ކުޑަކުދިންގެ އީއާރުން ހަތަރު މަސް ތެރޭ ދިހަ ހާހަށް ވުރެ ގިނަ ކުދިން ފަރުވާ ހޯދައިފި
އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ކުޑަކުދިންނަށް ހާއްސަކޮށް ގާއިމުކުރި އެމަޖެންސީ ރޫމް (އީއާރު) އިން މިހާތަނަށް ދިހަ ހާހަށް ވުރެ ގިނަ ކުދިން ފަރުވާ ހޯދާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު އެހެން ވިދާޅުވެފައި ވަނީ "ރައްޔިތުންނާ އެކު" ސިލްސިލާ ޕޮޑްކާސްޓުގެ ދެ ވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ސިއްހީ ހިދުމަތް ފޯރުކޮށްދޭ ސަރުކާރުގެ މަރުކަޒުތަކުގެ ހިދުމަތްތައް ފުޅާކުރެއްވުމަކީ ވަރަށް ބޮޑު އިސްކަމެއް ދެއްވާ ކަމެއް ކަމަށެވެ. ރާއްޖޭގެ އާބާދީގެ ދެބައިކުޅަ އެއްބައި މީހުން ދިރިއުޅެމުން ދަނީ މާލެ ސަރަހައްދުގައި ކަމަށް ވުމުން މާލެ ސަރަހައްދަށް ވަރަށް ބޮޑު އިސްކަމެއް ދޭން ޖެހޭ ކަމުގައި ފާހަގަކުރެއްވި އެވެ.
އެގޮތުން ސަރުކާރުން ހިންގާ އެންމެ ބޮޑު ހޮސްޕިޓަލު، އައިޖީއެމްއެޗްގެ ހިދުމަތުގެ ފެންވަރު ރަނގަޅު ކުރުމަށް ކުރަމުން އަންނަ މަސައްކަތްތަކާއި މިހާތަނަށް ކޮށްފައިވާ ކަންކަމުގެ މައުލޫމާތު އެމަނިކުފާނު ވަނީ ހިއްސާކުރައްވާފަ އެވެ.
ރައީސް ވިދާޅުވި ގޮތުގައި އުމުރުން 16 އަހަރުން ދަށުގެ ކުދިންނަށް އެމަޖެންސީ ހިދުމަތްތައް ދިނުމަށް ހާއްސަ އީއާރެއް ގާއިމުކޮށް މިދިޔަ ނޮވެމްބަރު މަހުގެ ތެރޭގައި ހިދުމަތް ފަށާފައިވާ ކަމުގަ އެވެ. އެގޮތަށް ވަކިން ހިދުމަތްދޭން ފެށުމުން މައި އީއާރަށް ލުއިތަކެއް ލިބޭކަން ފާހަގަކުރެއްވި އެވެ.
"މިދިޔަ ގާތްގަނޑަކަށް ހަތަރު މަހެއްހާ ދުވަހުގެ ތެރޭގައި 10،393 ކުދިން އެ ތަނުން ހިދުމަތް ހޯދައިފި. މާނައަކީ އެހެން ނޫން ނަމަ، އާންމުން ވެސް ދާ އީއާރަށޭ މި ކުދިން ވެސް ދާން ޖެހޭނީ،" ރައީސް ވިދާޅުވި އެވެ.
އެމަނިކުފާނު ވިދާޅުވީ ކުޑަކުދިންގެ އީއާރު ފަރުމާކޮށްފައި ވަނީ އެ ކުދިންނަށް ހިތްގައިމުވާ ގޮތަށް ކަމަށެވެ. ފަރުވާ ކުރުމަށް ހާއްސަ ޑޮކްޓަރުން ތިބެފައި، ކުދިންނަށް ހާއްސަ ސަމާލު ކަމެއް އެ ތަނުން ދެވޭ ކަމަށެވެ. ބޭނުންވާ ފަރުވާ އަވަހަށް ފޯރުކޮށްދެވުމުން ބެލެނިވެރިންނަށް ވެސް ވަރަށް ބޮޑު ހިތްހަމަޖެހުމެއް ލިބޭނެ ކަމުގައި ވިދާޅުވި އެވެ.
ރައީސް މުއިއްޒު ފެއްޓެވި "ރައްޔިތުންނާ އެކު" ޕޮޑްކާސްޓުގައި ވާހަކަފުޅު ދައްކަވަނީ / ފޮޓޯ:ރައީސް އޮފީސް
ރައީސްގެ ވާހަކަފުޅުގައި ވަނީ އައިޖީއެމްއެޗްއަށް ދިމާވެފައިވާ ޖާގައިގެ ދަތި ކަމަށް ހައްލު ހޯދުމުގެ ގޮތުން ކުރިއަށްދާ 75 އެނދުގެ މަޝްރޫއުގެ މަސައްކަތް ނިންމައި އަންނަ މަހު ބޭނުންކުރެވެން ފަށާނެ ކަމުގައި ވިދާޅުވެފަ އެވެ.
އެ މަޝްރޫއުގެ ދަށުން ގާއިމުކުރާ ތަނުގައި ޖެނެރަލް ވޯޑުގެ ގޮތުގައި 44 އެނދާއި ހައި ޑިޕެންޑަންސީ ޔުނިޓު (އެޗްޑީޔޫ) 15 އެނދު އަދި 14 ޕްރައިވެޓް ޔުނިޓު ހުންނާނެކަން ރައީސް ފާހަގަކުރެއްވި އެވެ.
ޕޮޑްކާސްޓުގައި ރައީސް ވަނީ ޓާޝަރީ ފެންވަރަށް ބަދަލުކޮށްފައިވާ ހުޅުމާލެ ހޮސްޕިޓަލުން ފޯރުކޮށްދޭ ހިދުމަތްތައް ތަރައްގީ ކުރަމުން ގެންދާ ކަމުގައި ވިދާޅުވެފަ އެވެ. އަދި ޗައިނާއިން ފޯރުކޮށްދޭ ހިލޭ އެހީގެ ތެރެއިން ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރުމުގެ ހުރިހާ ކަމެއް މިހާރު ހަމަޖެހިފައިވާ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި މާލެ ސަރަހައްދުގައި ވަކިވަކި ކަންކަމަށް ހާއްސަ ހޮސްޕިޓަލުތައް ތަރައްގީ ކުރުމަށް ގިނަ މަސައްކަތްތަކެއް ކުރަމުން ގެންދާ ކަމުގަ އެވެ. އެގޮތުން ކެންސަރު ހޮސްޕިޓަލާއި ތެލެސީމިއާއަށް ހާއްސަކޮށްގެން ހުޅުމާލޭގައި ތަރައްގީކުރާ ހޮސްޕިޓަލާ އަދި އަންހެނުންނާއި ކުޑަކުދިންނަށް ހާއްސަ ހޮސްޕިޓަލުގެ މަސައްކަތް މި ދައުރުގެ ތެރޭގައި ނިންމާނެ ކަމުގައި ފާހަގަކުރެއްވި އެވެ.
ސަރުކާރުން ތަންފީޒު ކުރަމުން ގެންދާނީ ވަށާ ޖެހޭ ސިއްހީ ހިދުމަތުގެ ސިޔާސަތެއް ކަމަށް ރައީސް ވިދާޅުވި އެވެ. ނަމަވެސް އަދުގެ ހާލަތު އޮތްގޮތުން ރާއްޖެއިން ބޭރަށް ގޮސް ސިއްހީ ހިދުމަތް ހޯދަން ޖެހޭ ހާލަތްތައް މެދުވެރިވާ ކަމަށާއި އެއީ ފަސޭހަކަމެއް ނޫންކަން ފާހަގަކުރައްވައި ރައީސް ވިދާޅުވީ ބަލި ޖެހޭ ހިސާބުން ރާއްޖޭގައި ތިބެގެން ފަރުވާ ކުރެވޭނެ އިންތިޒާމުތައް ހަމަޖެހިފައި އޮންނަން ޖެހޭ ކަަމަށެވެ.
