ހަތަރު މިނިސްޓަރުންނަށް އަލުން ރުހުން ދީފި
ނިމިދިޔަ މަހު ކެބިނެޓަށް ގެނައި ބަދަލުތަކާ އެކު މަގާމުތަކަށް އަލަށް އައްޔަންކުރެއްވި ހަތަރު މިނިސްޓަރުން ރުހުން ދީފި އެވެ.
ކެބިނެޓަށް ބަދަލުތަކެއް ގެންނަވައި، ބައެއް މިނިސްޓްރީތަކުގެ ނަން ބަދަލުކުރައްވާފައި ވަނީ ޑިސެމްބަރު މަހުގެ 26 ވަނަ ދުވަހު އެވެ. އެ ދުވަހު ހަތަރު މިނިސްޓްރީއަކަށް މިނިސްޓަރުން އައްޔަންކުރެއްވި އެވެ. އަދި ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އުވާލައްވައި، އެ މިނިސްޓްރީގެ މަސައްކަތްތައް ފިނޭންސް އެންޑް ޕްލޭނިން މިނިސްޓްރީއަށާއި ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީއަށް ބަދަލުކުރެއްވި އެވެ.
ދައުރުން ބޭރުން މިދިޔަ ބުރާސްފަތި ދުވަހު ބޭއްވި މަޖިލިހުގެ ޖަލްސާއަށް ހުށަހެޅި މައްސަލައިގައި ރައީސް ޑރ. މުހައްމަދު މުއިއްޒު މަޖިލިހަށް ފޮނުއްވި ސިޓީފުޅު އިދާރީ މޭޒުން ވަނީ ތަޅުމަށް އިއްވާފަ އެވެ. އެ ސިޓީފުޅުގައި ވަނީ ކެބިނެޓަށް އަލަށް އައްޔަންކުރެއްވި 4 ބޭފުޅުންނަށް ރުހުން ހޯދުމަށް މަޖިލިހަށް ހުށަހަޅާ ކަމަށެވެ.
ރުހުން ހޯދަން މަޖިލިހަށް ފޮނުއްވީ:
- ފިނޭންސް އެންޑް ޕްލޭނިން މިނިސްޓަރަކަށް ތ. ބުރުނި، ނިވައިދޮށުގެ، މޫސާ ޒަމީރު
- ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓަރަކަށް މއ. ވެނީލާ، ޑރ. އަލީ ހައިދަރު އަހްމަދު
- އެގްރިކަލްޗަ އެންޑް އެނިމަލް ވެލްފެއަ މިނިސްޓަރަކަށް މއ. މާރާދަގެ، ޑރ. މަރްޔަމް މާރިޔާ
- ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރަކަށް ގދ. ފިޔޯރީ، ގުލްބަކާގެ، ޑރ. އަބްދުﷲ މުއްތޮލިބް
އެ މައްސަލަ ދިރާސާ ކުރުމަށް މަޖިލިހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް އެ ދުވަހު ފޮނުވި އެވެ.
މިއަދު ބޭއްވި ޖަލްސާގައި ވަނީ ކޮމިޓީން ނިންމި ގޮތުގެ ރިޕޯޓު އިއްވާފަ އެވެ. ކޮމިޓީން ނިންމި ގޮތުގެ ރިޕޯޓު ތަޅުމަށް އިއްވައިދެއްވީ އެ ކޮމިޓީގެ މުގައްރިރު ވިލިމާލެ ދާއިރާގެ ކޮންގްރެސް ޕާޓީ މެމްބަރު މުހައްމަދު އިސްމާއީލެވެ. ރިޕޯޓުގައި ބުނީ ހަތަރު މެމްބަރުންނަށް ރުހުން ދޭން ފެންނަ ކަމަށް ފާސްކޮށްފައި ވަނީ ކޮމިޓީ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ކަމަށެވެ.
ފިނޭންސް މިނިސްޓަރަކަށް ޒަމީރު އައްޔަންކުރަން ރުހުންދީފައި ވަނީ ވޯޓުގައި ބައިވެރިވެވަޑައިގެންނެވި 69 މެމްބަރުންގެ އިއްތިފާގުންނެވެ.
ހަޔާ އެޑިޔުކޭޝަން މިނިސްޓަރު ކަމަށް ހައިދަރު އައްޔަންކުރަން ފެންނަ ކަމަށް ވޯޓު ދެއްވީ 63 މެމްބަރުންނެވެ. ނުފެންނަ ކަމަށް 6 މެމްބަރަކު ވޯޓު ދެއްވި އެވެ.
އެގްރިކަލްޗަ މިނިސްޓަރުގެ މަގާމަށް މާރިޔާ އަދި ކޮންސްޓްރަކްޝަން މިނިސްޓަރަކަށް މުއްތޮލިބް އައްޔަންކުރަން ފެންނަ ކަމަށް ފާސްކޮށްފައި ވަނީ ވޯޓުގައި ބައިވެރިވެވަޑައިގެންނެވި 70 މެމްބަރުންގެ އިއްތިފާގުންނެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އެއްކޮށްލައި އުފެއްދި އާ މިނިސްޓްރީގެ ހިންގުން ހަވާލުކުރެއްވި މުއްތޮލިބު ކުރިން ހުންނެވީ ކޮންސްޓްރަކްޝަން މިނިސްޓަރަަކަށެވެ. އަދި އެ ބަދަލާ އެކު ހައުސިން މިނިސްޓަރަކަށް ހުންނެވި ހައިދަރު އާ ހަވާލުކުރެއްވީ ހަޔާ އެޑިއުކޭޝަން މިނިސްޓްރީ އެވެ.
އެގްރިކަލްޗާ މިނިސްޓަރަކަށް ހުންނެވި ޑރ. އައިޝަތު ރަމީލާ އިސްތިއުފާ ދެއްވުމާ ގުޅިގެން އެ މިނިސްޓްރީ ވަގުތީ ގޮތުން ހިންގެވުމާ ހަވާލުވެވަޑައިގެން ހުންނެވީ، އެ މިނިސްޓްރީއަށް އައްޔަންކުރެއްވި މާރިޔާ އެވެ. އެކަމަނާ ކުރިން ހުންނެވީ ހަޔާ އެޑިޔުކޭޝަން މިނިސްޓަރަކަށެވެ.
