ޚަބަރު ސަރުކާރު

އައިޖީއެމްއެޗުގެ 75 އެނދުގެ ޕްރޮޖެކްޓު ނިންމައި އަންނަ މަހު ހިދުމަތް ފެށޭނެ: ރައީސް

މުޙައްމަދު ޢަތީފް ، ދެން އޮންލައިން

އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ހިދުމަތުގެ ފެންވަރު ރަނގަޅު ކުރުމަށް ކުރަމުން އަންނަ މަސައްކަތުގެ ތެރެއިން 75 އެނދުގެ ޕްރޮޖެކްޓު ނިންމައި އަންނަ މަހު ހިދުމަތް ފެށޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

Ads by STELCO

އެމަނިކުފާނު އެހެން ވިދާޅުވީ ރައްޔިތުންނާ ވީހާވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ހިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓުގެ ދެ ވަނަ އެޕިސޯޑުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ ސިއްހީ ހިދުމަތް ފޯރުކޮށްދޭ ސަރުކާރުގެ މަރުކަޒުތަކުގެ ހިދުމަތްތައް ފުޅާކުރެއްވުމަކީ ވަރަށް ބޮޑު އިސްކަމެއް ދެއްވާ ކަމެއް ކަމަށާއި ރާއްޖޭގެ އާބާދީގެ ދެބައިކުޅަ އެއްބައި މީހުން ދިރިއުޅެމުން ދަނީ މާލެ ސަރަހައްދުގައި ކަމަށެވެ. އެހެންކަމުން މާލެ ސަރަހައްދަށް ވަރަށް ބޮޑު އިސްކަމެއް ދޭން ޖެހޭ ކަމުގައި ފާހަގަކުރެއްވި އެވެ.

އެއީ ވަކި ރަށެއް ތަފާތު ކުރުން ނޫންކަން ފާހަގަކުރައްވާ ރާއްޖޭގައި މީހުން ދިރިއުޅޭ ހުރިހާ ރަށެއްގައި ވެސް ސިއްހީ ހިދުމަތް ފޯރުކޮށްދޭ މަރުކަޒުތަކާއި ހޮސްޕިޓަލުތައް ގާއިމުކުރެވި، ތަރައްގީ ކުރެވޭނެ ކަމުގެ ޔަގީންކަން އެމަނިކުފާނު ދެއްވި އެވެ.

ރައީސްގެ ވާހަކަފުޅުގައި ވަނީ ސަރުކާރުން ހިންގާ އެންމެ ބޮޑު ހޮސްޕިޓަލު، އައިޖީއެމްއެޗްގެ ހިދުމަތުގެ ފެންވަރު ރަނގަޅު ކުރުމަށް ކުރަމުން އަންނަ މަސައްކަތްތަކުގެ މައުލޫމާތު ހިއްސާކުރައްވާފަ އެވެ. އެގޮތުން އެ ހޮސްޕިޓަލަށް ދިމާވެފައިވާ ޖާގައިގެ ދަތި ކަމަށް ހައްލު ހޯދުމުގެ ގޮތުން 75 އެނދުގެ މަޝްރޫއެއް ނިންމައި، ހިދުމަތް ދެވެން ފަށާނެ ކަމުގައި ވިދާޅުވި އެވެ.

"އެތަން ހުޅުވިގެން ދިޔައިމަ، މިހާރު އައިޖީއެމްއެޗަށް ދިމާވެފައިވާ ޖާގައިގެ ދަތިކަން ވަރަށް ބޮޑުތަނުން ހައްލުވެގެން އެބަދޭ އިނގޭތޯ. އެ ޕްރޮޖެކްޓުގެ ވާހަކަ އަޅުގަނޑު ރިޔާސީ ބަޔާނުގައި ވެސް ދެންނެވިން. އެ ތަން ހުޅުވިގެންދާނެ ވާހަކަ. މޭ މަހުގެ ތެރޭގައި އިރާދަކުރެއްވިއްޔާ ހުޅުވޭނެ،" ރައީސް ވިދާޅުވި އެވެ.

މި މަޝްރޫއުގައި ޖެނެރަލް ވޯޑުގެ ގޮތުގައި އިތުރު ކުރެވޭ 44 އެނދާއި ހައި ޑިޕެންޑަންސީ ޔުނިޓް (އެޗްޑީޔޫ) އެނދުގެ ގޮތުގައި އިތުރު ކުރެވޭ 15 އެނދުގެ އިތުރުން 14 ޕްރައިވެޓް ޔުނިޓް ހިމެނެ އެވެ.

އޭގެ އިތުރުން ޓާޝަރީ ފެންވަރަށް ބަދަލުކޮށްފައިވާ ހުޅުމާލެ ހޮސްޕިޓަލުން ފޯރުކޮށްދޭ ހިދުމަތްތައް ތަރައްގީ ކުރަމުން ގެންދާ ކަމުގައި ވިދާޅުވި އެވެ. އަދި ޗައިނާއިން ފޯރުކޮށްދޭ ހިލޭ އެހީގެ ތެރެއިން ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރުމުގެ ހުރިހާ ކަމެއް މިހާރު ހަމަޖެހިފައިވާ ކަމުގައި އެމަނިކުފާނު ވިދާޅުވި އެވެ.

މާލެ ސަރަހައްދުގައި ވަކިވަކި ކަންކަމަށް ހާއްސަ ހޮސްޕިޓަލުތައް ތަރައްގީ ކުރުމަށް ގިނަ މަސައްކަތްތަކެއް ކުރަމުން ގެންދާ ކަމުގައި ރައީސް ވިދާޅުވި އެވެ. އެގޮތުން ކެންސަރު ހޮސްޕިޓަލުގެ މަސައްކަތާއި ތެލަސީމިއާއަށް ހާއްސަކޮށްގެން ހުޅުމާލޭގައި ތަރައްގީ ކުރާ ހޮސްޕިޓަލާއި އަންހެނުންނާއި ކުޑަކުދިންނަށް ހާއްސަ ހޮސްޕިޓަލެއްގެ މަސައްކަތް މި ދައުރުގެ ތެރޭގައި ކުރާނެ ކަމުގައި ފާހަގަކުރެއްވި އެވެ.

ރައީސް ވިދާޅުވީ ސަރުކާރުން ތަންފީޒު ކުރަމުން ގެންދާ ވަށާ ޖެހޭ ސިއްހީ ހިދުމަތުގެ ސިޔާސަތެއް ކަމަށެވެ. ނަމަވެސް އަދުގެ ހާލަތު އޮތްގޮތުން ރާއްޖެއިން ބޭރަށް ގޮސް ސިއްހީ ހިދުމަތް ހޯދަން ޖެހޭ ހާލަތްތައް މެދުވެރިވާ ކަމަށާއި އެއީ ފަސޭހަކަމެއް ނޫންކަން ފާހަގަކުރައްވައި، ބަލި ޖެހޭ ހިސާބުން ރާއްޖޭގައި ތިބެގެން ފަރުވާ ކުރެވޭނެ އިންތިޒާމުތައް ހަމަޖެހިފައި އޮންނަން ޖެހޭ ކަމުގައި ވަނީ ވިދާޅުވެފަ އެވެ.

Ads by Ooredoo