ނެޝެނަލް ހެލްތު ލެބޯޓަރީ އަޅަން ޖަރުމަނުގެ ކުންފުންޏަކާ ހަވާލުކޮށްފި
ނެޝެނަލް ހެލްތު ލެބޯޓަރީ އަޅަން ޖަރުމަނުގެ ކުންފުންޏަކާ މިއަދު ހަވާލުކޮށްފިއެވެ.
މިއަދު ހެލްތު މިނިސްޓްރީގައި ބޭއްވި ރަސްމިއްޔާތެއްގައި އެ މަސައްކަތް ހަވާލުކުރީ ޖަރުމަނުގެ ކުންފުނި، ޖީޓެކް ކޮންސަލްޓިން ގްރޫޕްއާއެވެ.
އެކަމާ ގުޅޭ އެއްބަސްވުމުގައި ހެލްތު މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ހަދީޖާ އަބްދުއް ސަމަދު އަބްދުﷲއެވެ. އަދި ޖީޓެކްގެ ފަރާތުން ސޮއިކުރެއްވީ ޑިރެކްޓާ ހެލްތު އެންޑް ސޯޝަލް އިންފްރާސްޓްރަކްޗާ ކްރިސްޓްނަ ޖެންރާއެވެ.
އެ އެއްބަސްވުމުގެ ދަށުން އެ ލެބޯޓަރީ ހަދަން ފީސިބިލިޓީ ސްޓަޑީއާއި ޑިޒައިންގެ މަސައްކަތާއި އަދި ލެބޯޓަރީ އެޅުމުގެ މަސައްކަތް ކުރިއަށް ގެންދާނެ އެވެ.
އެ މަޝްރޫއުގެ ދަށުން 12 ބުރީގެ އިމާރާތެއް އަޅާއިރު ބީއެސްއެލް-3ގެ ލެބްތައް ވެސް ގާއިމުކުރާނެއެވެ. އޭގެ ސަބަބުން ބަލިތައް ތަހުލީލުކުރަން ފަސޭހަ ވެގެންދާނެ ކަމަށް ހެލްތު މިނިސްޓްރީން ބުންޏެވެ.
އެ މަޝްރޫއުގެ ދަށުން އެންމެ ޒަމާނީ ވައިރޮލޮޖީ، ބެކްޓީރިއޮލޮޖީ، ޕެރަސައިޓޮލޮޖީ އަދި މޮލިކިއުލާއާ ގުޅޭ ކަންކަން ދެނެގަތުމުގެ ކަންކަން އެއް ފުރާޅެއްގެ ދަށަށް ގެނެސް ފެތުރޭ ބަލިތައް އަވަހަށް ކަށަވަރުކަމާ އެކު ދެނެގަނެވިގެންދާނެ ކަމަށް ވެސް މިނިސްޓްރީން ބުންޏެވެ.
ސިއްހީ ދާއިރާ ކުރިއަރުވަން މި ސަރުކާރުން ކުރަމުންގެންދާ މަސައްކަތުގެ ތެރޭގައި ސްޕެޝަލައިޒްޑް ހޮސްޕިޓަލުތައް އެޅުމާއި އަދި ޓާޝިއަރީ ހޮސްޕިޓަލުތައް އެޅުން ހިމެނެއެވެ.
