Tuesday, 17 November 2026
Advertisement
Allied Insurance (leaderboard)
ސަރުކާރު

ސަރުކާރުން ބުނަނީ މީޑިއާ އާއި އިންޓަނެޓް ރެގިއުލޭޓްކުރަން މަސައްކަތް ނުކުރާ ކަމަށް

ސަރުކާރުން ބުނަނީ މީޑިއާ އާއި އިންޓަނެޓް ރެގިއުލޭޓްކުރަން މަސައްކަތް ނުކުރާ ކަމަށް
ނޫސްވެރިކަމާއި އިންޓަނެޓް ރެގިއުލޭޓް ކުރުމާ ގުޅޭ ބިލެއް ރައްޔިތުންގެ މަޖިލިހަށް ތައާރަފުކުރުމުގެ ވިސްނުން ނުގެންގުޅޭ ކަމަށް ސަރުކާރުން ހާމަކޮށްފި އެވެ. އެކަން ހާމަކޮށްފައި ވަނީ ރަައީސް އޮފީހުގެ ތަރުޖަމާނު ހީނާ ވަލީދު "އެކްސް" ގައި ކުރެއްވި ޕޯސްޓެއްގަ އެވެ. ހީނާ ވިދާޅުވީ ނޫސްވެރިކަމާއި އިންޓަނެޓް ރެގިއުލޭޓް ކުރާ ބިލެއް ތައާރަފުކުރަން ސަރުކާރުން އެެއްވެސް މަސައްކަތެއް ނުކުރާ ކަމަށެވެ.
"ސަރުކާރުގެ ލެޖިސްލޭޓިވް އެޖެންޑާގައި ވެސް އެފަދަ ބިލެއް ހިމެނިފައި ނުވާނެ. ކުރިއަށް އޮތްތަނުގައި ވެސް އެފަދަ ބިލެއް ތައާރަފު ކުރުމުގެ ވިސްނުމެއް ނެތް،" ހީނާ ވިދާޅުވި އެވެ.
މީގެކުރިން ވެސް ހާމަކޮށްފައިވާ ގޮތަށް މީޑިއާތައް ޑީރެގިއުލޭޓް ކުރުމާ އެކު، ސެލްފް ރެގިއުލޭޓަރީ ނިޒާމަކަށް ފުރުސަތު ދިނުން އެއީ ސަރުކާރުގެ ސިޔާސަތު ކަމުގައި ފާހަގަކުރެއްވި އެވެ. ހީނާ ވިދާޅުވި ގޮތުގައި މި ސަރުކާރުގެ އެންމެ ފުރަތަމަ ދުވަހުން ފެށިގެން ވެސް އެންމެ އިސްކަންދޭ ސިޔާސަތަކީ މީޑިއާގެ މިނިވަންކަން އެންމެ ފުޅާދާއިރާއެއްގައި ގާއިމުކޮށް ދެމެހެއްޓުން ކަމުގަ އެވެ. ސަރުކާރުން މީޑިއާ ކޮންޓްރޯލް ކުރުމަށް މަސައްކަތް ކުރަމުން އަންނަ ކަމަށް ބުނެ ދޭތެރެދޭތެރެއިން އެކި ވާހަކަތައް ފެންމަތިވެ އެވެ. އެހެންނަމަވެސް އެފަދަ ވާހަކަތައް ސަރުކާރުން ދަނީ ދޮގުކުރަމުންނެވެ. ސަރުކާރުން މިހެން ބުނެފައިވާއިރު، މީގެކުރިން މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން އުވާލައި، "މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން" ގެ ނަމުގައި އާ ކޮމިޝަނެއް އުފައްދަން ރައްޔިތުންގެ މަޖިލިހަށް ބިލެއް ހުށަހަޅާފައިވެ އެވެ. އެ ބިލު ހުށަހެޅުއްވީ ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާން އަބޫބަކުރެވެ. އެހެންނަމަވެސް އެކަމުގައި އުފެދުނު ނުތަނަވަސްކަމުގެ ތެރެއިން މެމްބަރު ވަނީ ބިލު އަނބުރާ ގެންގޮސްފަ އެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.