ތިން ގައުމަކަށް ނޮން-ރެސިޑެންޓް ސަފީރުން އައްޔަންކުރަން މަޖިލިހަށް ފޮނުވައިފި
ރާއްޖެއިން ބޫޓާނަށާއި ކުވައިތަށާ އަދި ސްވިޒަލޭންޑަށް ނޮން-ރެސިޑެންޓް ސަފީރުން އައްޔަންކުރެއްވުމަށް ރައްޔިތުންގެ މަޖިލިހުގެ ރުހުން ހޯދުމަށް ތިން ބޭފުޅެއްގެ ނަން ފޮނުއްވައިފި އެވެ.
ނޮން-ރެސިޑެންޓް ސަފީރުންގެ ގޮތުގައި ކަނޑައެޅުމަށް އެދިވަޑައިގެން ތިން ބޭފުޅުންގެ ނަމާ އެކު، މަޖިލިހަށް ރައީސް ޑރ. މުހައްމަދު މުއިއްޒު ފޮނުއްވި ސިޓީފުޅު މިއަދުގެ ޖަލްސާގައި ވަނީ އިއްވާފަ އެވެ. އެ ސިޓީފުޅުގައި ހުށަހެޅުއްވި ނަންތަކަކީ:
- ރާއްޖޭން ބޫޓާނަށް ކަނޑައަޅާ ނޮން-ރެސިޑެންޓް ސަފީރަކަށް - ރާއްޖޭން ބަންގްލަދޭޝްއަށް ކަނޑައަޅުއްވާފައި ހުންނަވާ ސަފީރު ޝިއުނީން ރަޝީދު
- ރާއްޖޭން ކުވައިތަށް ކަނޑައަޅާ ނޮން-ރެސިޑެންޓް ސަފީރަކަށް - ރާއްޖޭން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު އަހްމަދު ސަރީރު
- ރާއްޖޭން ސްވިޒަލޭންޑަށް ކަނޑައަޅާ ނޮން-ރެސިޑެންޓް ސަފީރަކަށް - ރާއްޖޭން ޔޫއެންއަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު
ނޮން-ރެސިޑެންޓް ސަފީރުން ކަނޑައެޅުއްވުމުގެ އިތުރުން އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އަށް ރާއްޖޭން ދާއިމީ މަންދޫބެއް ހަމަޖެއްސެވުމަށް ރައީސް ފޮނުއްވެވި ސިޓީފުޅު ވެސް ވަނީ އިއްވާފަ އެވެ. އެ ސިޓީފުޅުގައި ހުށަހެޅުއްވީ:
- އޯއައިސީއަށް ރާއްޖޭން ހަމަޖައްސާ ދާއިމީ މަންދޫބަކަށް - ރާއްޖޭން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު އަހްމަދު ސަރީރު
ރާއްޖޭން މިސްރަށް ކަނޑައަޅާ ނޮން-ރެސިޑެންޓް ސަފީރަކަށް ސަރީރު އައްޔަންކުރެއްވުމަށް މަޖިލިހުގެ އިއްޔެގެ ޖަލްސާއަށް ވަނީ ހުށަހަޅުއްވާފަ އެވެ.
މި މައްސަލަތައް ދިރާސާ ކުރުމަށް މަޖިލިހުގެ ހާރިޖީ ގުޅުންތަކާ ބެހޭ ކޮމިޓީއަށް ވަނީ ފޮނުވާފަ އެވެ.
Ads by STO
