Sunday, 22 November 2026
Advertisement
STO — McCoy (leaderboard)
ޚަބަރު

މަތީ ޝަރަފު ޢައްބާހަށް ލިބިވަޑައިގަތުމުން ރައީސް މައުމޫންގެ ތަހުނިޔާ

ދިވެހިބަހާއި އަދަބިއްޔާތަށް ޚިދުމަތްކުރުމުގެ އެންމެ މަތިވެރި ޝަރަފު ޢައްބާސް އިބްރާހީމަށް ލިބިވަޑައިގަތުމާ ގުޅިގެން ކުރީގެ ރައީސް މައުމޫން ތަހުނިޔާ ވިދާޅުވެއްޖެއެވެ.

ފޮޓޯ: ރައީސުލްޖުމްހޫރިއްޔާގެ އޮފީސް
ފޮޓޯ: ރައީސުލްޖުމްހޫރިއްޔާގެ އޮފީސް

ދިވެހިބަހާއި އަދަބިއްޔާތަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢައްބާސް އިބްރާހީމަށް ލިބިވަޑައިގަތުމާ ގުޅިގެން، ކުރީގެ ރައީސް އަލްއުސްތާޛު މަޢުމޫން ޢަބްދުލްޤައްޔޫމް އެމަނިކުފާނަށް ތަހުނިޔާ ވިދާޅުވެއްޖެއެވެ.

ޢައްބާސް އިބްރާހީމަށް މި ޝަރަފު އަރުވާފައި ވަނީ 19 ނޮވެމްބަރު 2026ވީ އަންގާރަ ދުވަހުގެ ރޭ ޒުވާނުންގެ މަރުކަޒުގައި ބޭއްވި ޖުމްހޫރީ ދުވަހުގެ ރަސްމީ ޖަލްސާގައެވެ. މި ޢިއްޒަތް އެމަނިކުފާނަށް އެރުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. ރައީސް މައުމޫން 'އެކްސް'ގައި ކުރެއްވި ޕޯސްޓެއްގައި ވަނީ ޢައްބާސް އިބްރާހީމަށް އިޚްލާޞްތެރިކަމާ އެކު ތަހުނިޔާ ދަންނަވާފައެވެ.

ދިވެހިބަހާއި އަދަބިއްޔާތުގެ ދާއިރާއިން ފާހަގަކޮށްލެވޭ ފުންނާބު އުސް ޚިދުމަތްތަކެއް ކުރައްވާފައިވާ ޢައްބާސް އިބްރާހީމަކީ، ލިޔުންތެރިކަމާއި ވާހަކަދެއްކުމުގެ ފަންނުގައި ނަމޫނާ ބޭފުޅެކެވެ. އެމަނިކުފާނު ވަނީ 1996ވަނަ އަހަރުން ފެށިގެން 12 އަހަރު ވަންދެން ދިވެހިބަހާއި ތާރީޚަށް ޚިދުމަތްކުރާ ޤައުމީ މަޖިލީހުގެ ރައީސްކަން ކުރައްވާފައެވެ. އެ މުއްދަތުގެ ތެރޭގައި 2000ވަނަ އަހަރު ދިވެހިބަސް ފޮތް ޑިޖިޓަލް ކުރައްވައި، ކޮމްޕިއުޓަރުން ބޭނުންކުރެވޭ ގޮތް ހެއްދެވުމަކީ ފާހަގަކޮށްލެވޭ މުހިންމު މަސައްކަތެކެވެ.

ނޫސްވެރިކަމުގެ ދާއިރާގައި ވެސް ދިގު މުއްދަތަކަށް ޚިދުމަތް ކުރައްވާފައިވާ ޢައްބާސްއަށް ވަނީ ނޫސްވެރިކަމުގެ 'ރަން ގަލަން'އާއި 'އަލިމަސް ގަލަން'ގެ އިތުރުން މީޑިއާ ކައުންސިލުންދޭ 'ޙަޔާތުގެ އަރުތަ' އިނާމު ވެސް ލިބިވަޑައިގެންފައެވެ. ޢައްބާސް އިބްރާހީމް މިހާރު ހުންނެވީ މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުގެ މުޝީރުގެ މަޤާމުގައެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.