Sunday, 22 November 2026
Advertisement
Allied Insurance (leaderboard)
ޚަބަރު

ދިޔަމިގިލީގައި އިމާރާތްކުރި 10 ކުލާސްރޫމްގެ މަސައްކަތް ނިންމާލައިފި

ތ. ދިޔަމިގިލީ ސްކޫލުގައި ސިފައިން އިމާރާތްކުރި 10 ކުލާސްރޫމްގެ ތިން ބުރި އިމާރާތުގެ މަސައްކަތް 235 ދުވަހުގެ ތެރޭގައި ވަނީ ނިންމާލާފައެވެ.

ފޮޓޯ: ދިފާއީ، ވަޠަނީ ޚިދުމަތާ ބެހޭ ވުޒާރާ
ފޮޓޯ: ދިފާއީ، ވަޠަނީ ޚިދުމަތާ ބެހޭ ވުޒާރާ

ތ. ދިޔަމިގިލީ ސްކޫލުގައި 10 ކުލާސްރޫމް ހިމެނޭ ގޮތަށް އެމްއެންޑީއެފްގެ މިލިޓަރީ އިންޖިނިއަރސް (އެމްއީ)އިން އިމާރާތްކުރި ތިން ބުރި އިމާރާތުގެ މަސައްކަތް އެއްކޮށް ނިންމާލައިފިއެވެ.

މި އަހަރުގެ މާރިޗު 31ވަނަ ދުވަހު ފެށި މި މަޝްރޫއުގެ މަސައްކަތް އެއްކޮށް ނިންމާލާފައި ވަނީ މި މަހުގެ 21ވަނަ ދުވަހުއެވެ. ޖުމްލަ 235 ދުވަހުގެ ތެރޭގައި މި އިމާރާތް ނިންމުމަށް ސިފައިން ވަނީ ރެޔާއި ދުވާލު މަސައްކަތް ކޮށްފައެވެ. އެގޮތުން ކުރިން ހުރި އިމާރާތުގެ އޮނިގަނޑަށް ލިބިފައިވާ ގެއްލުންތައް މަރާމާތުކޮށް، އިތުރު ތަނބުތައް ޖަހައި އޮނިގަނޑު ވަރުގަދަކުރުމުގެ މަސައްކަތް ސިފައިން ވަނީ ކޮށްފައެވެ.

މި އިމާރާތުގެ ކޮންކްރީޓް މަސައްކަތްތަކާއި، ރޭނުމާއި، ސިމެންތި ޖެހުމާއި، ކުލަލުމާއި، ފުރާޅުގެ އިތުރުން ކްލާސްރޫމްތަކާއި ފާޚާނާތަކުގައި ތަށިމުށި ޖަހައި ސީލިންގް ކުރުމުގެ މަސައްކަތް ވެސް ވަނީ ނިންމާފައެވެ. މީގެ އިތުރުން ފެނާއި ކަރަންޓު ވައިރުކުރުމާއި، އައިސީޓީ ނެޓްވޯކާއި، ޕީއޭ ސިސްޓަމް އަދި އަލިފާން ނިއްވާ ނިޒާމު ހަރުކުރުމުގެ މަސައްކަތް ވެސް ވަނީ ފުރިހަމަކޮށްފައެވެ.

މި މަސައްކަތް ކުރިއަށްދިޔަ އިރު ދިޔަމިގިލީގެ ރައްޔިތުންގެ ފަރާތުން ސިފައިންނަށް ބޮޑު އެހީތެރިކަމަކާއި އެއްބާރުލުމެއް ލިބިފައިވާ ކަމަށް އެމްއެންޑީއެފުން ފާހަގަކުރެއެވެ. މި މަޝްރޫއުގެ މެނޭޖަރަކީ ވޮރަންޓް އޮފިސަރ 2 ޖަޢުފަރު މުހައްމަދެވެ. އަދި އެސިސްޓެންޓް މެނޭޖަރަކީ ފަސްޓް ސާޖަންޓް އަޙްމަދު ޚާލިދެވެ.

މި އިމާރާތް ނިންމުމުގައި އެމްއެންޑީއެފްގެ ސިގްނަލްސް އާއި، އިލެކްޓްރިކަލް އެންޑް މެކޭނިކަލް އިންޖިނިއަރސް (އީއެމްއީ) އަދި ސެންޓްރަލް އޭރިއާ ކޮމާންޑްގެ ސިފައިންގެ ފަރާތުން ޓެކްނިކަލް އެހީތެރިކަން ލިބިފައިވާ ކަމަށް ވެސް އެމްއެންޑީއެފުން މައުލޫމާތުދެއެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.