ބަނގުރަލާ އެކު ހައްޔަރު ކުރި ފުލުހެއް ސަސްޕެންޑް ކޮށްފި

މިދިޔަ މަހު ފުލުހުން ހިންގި އޮޕަރޭޝަނެއްގެ ތެރެއިން ބަނގުރަލާ އެކު ،ކ. ތުލުސްދޫ ގެސްޓްހައުސްއެއްގެ ތެރެއިން ހައްޔަރު ކުރި ބައެއްގެ ތެރޭގައި ހިމެނޭ ފުލުސް އޮފިސަރު ސަސްޕެންޑް ކޮށްފިއެވެ.
މިދިޔަ މަހުގެ 17ވަނަ ދުވަހު ތުލުސްދޫ ގެސްޓްހައުސްއެއް ބަލައި ފާސް ކުރުމަށް ފުލުހުން ހިނގި މި އޮޕަރޭޝަންގައި ޖުމްލަ ހަތް މީހަކު ހައްޔަރު ކުރިއެވެ. އޭގެ ތެރޭގައި ހިމެނޭ ފުލުސް އޮފިސަރަކީ، ކޮންސްޓަބަލް އާމިނަތު މާޔާ ހުސައިން ބަޝީރެވެ.
އެއީ 20 އަހަރުގެ އަންހެނަކާއި 26 އަހަރުގެ އަންހެނަކާއި 23 އަހަރުގެ ތިން ފިރިހެނުންނާއި އަންހެނެއްގެ އިތުރުން 27 އަހަރުގެ ފިރިހެނެއް ކަމަށް ފުލުހުން ބުންޏެވެ. އެމީހުން ތިބި ތަނުން ބަނގުރާ ކަމަށް ބެލެވޭ އެއްޗެއް އަޅާފައި ހުރި 500 އެމްއެލްގެ ދެ ފުޅި އާއި ތައްޓެއް ފެނިފައި ވެއެވެ.
ފުލުހުން ބުނީ އެމީހުން ކޯޓަށް ހާޒިރު ނުކޮށް ދޫކޮށްލާފައިވާ ކަމަށެވެ. އެމީހުންގެ ކުޑަކަމުދާ ތަކެތި ޓެސްޓް ކުރުމުން ނެގެޓިވްވެފައިވާ ކަމަށް ވެސް ބުންޏެވެ. އެމީހުން ދޫކޮށްލީ ކީއްވެގެން ކަމެއް ފުލުހުން ނުބުނެއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.