އެންމެން ހެއްވާލި ޝައްފާން: އަލްވަދާޢު ކީ ގިނަބައެއްގެ ހިތް ކުދިކުދި ކޮށްލާފައި

އިއްޔެ އަކީ ވަރަށް ގިނަ ބައެއްގެ ހިތްތައް ހިތާމައިން ފުރާލި ދުވަހެކެވެ. އެކުވެރި މަޖާ މިޖާޒެއްގެ، ގިނަ ބައެއްގެ ދިރިއުޅުމަށް އުފަލާއި ހިތްހަމަ ޖެހުން ގެނެސްދިން ޒުވާނަކު އަޅުގަނޑުމެން އެންމެންނާއި ވަކިވި ދުވަހެވެ. ޝައްފާން ރަޝީދު ވަކިވި ދުވަހެވެ.

އިއްޔެ މާލޭގެ ވެސްޓް ޕާކު ސަރަޙައްދަށް، އެކަނި މާއެކަނި ފީނަން ޝައްފާނު ދިޔައީ ހެނދުނު 11:00 ހާއިރެވެ. ގެއްލިގެން ހޯދުމުގެ މަސައްކަތް ފަށާފައި ވަނީ އިއްޔެ ހަވީރު 4:30 ހާއިރެވެ. ފީނުމަށް ނުހަނު ޝައުޤުވެރިކަމެއް ހުރި ޝައްފާން ގެ ހަށިގަނޑު އެސަރަަޙައްދުން މޫދު އަޑިން ފެނިފައި ވަނީ ހަވީރު 5:33 ހާއިރެވެ.

ވެލާނާ އިންޓަނޭޝަނަލް އެއާޕޯޓުގައި ސީ އެންޑް ރެސްކިއު އޮޕަރޭޝަންގައި ފަޔަރ ފައިޓަރެއްގެ ގޮތުގައި ފަސް އަހަރަށް ވުރެ ގިނަ ދުވަހު މަސައްކަތް ކުރި ޝައްފާން ނިޔާވީއިރު އަލަތު ކައިވެންޏަށް ވެފައި ވަނީ އެންމެ 16 ދުވަހެވެ.

ޝައްފާނުގެ ރަށްޓެހިން އޭނާ ސިފަކޮށްފައިވަނީ އޭނާއަކީ ވަރަށް ހިތްހެޔޮ، އަބަދުވެސް މީހުން ހެއްވާ، އެކުވެރި މީހެއްގެ ގޮތުގައެވެ. އެހެންކަމުން ޝައްފާން ގެ ކުއްލި ވަކިވުން ވެފައިވަނީ އޭނާގެ އާއިލާގެ މީހުންގެ އިތުރުން ގާތް އެންމެންނަށް ވެސް ލިބުނު ހިތާމައަކަށެވެ.

އިއްޔެ ދިމާވި އެހިތާމަވެރި ހާދިސާގައި ޝައްފާނު ވަކިވެގެން ދިޔައީ މޫދުގައި ނަމަވެސް އޭނާއަކީ މޫދަށް ކުޅަދާނަ ޒުވާނެކެވެ. ފްރީ ޑައިވިންގ ތަމްރީނުތައް ވެސް ހަދާފައިވެއެވެ. ޝައްފާނުގެ އިންސްޓަގްރާމް އެކައުންޓްގައި ލިޔެފައިވާ ގޮތުން ނަމަ، ނޭވާލާން އެއްވެސް އެއްޗެއް ބޭނުން ނުކޮށް އޭނާ ވަނީ 30 މީޓަރު (ގާތްގަނޑަކަށް 100 ފޫޓު) ފުނަށް ފީނައިފައެވެ. މިއީ ރާއްޖޭގައި ވަރަށް މަދު މީހަކަށް ނޫނީ ނުކުރެވޭ ވަރުގެ ކަމެކެވެ.