ލޯކަލް ކައުންސިލް އިންތިހާބުގައި ޕީއެންސީގެ ކެމްޕޭނު މެނޭޖަރަކީ ފަލާހު
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބުގައި، ސަރުކާރު ހިންގާ ޕީއެންސީގެ ކެމްޕެއިން މެނޭޖަރަކަށް، އެ ޕާޓީގެ ޕާލިމެންޓްރީ ގުރޫޕުގެ ލީޑަރު އިބްރާހިމް ފަލާހު ހަމަޖައްސައިފި އެވެ.
އިނގުރައިދޫ ދާއިރާގެ މެންބަރުކަން ކުރައްވާ ފަލާހު، ޕީއެންސީގެ ކެމްޕެއިން މެނޭޖަރު ކަމަށް ހަމަޖައްސާފައިވާކަން އެ ޕާޓީން ހާމަކުރީ އިއްޔެ އެވެ.
އަންނަ މާޗު މަހުގެ 28 ވަނަ ދުވަހު ބާއްވާ އެ އިންތިހާބުގައި ޕީއެންސީން ވާދަކުރާ ކެންޑިޑޭޓުން އަދި ކަނޑައަޅާފައެއް ނުވެ އެވެ. އިންތިހާބަށް ކުރިމަތިލާން އިލެކްޝަން ކޮމިޝަން (އީސީ) އިން ހުޅުވާލާނީ ޖެނުވަރީ މަހުގެ 17 ވަނަ ދުވަހު އެވެ.
އީސީން ވަނީ އިންތިހާބުގެ ތައްޔާރީތައް މިހާރު ފަށައިފަ އެވެ. އެގޮތުން މީހުން ހޭލުންތެރި ކުރުމުގެ މަސައްކަތް ފަށާފައިވާއިރު، 7000 އަށްވުރެ ގިނަ އޮފިޝަލުން ހޯދަން ވަނީ ހުޅުވާލައިފަ އެވެ.
މި ދެ އިންތިހާބަށް ނުކުންނެ ކެނޑިޑޭޓުން ކަނޑައެޅުމަށް ޕާޓީތަކުން ބާއްވާ ޕްރައިމަރީ އަދި އިއުލާނެއް ނުކުރެ އެވެ.
