މަޑުއްވަރިއާއި މީދޫގެ އިހުތިސާސްގެ ތެރޭގައި ފަޅު ރަށެއް ހަމަޖައްސައިދެނީ
ރ. މަޑުއްވަރިއާއި އެ އަތޮޅުގެ މީދޫގެ އިހުތިސާސްގެ ތެރޭގައި ފަޅު ރަށެއް ހަމަޖައްސައިދޭން ނިންމައިފި އެވެ.
އެކަން އިއުލާންކުރެއްވީ ރައީސް ޑރ. މުހައްމަދު މުއިއްޒު މަޑުއްވަރިއަށް މިއަދު ކުރެއްވި ޒިޔާރަތުގައި އެ ރަށުގެ ރައްޔިތުންނާ ވާހަކަ ދައްކަވަމުންނެވެ.
ރައީސްގެ ވާހަކަފުޅުގައި ވަނީ މަޑުއްވަރިއަށް ދިމާވެފައިވާ ޖާގައިގެ ދަތިކަމަށް ގެނެވިދާނެ ހައްލުތަކުގެ މައްޗަށް އަލިއަޅުއްވާފަ އެވެ.
އަދި އެ ރަށުގެ ބިން ފުރިފައިވާކަމާއި، ފަޅުގައިވެސް ޖާގަ ނެތުމުން ހިއްކޭނީވެސް ނިސްބަތުން ކުޑަ ސަރަހައްދެއްކަން އެމަނިކުފާނު ފާހަގަ ކުރެއްވި އެވެ.
އެހެންނަމަވެސް، މަޑުއްވަރީގެ ބިން ހިއްކުމުގެ މަޝްރޫއު މި އަހަރުގެ ބަޖެޓުގައި ހިމަނައި، ކަމާ ގުޅޭ ވުޒާރާތަކާއި ކައުންސިލުން މަޝްވަރާކުރެއްވުމަށްފަހު މި އަހަރު އަމަލީ މަސައްކަތް ފައްޓަވާނޭކަމުގެ ޔަގީންކަން ރައީސް މިއަދު ދެއްވި އެވެ.
އަދި ކުރިން މަޑުއްވަރީގައި ހަދާފައިވާ ބަނދަރު ބެކްފިލްނުކޮށް ހުރުމުން ދިމާވާ މައްސަލަ އާއި، ގިރާ ސަރަހައްދު ހިމާޔަތް ނުކޮށް އޮތް މައްސަލަ އާއި، ބަނދަރުގެ ބޭރު ތޮށި ވެހިކަލަށް ވަދެވޭ ގޮތަށް ހަދާފައި ނެތް މައްސަލައަށް ހައްލު ހޯދައިދެއްވާނޭކަމަށް ވެސް ވިދާޅުވި އެވެ.
އެހެންނަމަވެސް ރަށަށް އެންމެ ހައެއްކަ ހެކްޓަރު އިތުރުކޮށްގެން ބިމުގެ މައްސަލައަށް ހައްލެއް ނޯންނާނޭކަން ފާާހަގަކުރައްވައި ރައީސް ވިދާޅުުވީ ރަށުގައި އިގުތިސާދީ މަސައްކަތްތައްކުރާ ތަންތަން ރަށުން ބޭރަށް ބަދަލުކުރުމަކީ، އާންމު ސިއްހަތަށްވެސް އޮތް އެންމެ ރަނގަޅު ހައްލު ކަމަށެވެެ.
އެގޮތުން، ރ. މަޑުއްވަރީގެ އިހުތިސާސްގައި އުފުލަންދޫ، އަދި ރ. މީދޫގެ އިހުތިސާސް ތާވަތާ ހިމެނުއްވުމަށް ނިންމަވާފައިވާކަން ރައީސް އިއުލާންކުރެއްވި އެވެ. އަދި އެކަމާ ގުޅޭ ގާނޫނީ ލިޔެކިޔުމުގެ ކަންކަން ހަމަޖެހުމުން މީހުން ދިރިއުޅޭ ސަރަހައްދެއްގައި ހުންނަން ނުޖެހޭ ހުރިހާ ތަނެއް އެރަށްތަކަށް ބަދަލުކުރެއްވުމަށް ރައީސް އިލްތިމާސް ކުރެއްވި އެވެ.
