ރާއްޖޭގެ މޫސުމީ ހާލަތު ބެއްލެވުމަށް ނަޝީދުގެ ދައުވަތެއް ޓްރަމްޕަށް
ޕެރިސް އެގްރިމެންޓުން އެމެރިކާ ވަކިވުމަށް ނިންމުމުން ހިތާމަ ފާޅުކުރައްވައި، މޫސުމީ ބަދަލުތަކުން ރާއްޖެއަށް ކުރަމުން އަންނަ ނޭދެވޭ އަސަރުތައް ބައްލަވައިލެއްވުމަށް ވަޑައިގަންނަވަން އެ ގައުމުގެ އާ ރައީސް ޑޮނަލްޑް ޓްރަމްޕަށް، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލް އަދި ކުރީގެ ރައީސް މުހައްމަދު ނަޝީދު ދައުވަތު ދެއްވައިފި އެވެ.
ފްރާންސްގެ ވެރި ރަށް، ޕެރިހުގައި 2015 ވަނަ އަހަރު ގައުމުތަކުން އެއްބަސްވެފައި ވަނީ ދުނިޔޭގެ ހޫނުމިން މަތިވުން ކޮންޓްރޯލް ކުރުމަށް ޖައްވަށް ދޫކުރާ ވިހަ ގޭސްތަކުގެ މިންވަރު މަދުކުރުމަށެވެ.
ޓްރަމްޕުގެ ފުރަތަމަ ވެރިކަމުގައި ވެސް ޕެރިސް އެގްރިމެންޓުން އެމެރިކާ ވަކިވި އެވެ. އެމަނިކުފާނު ވިދާޅުވެފައިވާ ގޮތުގައި އެ އެގްރިމެންޓް އެކުލަވާލާފައި ވަނީ އެމެރިކާގެ އިގުތިސޯދު ހީނަރުވާ ގޮތަށް ކަމުގަ އެވެ. ޓްރަމްޕަށް ފަހު ވެރިކަމަށް ވަޑައިގެންނެވި ރައީސް ޖޯ ބައިޑެންގެ ސަރުކާރުން ވަނީ އެ ނިންމުން ބާތިލުކޮށް، 2021 ވަނަ އަހަރު އެގްރިމެންޓުގައި އަލުން ބައިވެރިވެފަ އެވެ.
އެހެންނަމަވެސް، ދެ ވަނަ ފަހަރަށް ވެރިކަމާ ހަވާލުވެވަޑައިގެންނެވުމަށް ފަހު ޓްރަމްޕް ނިންމެވި ނިންމުންތަކުގެ ތެރޭގައި ޕެރިސް އެގްރިމެންޓުން އަނެއްކާވެސް ވަކިވުން ހިމެނެ އެވެ.
ސީވީއެފުން ނެރުނު ބަޔާނުގައި ނަޝީދު ވަނީ އެމެރިކާގެ އާ ސަރުކާރާ އެކު މަސައްކަތް ކުރުމުގެ ފުރުސަތު ލިބިވަޑައިގަތުމުން އެކަމާ އުފާކުރައްވާ ކަމަށް ވިދާޅުވެފަ އެވެ. ނަމަވެސް އެ ގައުމުން ޕެރިސް އެގްރިމެންޓުން ވަކިވުމަށް ނިންމުމުން އެކަމާ ވަނީ ހިތާމަ ފާޅުކުރައްވާފަ އެވެ.
ޕެރިސް އެގްރިމެންޓަކީ ބޮޑެތި ގައުމުތަކުން ތިމާވެއްޓަށް ދެމުން އަންނަ ގެއްލުންތައް ކުޑަކުރުމަށް އެކަށައަޅާފައިވާ އެގްރިމެންޓެއް ފާހަގަކުރައްވާ ނަޝީދު ވިދާޅުވީ އެއީ މޫސުމީ ބަދަލުތަކުގެ ނޭދެވޭ އަސަރުކުރާ އަދި ތަރައްގީވަމުން އަންނަ ކުދި ގައުމުތަކަށް ލިބިފައިވާ އުންމީދެއް ކަމަށެވެ.
މޫސުމަށް އަންނަ ބަދަލުތަކާ ގުޅިގެން އެންމެ ނާޒުކު ގައުމުތަކުގެ މުސްތަގުބަލު ބަނަވަމުންދާއިރު، އެމެރިކާ ފަދަ ބޮޑެތި ގައުމުތަކުން އިސްނަގައިގެން މަސައްކަތް ކުރުމުގައި ނަމޫނާ ދައްކަންވީ ވަގުތަކީ މިއީ ކަމުގައި ފާހަގަކުރެއްވި އެވެ.
"އަޅުގަނޑު، ރައީސް ޓްރަމްޕަށް ދައުވަތު އަރުވަން އަޅުގަނޑުގެ އުފަން ގައުމު ރާއްޖެ ހިމެނޭހެން، އަޅުގަނޑުމެންނަށް ކުރިމަތިވެފައިވާ ބައެއް ގޮންޖެހުންތައް ބައްލަވައިލެއްވުމަށް،" ނަޝީދު ވިދާޅުވި އެވެ.
ނަޝީދު ވަނީ އުދައެރުމާއި ހޫނުގަދަވުމުން "ގްލޭސިއާސް" ތައް ވިރުމާ އަދި ދަނޑުބިންތައް ފަނާވެފައިވާ މަންޒަރުތައް ގާތުން ބައްލަވައިލައްވަން ޓްރަމްޕަށް ދައުވަތު ދެއްވާފަ އެވެ.
މޫސުމީ ބަދަލުތަކާ ދެކޮޅަށް ކުރަމުން އަންނަ މަސައްކަތުގައި ގައުމުތަކުން އެކުގައި އެއް އަމާޒަކަށް މަސައްކަތް ކުރަން ޖެހޭކަން ބަޔާނުގައި ނަޝީދު ވަނީ ފާހަގަކުރައްވާފަ އެވެ.
ދެވަނަ ވިސްނުމަކަށް ވަޑައިގެން، އެމެރިކާއިން ޕެރިސް އެގްރިމެންޓުގައި އަލުން ބައިވެރިވާނެ ކަމަށް އުންމީދުކުރައްވާ ކަމަށް ވެސް ނަޝީދު ވިދާޅުވެފައިވެ އެވެ.
