ކޮންމެ އަތޮޅެއްގައި ޕަބްލިކް ވޯކްސްގެ ޔުނިޓެއް ގާއިމުކުރާނަން: ރައީސް
ރާއްޖޭގެ ކޮންމެ އަތޮޅެއްގައި ޕަބްލިކް ވޯކްސްގެ ޔުނިޓެއް ގާއިމުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރ. އަތޮޅު މާކުރަތުގެ ރައްޔިތުންނާ ބައްދަލުކުރައްވައި ރައީސް މިއަދު ވިދާޅުވީ ވަރަށް ގިނަ އިންފްރާސްޓްރަކްޗާގެ މަޝްރޫއުތައް ހިންގަނީ ވަރަށް ގިނަަ ހަރަދުތަކެއް ކޮށްގެން ކަމަށެވެ.
އެހެންވެ އެ ތަންތަން ބެލެެހެއްޓުމުގެ މުހިންމުކަން ފާހަގަކުރައްވައި ރައީސް ވިދާޅުވީ އެކަމުގައި ޕަބްލިކް ވޯކްސްގެ މަސައްކަތްތައް ކުރާ ފަރާތްތައް ވަރަށް މުހިންމު ދައުރެއް އަދާކުރާ ކަމަށެވެ.
އަދި ރ އަތޮޅުގައި ޕަބްލިކް ވަރކްސްގެ ހިދުމަތް ދޭ މަރުކަޒު ގާއިމުކުރާނީ މާކުރަތުގައިކަމަށް އެމަނިކުފާނު ވިދާޅުވި އެވެ.
"އަދި ހަމަ އެގޮތަށް ކޮންމެ އަތޮޅެއްގައި މި އަހަރު ޕަބްލިކް ވޯކްސް ޔުނިޓްގެ ސައިޓެއް ހެދިގެން ދާނެ. ހުރިހާ މެޝިނަރީޒް ހުރިހާ ތަކެތި ހަމަ ކުރެވިފައި ހުންނަ. ހަމަ އެއާއެކި ހުރިހާ ތަކެއްޗާއެކު ބަދަލުކޮށްގެން ގެންގުޅެވޭ މޮބައިލް ދެ ޔުނިޓް ވެސް ގަތުމަށް ހަމަޖެއްސުމަށް އޮތީ އަޅުގަނޑުމެން ކަނޑައަޅައިފައި" ރައީސް ވިދާޅުވި އެވެ.
ރައީސް ވިދާޅުވީ މިއީ އެއްވެސް ޙާލެއްގައި ބޭކާރުވެގެންދާ ހަރަދެއް ނޫން ކަމަށެވެ. އަދި ދުރު ރާސްތާއަށް ބަލާއިރު އުމްރާނީ ގޮތުން ރަށްރަށަށް ގެނެވޭ ތަރައްގީ ބެލެހެއްޓުމަށް ޕަބްލިކް ވަރކްސް ޔުނިޓެއް ހުރުމަކީ، އެތައް ހަރަދެއް ސަލާމަތް ކުރެވޭނެ ކަމެއް ކަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ އެކަމަށް ކަމާ ބެހޭ ވުޒާރާއާ އަޅުގަނޑު އެކަން ހަވާލުކޮށްފައި އެ އޮތީ. އެކަން އިރާދަ ކުރެއްވިއްތާ މި ދެންނެވި ގޮތަށް ރާއްޖޭގައި ކުރިއަށް ދާނެ" ރައީސް ވިދާޅުވި އެވެ.
Ads by STO
