ތިމަރަފުށީ ކައުންސިލް އިންތިޚާބުގެ ނަތީޖާއާ މެދު ސުވާލު އުފައްދައި، ވޯޓު އަލުން ގުނުމަށް ހައިކޯޓަށް ހުށަހަޅައިފި
ތ. ތިމަރަފުށީ ކައުންސިލް އިންތިޚާބުގެ ވޯޓު އަލުން ގުނުމަށް އެދި ހައިކޯޓަށް މައްސަލައެއް ހުށަހަޅައިފިއެވެ.
މި މައްސަލަ ހުށަހެޅި ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކެންޑިޑޭޓް މުޙައްމަދު އިމާދުގެ ވަކީލުން ޝަރީޢަތުގެ މަޖިލީހުގައި ފާހަގަކުރެއްވި ގޮތުގައި، ވޯޓުލާ މަރުކަޒުގައި ފުރަތަމަ އިއްވި ނަތީޖާއާއި އިލެކްޝަންސް ކޮމިޝަނުން ފަހުން ޢާންމުކުރި ރަސްމީ ނަތީޖާއާ ދެމެދު ބޮޑެތި ތަފާތުތަކެއް ހުރިކަން ވަނީ ފާހަގަކުރެވިފައެވެ. އެހެންކަމުން، އިންސާފުވެރިކަން ކަށަވަރުކުރުމުގެ ގޮތުން މުޅި އިންތިޚާބު އަލުން ބޭއްވުމަށް ނުވަތަ މައްސަލަ އުފެދިފައިވާ ފޮށީގެ ވޯޓުކަރުދާސްތައް އަލުން ގުނުމަށް ވަނީ އެދިފައެވެ.
މި ކަމާ ގުޅިގެން އިލެކްޝަންސް ކޮމިޝަނުން ކޯޓުގައި ދިފާޢުގައި ބުނެފައި ވަނީ، ނަތީޖާގައި ފަރަގެއް އުޅޭކަމަށް ދައްކަނީ ފުރަތަމަ ނަތީޖާ އެއްކުރިއިރު އެއް ނަތީޖާ ޝީޓު އުނިވެފައި އޮތުމުން ކަމަށެވެ. އަދި އެ ޝީޓުގެ މަޢުލޫމާތު ހިމެނުމުން ޖުމްލަ ނަތީޖާ ރަނގަޅަށް ދިމާވާނެކަމުގެ ޔަޤީންކަން އެ ކޮމިޝަނުން ދީފައިވެއެވެ. ރަސްމީ ނަތީޖާ ދައްކާ ގޮތުން މި އިންތިޚާބުގައި ތިމަރަފުށީ ކައުންސިލްގެ ގޮނޑިތައް ކާމިޔާބުކޮށްފައި ވަނީ ޕީއެންސީގެ ކެންޑިޑޭޓް އަޙްމަދު ޔާމީނާއި އެމްޑީޕީގެ ކެންޑިޑޭޓް ޢަލީ ޝާހެވެ.
ހައިކޯޓުގައި މިހާރު ވަނީ މި މައްސަލައިގެ އަޑުއެހުންތައް ފަށާފައެވެ. އިސްފަނޑިޔާރު ޢަބްދުﷲ ޖަމީލް މޫސާއާއި، ފަނޑިޔާރު ޙުސައިން މަޒީދު އަޙްމަދުގެ އިތުރުން ފަނޑިޔާރު ޢަބްދުލްމާނިއު ޙުސައިން ހިމެނިވަޑައިގަންނަވާ ބެންޗުން ބައްލަވާ މި މައްސަލައިގައި އިތުރު ކަމެއް ސާފުކުރަން ނުޖެހޭނަމަ، ދެން އޮންނާނީ މައްސަލައިގެ ޙުކުމް އިއްވުންކަމަށް ކޯޓުން ވަނީ ހާމަކޮށްފައެވެ.
