އަތޮޅު ކައުންސިލް އުވާލުމަށް ޤާނޫނަށް ގެނައި އިސްލާޙަށް ތާޢީދު: ޤާސިމް
އަތޮޅު ކައުންސިލްތައް އުވާލުމަށް ޤާނޫނު އަސާސީއަށް ގެނައި އިޞްލާޙަށް ތާޢީދު ކުރައްވާ ފުރިހަމަ އެއްބާރުލުން ދެއްވާނެކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.
އެމަނިކުފާނު ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ، ރަށު ކައުންސިލްތަކުން ނިންމާ ނިންމުންތައް، އަތޮޅު ކައުންސިލް މެދުވެރިކޮށް ސަރުކާރުގެ އިދާރާތަކަށް ފޮނުވުމުގެ ބަދަލުގައި ސީދާ ރަށު ކައުންސިލުން ސަރުކާރުގެ އިދާރާތަކަށް ފޮނުވާނަމަ، ޚިދުމަތްތައް އަވަސްވާނެ ކަމަށެވެ. އަދި ދަޢުލަތުގެ ޚަރަދުތައް ކުޑެވެ އެފިޝެންސީ އިތުރު ވެގެންދާނެކަމަށް ވެސް ޤާސިމް ވިދާޅުވިއެވެ.
މީގެއިތުރުން، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާ ތަކުން، ނުހަނު ޒިންމާދާރުކަމާއެކު ލޯކަލް ގަވަރމަންޓް އޮތޯރިޓީއަށާއި ކައުސިލްތަކަށް އެހީތެރިކަން ފޯރުކޮށްދެމުން އަންނަ ކަމަށާއި ލާމަރުކަޒީ ނިޒާމުގެ ތެރެއިން އަތޮޅު ކައުންސިލަކީ ރާއްޖެގައި ކޮންމެހެން އޮންނަންޖެހޭ ލޭޔަރެއް ނޫންކަމަށް ޖުމްހޫރީ ޕާޓީގެ ލީޑަރު ވިދާޅުވިއެވެ.
ޤާސިމް އިބްރާހީމްގެ ޕޯސްޓް ނިންމާލައްވަމުން ވަނީ ދައުލަތުގެ ޚަރަދުތައް ކުޑަކުރުމުގެ ސަޔާސަތުގެ ދަށުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅަށް ޝުކުރު އަދާކުރައްވާފައެވެ.
