ދިފާއީ ބާރުގެ ގާބިލިއްޔަތު އިތުރުކުރަން އާ ވަސީލަތްތައް ގާއިމްކޮށްދޭނަން: ރައީސް
ގައުމީ ދިފާއީ ބާރު ވަރުގަދަކޮށް، ގާބިލްކަން އިތުރުކުރުމަށް މިއަހަރުވެސް ގިނަ ވަސީލަތްތަކެއް ގާއިމްކޮށް، ގިނަ މަސައްކަތްތަކެއް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލީސް މިއަހަރަށް ހުޅުމުގެ ގޮތުން ބޭއްވި ޖަލްސާގައި ރިޔާސީ ބަޔާން އިއްވަމުން ރައީސް ވަނީ ދިފާއީ ބާރު ވަރުގަދަކުރުމަށް ކުރަމުންދާ ގިނަ ކަންކަން ފާހަގަކުރައްވާފައެވެ.
އެގޮތުން އޭގެ އެއް މަސައްކަތެއްގެ ގޮތުން ފާހަގަކުރެއްވީ އެމްއެންޑީއެފްގެ ފުރަތަމަ އެއާ ސްޓޭޝަން މިދިޔަ އަހަރު އައްޑޫ ސިޓީގައި ގާއިމްކޮށްފައިވުމެވެ. އަދި އުތުރުގައި ގާއިމްކުރާ މިފަދަ ދެވަނަ ސްޓޭޝަން ށ. ފުނަދޫގައި އަޅަމުންދާއިރު، މިއަހަރު އެތަން އޮޕަރޭޝަނަށް ގެނެވޭނެކަން ރައީސް ފާހަގަކުރެއްވިއެވެ.
އޭގެއިތުރުން، ކޯސްޓްގާޑުގެ ހިދުމަތް ދެގުނަ ކުރުމަށް ތުރުކީވިލާތުގެ ހިލޭ އެހީގެ ދަށުން ސިފައިންގެ ހިދުމަތަށް މިހާތަނަށް ތައާރަފްކުރި އެންމެ ބޮޑު އުޅަނދު މިދިޔަ އަހަރު ތައާރަފްކޮށްފައިވާކަން ރައީސް ފާހަގަކުރެއްވިއެވެ.
ރައީސް ވިދާޅުވީ ސިފައިން ހިންގާ މެރިޓައިމް އޮޕަރޭޝަންތަކާއި ސާޗް އެންޑް ރެސްކިއު އޮޕަރޭޝަންތަކަށް ބޭނުންވާ އިންސްޕެކްޓް ކްރާފްޓް ހޯދުމުގެ މަސައްކަތް ފަށާއި، އޭގެތެރެއިން 3 އުޅަނދެއް މިހާރު ހިދުމަތަށް ނެރެފައިވާ ކަމަށެވެ. އަދި މިއަހަރު އެފަދަ 17 އުޅަނދު ހިދުމަތަށް ނެރޭނެ ކަމަށެވެ.
އޭގެއިތުރުންވެސް ޖަޕާން ސަރުކާރުގެ އެހީގައި 2 ހާބަ ކްރާފްޓް ޕެޓްރޯލް ވެސެލް ހޯދަން ނިންމާފައިވާ ކަމަށާއި، ރާއްޖޭގެ ހާއްސަ އިގްތިސޯދީ ސަރަހައްދު ބެލެހެއްޓުމަށް އޮސްޓްރޭލިއާ ސަރުކާރުގެ އެހީގައި ހޯދާ މަނަވަރު މިއަހަރު ހިދުމަތަށް ނެރޭނެ ކަމަށްވެސް ރައީސް ވިދާޅުވިއެވެ.
އަދި، މިދިޔަ އަހަރު އެމްއެންޑީއެފްގެ މެރިންކޯއަށް އެންމެ ޒަމާނީ ވަސީލަތްތައް ހޯދާފައިވާ ކަމަށާއި، މިއަހަރުވެސް އެ ހިދުމަތުގެ ގާބިލުކަން އިތުރުކުރުމަށް ގިނަ ވަސީލަތްތަކެއް ހޯދާނެކަން ރައީސް ފާހަގަކުރެއްވިއެވެ.
އިތުރަށް އެމަނިކުފާނު ވިދާޅުވެފައިވަނީ ސިފައިންގެ ތަމްރީނާއި ގާބިލްކަން އިތުރުކުރުމަށްވެސް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. ސިފައިންގެ ތަމްރީނަށް ޒަމާނީ ބޮޑެތި ބަދަލުތަކެއް ގެންނަންޖެހޭ ކަމަށާއި އެ މަސައްކަތް ސަރުކާރުން ކުރަމުންދާކަމަށް ވިދާޅުވެފައިވެއެވެ.
Ads by STO
