އިންޑިއާގައި އައިވީއެފް ހަދައިގެން 70 އަހަރުގެ އަންހެނަކު ވިހައިފި
އިންޑިއާގެ ގުޖުރާތަށް ނިސްބަތްވާ އަވަށެއް ކަމަށްވާ ކަޗްގައި 70 އަހަރުގެ އަންހެނަކު އައިވީއެފްގެ އެހީގައި ދަރިޔަކު ވިހައިފިއެވެ.
ޓައިމްސް އޮފް އިންޑިއާ އިން ރިޕޯޓްކޮށްފައިވާ ގޮތުގައި ޖިވޫބެން ރަބަރި ކިޔާ އެ އަންހެން މީހާއާއި އުމުރުން 75 އަހަރުގެ މަލްދަރީ ކިޔާ އޭނާގެ ފިރިމީހާ ކައިވެނިކޮށްގެން އުޅޭތާ 45 އަހަރަށް ވުރެ ގިނަ ދުވަސް ވެއްޖެއެވެ. ނަމަވެސް އެ ދެމަފިރިންނަށް ދުވަހަކު ވެސް ދަރިއަކު ނުލިބެއެވެ. ދަރިއަކު ހޯދަން ވަރަށް ބޭސް ވެސް ކުރިއެވެ.
އަންހެން މީހާ ދިން އިންޓަވިއުއެއްގައި އޭނާ ބުނީ، އައިވީއެފް ހަދައިގެން މިމަހުގެ 15ވަނަ ދުވަހު އޭނާ ވިހެއީ ފިރިހެން ކުއްޖެއް ކަމަށެވެ. އޭނާ އަތުގައި ރަސްމީ އައިޑީ ކާޑެއް ނެތް ނަމަވެސް، އުމުރުން 70 އަހަރު ވެދާނެ ކަމަށް އޭނާ ބުނެފައިވެއެވެ.
އަންހެން މީހާއަށް އައިވީއެފް ހަދައިދިން ޑރ. ނަރޭޝް ބާނުޝާލީ ބުނީ އެ އުމުރުގައި ބަނޑުބޮޑުވުމަކީ ވަރަށް ނާދިރު ހާލަތެއްގައި ނޫނީ ނުވާނެ ކަމެއް ކަމަށެވެ. އެ ދެ މަފިރިން ޑޮކްޓަރަށް ދައްކަން އައުމުން ވެސް އެކަން ނުވާނެ ކަމަށް އެންގި ކަމަށް އޭނާ ބުންޏެވެ. ނަމަވެސް އެ ދެމަފިރިން އާދޭސް ކުރާވަރުން، ދޭން ޖެހޭ ޓްރީޓްމެންޓްތައް ދިނުމަށްފަހު އައިވީއެފް ހެދީއެވެ.
މިއީ މިހާތަނަށް ފެނުނު އެންމެ އާދަޔާ ހިލާފު ވޭދަނަ ކަމަށް ވެސް އެ ޑޮކްޓަރު ބުންޏެވެ. ޖިވޫބެން ބަނޑުބޮޑުވުމުން ވަރަށް ބޮޑަށް ހައިރާންވި ކަމަށް ވެސް އޭނާ ބުންޏެވެ.
އެ ދެމަފިރިންނަށް ލިބުނު ދަރިފުޅުގެ ހާލު ރަނގަޅެވެ. އެތައް ދުވަހަކު ދުށް ހުވަފެން ހަގީގަތަކަށްވުމުން ދެމަފިރިން ވަނީ ވަރަށް ބޮޑަށް އުފާވާ ކަމަށް ބުނެފައެވެ.

