ޕޮލްކޯގެ 354 މިލިއަނުގެ ހިޔާނާތް: އަވަސް މައްސަލައެއް ގޮތަށް އޭސީސީން ބަލަނީ
ފުލުހުންގެ ހައުސިން ޕްރޮޖެކްޓް، ބްލޫސް ހައުސިން ޕްރޮޖެކްޓް މެނޭޖްކޮށް، ކުރިއަށް ގެންދަން ހަވާލުކުރި ޕޮލިސް ކޯޕަރޭޓިވް ސޮސައިޓީ (ޕޮލްކޯ) ގެ ނާގާބިލުކަމުގެ ސަބަބުން ދައުލަތަށް 354 މިލިއަން ރުފިޔާ ގެއްލުނު މައްސަލައިގައި ހިމެނޭ މީހުންގެ މައްސަލަ، އަވަސް މައްސަލައެއްގެ ގޮތުގައި އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.
"ބްލޫސް ހައުސިން ސްކީމް" މަޝްރޫއަކީ ދިވެހި ފުލުހުންގެ ހިދުމަތުން ފުލުހުންގެ ވެލްފެއާ ކަންތައްތައް ކުރިއަރުވަން އުފައްދައި ހިންގަމުން އަންނަ ޕޮލްކޯ އާ ހަވާލުކޮށްގެން އެ ކުންފުނިން މެނޭޖްކޮށް، ކުރިއަށް ގެންދިޔަ ގެދޮރުވެރިކަމުގެ މަޝްރޫއެކެވެ.
މަޝްރޫއުގެ ދަށުން ހުޅުމާލޭގައި އިމާރާތްކޮށްފައިވާ 13 ބުރީގެ 3 ޓަވަރުގެ ކޮންސްޓްރަކްޝަން މަސައްކަތް 2013 ވަނަ އަހަރު ހަވާލުކުރީ ނޫމަޑި އާ އެވެ. އެ ކުންފުންޏަށް މަސައްކަތް ނުކުރެވި ލަސްވުމުގެ ސަބަބުން ދެން ހަވާލުކުރީ ނޫމަޑީގެ ސަބްކޮންޓްރެކްޓަރު އައިލެންޑް އެކްސްޕާޓަށެވެ.
އައިލެންޑް އެކްސްޕާޓާ އެކުވި އެއްބަސްވުމަށް އެކި ފަހަރުމަތިން ބަދަލުތަކެއް ގެނެސް، އަގަށް ވެސް ބަދަލު ގެނަ އެވެ. ނަމަވެސް އެއްބަސްވުމާ އެއްގޮތަށް މަސައްކަތް ފުރިހަމަ ނުކޮށްގެން ޕޮލްކޯއިން އެ އެއްބަސްވުން ވެސް އުވާލި އެވެ.
އެ ހުރިހާ އެއްބަސްވުންތަކެއް އުވާލަން ހެދި "ސެޓްލްމަންޓް އެއްބަސްވުންތަކުން" ނުނިމި ހުރި މަސައްކަތްތައް ނިންމަން މަޝްރޫއު ސަރުކާރުގެ ދަށަށް ބަދަލުކުރި އެވެ. އެއަށްފަހު އެ އަހަރުގެ ޑިސެމްބަރު މަހުގެ 30 ވަނަ ދުވަހު ހައުސިން މިނިސްޓްރީން އަމީން ކޮންސްޓްރަކްޝަނަށް މަސައްކަތް ހަވާލުކުރި އެވެ.
އޮޑިޓު އޮފީހުން އާންމުކުރި ރިޕޯޓުގައި ބުނި ގޮތުގައި މަޝްރޫއަށް އޮޑިޓު ކުރެވުނު ތާރީހުގެ ނިޔަލަށް 1.06 ބިލިއަން ރުފިޔާ ހޭދަކޮށްފައިވާ ކަމުގަ އެވެ. އެއީ ފިނޭންސް މިނިސްޓްރީގެ ޓެންޑަ އިވެލުއޭޝަން ބޯޑުން ހޯދި މައުލޫމާތުތަކާއި އަމިއްލަ ފަރާތްތަކުގެ ކޮންސްޓްރަކްޝަން މަސައްކަތްތަކުގެ އަގުތަކަށް ބަލާއިރު، މަޝްރޫއަށް 354.7 މިލިއަން ރުފިޔާ އާއި މަދުވެގެން 240.1 މިލިއަން ރުފިޔާގެ އިތުރުވުމެއްކަން ފާހަގަކޮށްފައިވެ އެވެ.
އޮޑިޓު އޮފީހުން ބުނީ މުޅި މަޝްރޫއުގެ މަސައްކަތް ކުރިއަށް ގެންދިއުމުގައި ކޮންޓްރެކްޓަރުންނާ އެކު ވެފައިވާ އެއްބަސްވުންތަކަށް އެކި ފަހަރު މަތިން ބަދަލުތައް ގެނެސްފައިވާ ކަމަށެވެ. އަދި ނިންމާ މަސައްކަތަށް ފައިސާ ދެއްކުމުގެ ބަދަލުގައި އެކި ނަންނަމުގައި އެ ފަރާތްތަކަށް ފައިސާ ދައްކާފައިވާތީ، މި މުއާމަލާތްތަކުގެ ތެރެއިން ވަކި ބަޔަކަށް ނާޖާއިޒު ފައިދާ ހޯދައިދޭން މަސައްކަތްކޮށްފައިވާ ކަމަށް ބެލެވޭ ކަމަށެވެ.
ކަމުގައި ޝާމިލުވާ ހުރިހާ ފަރާތްތައް ހޯދައި ފިޔަވަޅު އެޅުމަށް މައްސަލަ ތަހުގީގު ކުރުމަށް އޭސީސީއަށާއި އެހެނިހެން ތަހުގީގީ އިދާރާތަކަށް ހުށަހެޅުމަށް ވަނީ ލަފާދީފަ އެވެ.
އޭސީސީގެ އޮފިޝަލަކު "ދެން" އަށް މިއަދު ވިދާޅުވީ އަވަސް މައްސަލައެއްގެ ގޮތުގައި ޕޮލްކޯއަށް ކުރެވޭ ހިޔާނާތުގެ މައްސަލަ ބަލަމުން އަންނަ ކަމަށެވެ. މައްސަލަ ބަލަމުން ދާތީ އިތުރު ތަފުސީލެއް ދީފައެއް ނުވެ އެވެ.
ޕޮލްކޯގެ މައްސަލަ އަވަސް މައްސަލައެއްގެ ގޮތުގައި ބަލަން ފެށިއިރު، އޭސީސީން ހިންގާ ޖިނާއީ ތަހުގީގުތައް އެކަށީގެންވާ އަވަސްމިނެއްގައި ހިނގަމުން ނުދާކަމުގެ ޝަކުވާ ލިބެމުންދާ ކަމަށް ވިދާޅުވެ، ކޮމިޝަނުން ހިންގާ ތަހުގީގުތައް އަވަސްކުރުމަށް ޕްރޮސެކިއުޓާ ޖެނެރަލް (ޕީޖީ) އައްބާސް ޝަރީފް އާދިއްތަ ދުވަހު ވަނީ އަމުރުކުރައްވާފަ އެވެ.
މަޝްރޫއުގެ މަސައްކަތް ނުނިމި ލަސްވަމުން ދިއުމާއި ކޮންޓްރެކްޓަރަށް ސީދާ ފައިދާވާ ގޮތަށް އަދި ދައުލަތަށް ގެއްލުންވާ ގޮތަށް ކޮންޓްރެކްޓަށް ބަދަލު ގެނެސްފައިވާ ކަމަށް އޮޑިޓު ރިޕޯޓުގައިވެ އެވެ. އެ ނިންމުންތައް ނިންމިއިރު އޮތް ޕޮލްކޯގެ ބޯޑުން އަދި އިސްވެރިން ކަމާ ގުޅިގެން ބަލަން ޖެހޭ ބެލުންތައް ބަލައި، އަމަލީ ފިޔަވަޅުތައް އަޅާފައި ނުވާތީ އޭރުގެ ޕޮލްކޯ ބޯޑާއި އިސްވެރިން މި ކަމުގައި ޒިންމާ ކުރުވަން ވެސް ވަނީ ލަފާ ދީފަ އެވެ.
ރިޕޯޓުގައި ވަނީ އައިލެންޑް އެކްސްޕާޓާ އެކު ވެފައިވާ އެއްބަސްވުން އުވާލިއިރު، އެ ފަރާތަށް އިތުރަށް ދައްކާފައިވާ ފައިސާ ވީހާވެސް އަވަހަށް ހޯދުމުގެ މަސައްކަތްކުރަން އެދިފަ އެވެ. އަދި ފައިސާ އަނބުރާ ހޯދަން އައިލެންޑް އެކްސްޕާޓް، އެންސިސް، ތަނބުރުމާ އަދި ޕޮލްކޯ އާއި ދެމެދު ވެފައިވާ އެއްބަސްވުމަކީ ދައުލަތަށް ގެއްލުންވާ ގޮތަށް ހަދާފައިވާ އެއްބަސްވުމަކަށް ވާތީ، އެކަން ތަހުގީގުކޮށް ޝާމިލުވާ ފަރާތްތަކާ މެދު ފިޔަވަޅު އަޅައި، އެއްބަސްވުމާ އެއްގޮތަށް ފައިސާ ނުދައްކާ ނަމަ ކޯޓަށް ހުށަހެޅުމަށް ވެސް އޮޑިޓު އޮފީހުން ވަނީ ލަފާދީފަ އެވެ.
Ads by STO
