށްދިނުމަށް އަޅުގަނޑުމެން އެކި އިދާރާތަކުގައި މި އެދުނީ،" މަހްފޫޒް ވިދާޅުވި އެވެ.
ފުލުހުންނަށް ހުށަހެޅި މައްސަލައިގައި ތަހުގީގުކޮށްދިނުމަށް އެމްޑީޕީން އެދުނު އެއްފަރާތަކީ ވިލިމާލޭ ދާއިރާގެ ކޮންގްރެސް ޕާޓީގެ މެމްބަރު މުހައްމަދު އިސްމާއީލެވެ. އޭނާ ހެއްކެއްގެ ގޮތުގައި ސޮއިކުރެއްވި ކޮންމެ ފޯމެއްގެ މައްސަލަ ވަކިވަކިން ބަލައިދިނުމަށް އެދިފައިވާނެ ކަމުގައި މަހްފޫޒް ވިދާޅުވި އެވެ.
އޭނާގެ އިތުރުން ފޯމުތަކުގައި ހެކިންގެ ގޮތުގައި ސޮއިކުރި އެހެން މީހުންނާއި ކަމުގައި ޝާމިލުވި ޑީއެންއާރުގެ އިސް މުވައްޒަފުންގެ އިތުރުން ޖުމްލަ ގޮތެއްގައި ކަމުގައި ބައިވެރިވި އެންމެނަށް ތަހުގީގު އަމާޒުކޮށްދިނުމަށް ވެސް އެމްޑީޕީން ވަނީ ފުލުހުންގެ ކިބައިން އެދިފަ އެވެ.
މައްސަލައިގެ ތަހުގީގު ނިމެންދެން ހޯމްލޭންޑް މިނިސްޓަރު އަލީ އިހްސާން މަގާމުން އެކަހެރިކުރަން ވަނީ ގޮވާލާފަ އެވެ. އަދި މުޅި މައްސަލައިގެ ތަހުގީގު ފުރިހަމަ ކުރެވެންދެން އިލެކްޝަންސް ކޮމިޝަން (އީސީ) އަށް ކޮންގްރެސް ޕާޓީން މިހާރު ހުށަހަޅާފައިވާ އެއްވެސް ފޯމެއް ޕްރޮސެސްނުކޮށް މަޑުޖައްސާލުމަށް އެ ކޮމިޝަނުގެ ކިބައިން އެދިފައިވެ އެވެ.
އަދި މި މަހުގެ 31 ވަނަ ދުވަހުގެ ފަހުން ސިޔާސީ ޕާޓީތަކުން ހުށަހަޅާ ފޯމުތައް އީސީން ޕްރޮސެސްކުރުން ވަގުތީ ގޮތުން މެދުކަނޑާލަން ނިންމާފައިވާ ނިންމުން އަނބުރާ ގެންދަން ޖެހޭ ކަމަށް ބުންޏެވެ. ޕާޓީތަކަށް ވަނުމުގެ ހައްގު ނުހިފެހެއްޓޭނެ ކަމަށާއި ކަމާ ގުޅިގެން އެ ފިޔަވަޅު އަޅަން ޖެހޭނީ ކޮންގްރެސް ޕާޓީއަށް އެކަނިކަން ފާހަގަކުރި އެވެ. އެ އާއެކު އެ ޕާޓީން ހުށަހަޅާފައިވާ ފޯމުތައް އިތުރަށް ބަލައި، ނިޒާމު އިތުރަށް ހަރުދަނާ ކުރަން ވެސް އެމްޑީޕީން ވަނީ ގޮވާލާފަ އެވެ.
