ހޯރަފުށި ޖުވަނައިލް ޖަސްޓިސް ޔުނިޓް ރައީސް ހުޅުވައިދެއްވައިފި
ކުޑަކުދިންގެ އަދުލުގެ ގާނޫނުގެ ދަށުން ކުށުގެ ވެއްޓަށް ހުށަހެޅޭ ކުޑަކުދިން އަނބުރާ މުޖުތަމައަށް ނެރުމުގެ ކުރިން ފަރުވާދީ ބައިތިއްބުމަށް ހއ. ހޯރަފުށީގައި ގާއިމުކޮށްފައިވާ ޖުވެނައިލް ޖަސްޓިސް ޔުނިޓް، ހާފްވޭ ހައުސް ރަސްމީކޮށް ރައީސް ޑރ. މުހައްމަދު މުއިއްޒު މިއަދު ހުޅުއްވައިދެއްވައިފި އެވެ.
އެ ޔުނިޓް ރައީސް މުއިއްޒު ހުޅުވައިދެއްވީ ހޯރަފުއްޓަށް އެމަނިކުފާނު ކުރެއްވި ޒިޔާރަތުގެ ތެރެއިން އެވެ. އެ ހާފްވޭ ހައުސްއަކީ އަތޮޅު ތެރޭގައި ގާއިމު ކުރި ފުރަތަމަ ޖުވެނައިލް ޖަސްޓިސް ޔުނިޓެވެ.
އެ ހާފްވޭ ހައުސްގައި އެކި ކުށްތަކުގައި ގެންނަ ކުދިންނަށް ފަރުވާއާއި އެހީތެރިކަން ފޯރުކޮށްދީ، އެ ކުދިން އަނބުރާ މުޖުތަމައުއަށް ނެރުމުގައި ބޭނުންވާ އެހީތެރިކަމާ ރިހެބިލިޓޭޝަން ފަރުވާ ފޯރުކޮށްދޭނެކަމަށް ހޯމް މިނިސްޓްރީން ބުނެފައިވެ އެވެ.
އެ ހާފްވޭ ހައުސް ބަލަހައްޓާނީ ހޯމްލޭންޑް ސެކިއުރިޓީގެ ދަށުން ހިންގާ ޑިޕާޓްމަންޓް އޮފް ޖުވެނައިލް ޖަސްޓިސް އިންނެވެ.
މިއީ 2022 ވަނަ އަހަރު އެމްޓީސީސީއާ ހަވާލުކޮށްގެން ބިނާކުރި ތަނެކެވެ. އެ މަސައްކަތް އެމްޓީސީސީއާ ހަވާލުކުރީ 6.1 މިލިއަން ރުފިޔާއަށެވެ.
ކުޑަކުދިންގެ އަދުލުގެ ގާނޫނަކީ 14 ނޮވެންބަރު 2019 ގައި ރައްޔިތުންގެ މަޖިލީހުން ފާސްކޮށް 20 ނޮވެންބަރު 2019 ވަނަ ދުވަހު ތަސްދީގުކުރި ގާނޫނެކެވެ.
ކުށަށް ހުށަހެޅޭ ކުދިން އަނބުރާ މުޖުތަމައަށް ހެޔޮ ގޮތުގައި ގެނައުމުގެ މަސައްކަތް ސަރުކާރުން ފަށާފަވާއިރު ކުޑަކުދިން ކުށުގެ މާހައުލަށް ހުށަހެޅި ކުށްތަކަށް އަރައިގަތުމަށް މެދުވެރިވާ ސަބަބުތައް ދެނެގަތުމަށްޓަކައި ދިރާސާ ހެދުމުގެ މަސައްކަތްވެސް ޑީޖޭޖޭ އިން މިހާރު ދަނީ ކުރަމުންނެވެ.
Ads by STO
