މެއި 8 ގެ ކުރިން ތެލެސީމިއާ ސެންޓަރު ހުޅުމާލެއަށް ބަދަލު ކުރަނީ
ދުނިޔޭގެ ތެލެސީމިއާ ދުވަސް، މެއި މަހުގެ އަށް ވަނަ ދުވަހުގެ ކުރިން މާލޭގައި ހުރި ނޭޝަނަލް ތެލެސީމިއާ ސެންޓަރު، ހުޅުމާލޭގައި ހުންނަ އޮރެންޖް ހިޔާ ބިލްޑިންއަށް ބަދަލު ކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު އެހެން ވިދާޅުވީ އޮރެންޖް ހިޔާއަށް ތެލެސީމިއާ ސެންޓަރު ބަދަލު ކުރުމަށް ކުރަމުން އަންނަ މަސައްކަތްތަކަށް އަލިއަޅުއްވާލައްވާ "ރައްޔިތުންނާ އެކު" ސިލްސިލާ ޕޮޑްކާސްޓުގެ ދެ ވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ތެލެސީމިއާގެ މައްސަލައަކީ ގައުމުގައި ވަރަށް ބޮޑު މައްސަލައަކަށް ވިނަމަވެސް މިވީހާ ތަނަށް އޮތީ މައްސަލައަށް ރަނގަޅު ހައްލެއް ނުހޯދި ކަަމަށެވެ. އެގޮތުން ތެލެސީމިއާ އިމާރާތުގެ މަސައްކަތް މުއްދަތު ހަމަވިއިރު ވެސް އޮތީ ނުނިމި ކަމުގައި ފާހަގަކުރެއްވި އެވެ.
"އަޅުގަނޑު ކުރީ ދުވަހު މި ދިޔައީ އެތަން ބަލައިލަން. ދިޔައިރުގައި ދެބައިކުޅަ އެއްބައި މަސައްކަތް ވެސް ނުނިމޭ. ދެން އަނެއްކާ އެ މީހުންނަށް އެކްސްޓެންޝަނެއް ދީގެން، އެ މީހުންނަށް އަދި އިތުރު ލާރިދީގެން، މިހެން ގޮސް ދިގުލައިގެން ދާންވީތޯ. އެ މުއްދަތު ހަމަވާން ދެ ދުވަސް އޮތީ،" އެ ހިސާބުން މަސައްކަތް ކުރަމުން އައި މީހުން ދޫކޮށްލާފައި ކުރިއަށް ގެންދަން ސިފައިންނާ ހަވާލުކުރީ ކަމުގައި ރައީސް ވިދާޅުވި އެވެ.
ތަނުގެ ނުނިމިހުރި މަސައްކަތް ނިންމުމަށް ސިފައިންނަށް ދިނީ އެހާތަނަށް ކޮށްފައިވާ މަސައްކަތް އަގުކޮށް، ދޭން ޖެހޭ އެއްޗެއް އުސޫލުގެ ތެރެއިން މަސައްކަތްކުރި ފަރާތަށް ދިނުމަށް ފަހުގައިކަން ފާހަގަކުރެއްވި އެވެ. ސިފައިންނަކީ މީގެކުރިން ވެސް މިކަހަލަ ކިތަންމެ ކަމެއް ކޮށްފައި ތިބި ބަޔަކަށްވުމާ އެކު، އެމަނިކުފާނަށް ގަބޫލުފުޅު ކުރެއްވުނީ މަސައްކަތް އަވަހަށް ނިންމޭނީ ސިފައިންނާ ހަވާލުކުރުމުން ކަމުގައި ކަމަށް ވިދާޅުވި އެވެ.
ރައީސް ވިދާޅުވި ގޮތުގައި އޮރެންޖް ހިޔާއަށް ތެލަސީމިއާ ސެންޓަރު ބަދަލުކުރަން ލިބުނު ފަންގިފިލާ ހެދުމުގެ މަސައްކަތް ސިފައިން މިހާރު ކުރަމުންދާ ކަމުގަ އެވެ. މަސައްކަތް ހަވާލުކުރީ އެއް މަސް ދުވަހު ތެރޭގައި ނިންމާ ގޮތަށް ކަމަށާއި އެ އަމާޒަށް ވާސިލުވުމަށް ހުއްޓާނުލައި ރެޔާއި ދުވާލު މަސައްކަތް ކުރުމަށް ސިފައިންނަށް އަންގަވާފައިވާކަން ފާހަގަކުރެއްވި އެވެ.
"ވަރަށް ޑިސިޕްލިން، ހާޑްވޯކް ކުރައްވާ، ބުރަ މަސައްކަތް ކުރައްވާ ބައެއް. ދެން އަޅުގަނޑު ވެސް ބެލިން، ކުރެހުންތަކާއި ހުރިހާ އެއްޗެއް. އެ ތަނަށް ބޭނުންވާ ގޮތަށް އިންޓީރިއާ ވެސް ޑިޒައިން ކުރެވިފައި އެ ހުރީ،" މަރާމާތުގެ މަސައްކަތް މި މަހުގެ 30 ވަނަ ދުވަހަށް ނިންމާނެކަން ފާހަގަކުރައްވާ ރައީސް ވިދާޅުވި އެވެ.
ރައީސް ވިދާޅުވީ މިހާރު ހުރި ތެލަސީމިއާ ސެންޓަރަކީ ކުޑަ ތަނަކަށްވެފައި، މާހައުލު އޮންނަނީ ކުޑަކުދިންނާއި ޒުވާން ކުދިން އެންމެ ހިތްގައިމު ގޮތަކަށް ނޫން ކަމަށެވެ. އޮރެންޖް ހިޔާ މަރާމާތު ކުރަމުންދާއިރު، ތަނުގެ އިންޓީރިއާއަށް ރަނގަޅު ބަދަލުތަކެއް ގެނެސްފައި ހުންނާނެކަން ފާހަގަކުރެއްވި އެވެ.
"ދެން މެއި މަހު 8. އެއީ، ދުނިޔޭގެ ތެލަސީމިއާ ދުވަސް. އެ ދުވަހަށް އަޅުގަނޑުމެން މާލޭގައި ހުރި މަރުކަޒު މި ތަނަށް ބަދަލުކޮށް، އެ ދުވަހުގެ ކުރިން އިނގޭތޯ. ބަދަލުކޮށް، ވަރަށް ފަސޭހަކަމާ އެކީގައި، މާއުނދަގުލެއް ކުދިންނަށް ވެސް ދިމާނުވާ ގޮތަށް. ހަމަ ކުރު ވަގުތުކޮޅެއްގެ ތެރޭގައި ބަދަލު ކުރުމުގެ ކަންތައް ވެސް ރޭވިގެންދާނެ،" މާލެއިން ހުޅުމާލެއަށް ސެންޓަރު ބަދަލު ކުރެވުމުން މިހާރަށް ވުރެ ރަނގަޅަށް ހިދުމަތްތައް ލިބޭނެކަން ފާހަގަކުރައްވާ ރައީސް ވިދާޅުވި އެވެ.
ރައީސް ވިދާޅުވި ގޮތުގައި އޮރެންޖް ހިޔާއަށް ތެލެސީމިއާ ސެންޓަރު ބަދަލު ކުރެވުމުން މާލޭގައި މިހާރު ދެމުން އަންނަ ހިދުމަތްތަކަށް ވުރެ ރަނގަޅަށް ހިދުމަތްތަކެއް ފޯރުކޮށްދެވޭނެ ކަމުގަ އެވެ. އެގޮތުން އެތަނަށް ޑީއެންއޭ ޓެސްޓް ކުރާނެ މެޝިންތައް ހޯދުމާއި އިތުރު ފްރިޖްތައް ހޯދުން ފަދަ މަސައްކަތްތައް ވެސް ހިނގަމުންދާ ކަމުގަ އެވެ. އަދި ސާމްޕަލް ބަހައްޓާނެ ޖާގަ ވެސް ތަނުގައި ބޮޑުވާނެ ކަމަށް ވިދާޅުވި އެވެ.
ރައީސްގެ ވާހަަކަފުޅުގައި ވަނީ ތެލެސީމިއާ ސެންޓަރުގައި މިހާރު ސީނިއާ ފިޒިޝަނެއް ފުލްޓައިމްކޮށް މަސައްކަތް ކުރަން ފަށާފައިވާކަން ފާހަގަކުރައްވާފަ އެވެ. ފަސް ނަރުހުން ހޯދުމަށް ވެސް ހުޅުވާލެވިފައިވާ ކަމަށާ އަދި އެގޮތަށް ނުކުރެވި ގިނަ ދުވަސްވެފައި ހުރި ކަންކަން ހަމަޖެހެމުންދާ ކަަމަށް ވެސް އެމަނިކުފާނު ވިދާޅުވި އެވެ.
