އައްޑޫއާއި ހުވަދޫއާ ދެމެދު ސީޕްލޭން ގެ ޚިދުމަތް ފަށަނީ
އައްޑޫ ސިޓީ ގަން އިންޓަރނޭޝަނަލް އެއަރޕޯޓާއި، ހުވަދު އަތޮޅާ ދެމެދު ސީޕްލޭންގެ ޚިދުމަތް ފެށުމަށް މޯލްޑިވިއަން އާއި އައްޑޫ އިންޓަނޭޝަނަލް އެއާޕޯޓްސް ކޮމްޕެނީ ލިމިޓެޑާ ދެމެދު އެއްބަސްވުމެއްގައި ސޮއި ކޮށްފިއެވެ.
މޯލްޑިވިއަން އާއި އައްޑޫ އިންޓަނޭޝަނަލް އެއާޕޯޓްސް ކޮމްޕެނީ ލިމިޓެޑާ ދެމެދު މިއަދު ކުރެވުނު އެއްބަސްވުމުގައި ސޮއި ކުރެއްވީ އައްޑޫ އިންޓަރނޭޝަނަލް އެއަރޕޯޓުގެ މެނޭޖިންގ ޑިރެކްޓަރ ގައިސް ނަސީރާއި، އޭވިއޭޝަންގެ މެނޭޖިން ޑިރެކްޓަރު މުހައްމަދު ރިޒްވީއެވެ.
ގަން އެއަރޕޯޓުގައި ބޭއްވުނު މި ރަސްމިއްޔާތުގައި، ޓޫރިޒަމް މިނިސްޓަރު އަބްދުﷲ މައުސޫމް އާއި އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން އައްޑޫ އަދި ހުވަދޫ އަތޮޅު ތަމްސީލު ކުރައްވާ ރައްޔިތުންގެ މަޖިލިހުގެ މެމްބަރުން ވެސް ވަނީ ބައިވެރިވެ ވަޑައިގެންފައެވެ.
މި އެއްބަސް ވުމުގައި ސޮއި ކުރެވޭތާ މަހެއްހާ ދުވަހުގެ ތެރޭގައި ޚިދުމަތް ފެށުމަށް މަސައްކަތް ކުރައްވާނެ ކަމަށް ގައިސް ވަނީ މި ރަސްމިއްޔާތުގައި ވިދާޅުވެފައެވެ. އަދި މިކަމުގައި އިކޮނޮމިކް މިނިސްޓްރީގެ އިތުރުން ސަރުކާރުން ދެއްވި އެއްބާރުލުން ފާހަގަ ކުރައްވާ އެކަމަށް ގައިސް ވަނީ ޝުކުރު ވެސް އަދާ ކުރައްވާފައެވެ.
އައިލޭންޑް އޭވިއޭޝަންގެ މެނޭޖިންގ ޑިރެކްޓަރ ރިޒުވީ ވިދާޅުވީ، އެ ކުންފުންޏަކީ މިއަދާ ހަމައަށް ވެސް ރާއްޖޭގެ ފަތުރުވެރިކަން ފުޅާ ކުރުމަށްޓަކައި އެންމެ އިސް ރޯލެއް އަދާކުރާ ކުންފުނި ކަމަށެވެ.
އައްޑޫ ސިޓީ އާއި ހުވަދު އަތޮޅާއި ދެމެދު ފެށުމަށް ހަމަޖެހިފައިވާ މި ސީޕްލޭންގެ ޚިދުމަތް ފެށުމާއި އެކު އެ އަތޮޅަށް ޒިޔާރަތް ކުރާ ފަތުރުވެރިން އިތުރުވެގެންދާނެ ކަމަށާ މީގެ އިތުރުން ރިސޯޓުތަކުގައި މަސައްކަތް ކުރާ މުވައްޒަފުންނަށް ވެސް ބޮޑެތި ލުއި ތަކެއް ލިބިގެން ދާނެ ކަމަށް ސަރުކާރުން އުއްމީދު ކުރައްވައެވެ.
