މިސަރުކާރުގައި ސިފައިން މަޖިލީހަށް ވައްދާނެކަމަކަށް އަޅުގަނޑު ގަބޫލެއްނުކުރަން: ނަޝީދު
ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުގައި ރައްޔިތުން މަޖިލީހަށް، ސިފައިން ވައްދާނެކަމަށް ގަބޫލު ނުކުރައްވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ތިންވަނަ ދައުރު ފެށިގެން މިހާތަނަށް ދެ ޖަލްސާއެއް ކުރިއަށް ގެންދެވިފައިވާއިރު، މިއަދުގެ ޖަލްސާއަކި ތިންވަނަ ދައުރުގައި ރައީސް ނަޝީދު ބައިވެރިވެ ވަޑައިގަންނެވި ފުރަތަމަ ޖަލްސާއެވެ. ކުރިން ބޭއްވުނު ޖަލްސާގައި ރައީސް ނަޝީދު ހުންނެވީ ރާއްޖެއިން ބޭރަށް ކުރެއްވި ނުރަސްމީ ދަތުރުފުޅަކާއި ގުޅިގެން ކަރަންޓީނުގައެވެ.
ރައީސް އިބްރާހިމް މުހައްމަދު ޞާލިހު ވެސް އަދި ޑިފެންސް މިނިސްޓަރު މާރިޔާ މުހައްމަދު ދީދީ ވެސް ރައްޔިތުންގެ މަޖިލީހަށް ސިފައިން ނުވައްދަވާނެ ކަން ނަޝީދު ވިދާޅުވީ، ނައިފަރު ދާއިރާގެ މެންބަރު އަހުމަދު ޝިޔާމް ނެންގެވި ކުއްލި މައްސަލަ އަކަށް އިޝާރަތްކޮށެވެ.
މެމްބަރު ޝިޔާމް ނެންގެވި ކުއްލި މައްސަލާގައި ވަނީ، މިހާރު މަޖިލީހުގެ މައްސަލަތައް ކުރިއަށް ގެންދިއުމުގެ ބޭނުމެއް ނެތް ކަމަށާއި، މަޖިލީހުން އަންނަނީ ޑިމޮކްރަސީގައި ފަހަތަށް ފިޔަވަޅު އަޅަމުން ކަމަށެވެ. އަދި މި ވެރިކަން އޮތްހާ ހިނދަކު މަޖިލިސް ބަންދު ކޮށްފައި ބެހެއްޓުމަށް ވެސް ޝިޔާމްގެ ކުއްލި މައްސަލާގައި ވެއެވެ.
