އެމްޑީޕީއަކީ އޮޅިފައި އޮތް ކަންވާރު ބޮޅެއް، ޕީއެންސީގެ ސަފުތައް އޮތީ ބަދަހިކޮށް: ޑރ. ޚަލީލް

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަކީ އޮޅިފައި އޮތް ކަންވާރުބޮޅެއް ކަމަށާއި ޕީއެންސީއަކީ އެމްޑީޕީ ފަދައިން އެތެރޭގެ މައްސަލަތައް ބޮޑުވެ ބައިބައިވެފައިވާ ޕާޓީއެއް ނޫންކަމަށް ކުރީގެ ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ސަރުކާރު ހިންގާ މައި ޕާޓީ ކަމަށްވާ ޕީއެންސީގެ އެތެރޭގައި ބޮޑެތި ޚިޔާލުތަފާތުވުންތަކެއް އުފެދިފައިވާކަމަށް ސިފަކުރައްވައި ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަކީ ހަގީގަތާ ހިލާފު ކުށްހީއެއްކަން ފާހަގަކުރައްވަމުން، ޑރ. ޚަލީލް ވިދާޅުވީ ޕީއެންސީގެ ސަފުތައް ކުރިއަށް އޮތް ތަނުގައިވެސް ދާނީ އިތުރަށް ބަދަހިވެ ވަރުގަދަވަމުން ކަމަށެވެ.

މީގެ އިތުރުން، އެމަނިކުފާނު ވަނީ ޕީއެންސީގެ މައިގަނޑު އަސާސްތަކާއި އަމާޒުތަކުގެ މައްޗަށް އަލިއަޅުއްވާލައްވާފައެވެ. އެގޮތުން، އެ ޕާޓީއަކީ ރާއްޖޭގެ މިނިވަންކަމާއި އިސްތިގުލާލަށް އެންމެ އިސްކަންދޭ، އަދި ދިވެހި ރައްޔިތުންނާއި ގައުމުގެ މަސްލަހަތު ކުރިއެރުވުމަށް މަސައްކަތްކުރާ ސިޔާސީ ފިކުރުކަމަށް ވިދާޅުވިއެވެ.

ރާއްޖެ މިހާރު ވެއްޓިފައިވާ ދަރަނީގެ އަނދަވަޅުން ސަލާމަތްކޮށް، އިގުތިސާދީ ގޮތުން ގައުމު އާ މިސްރާބަކަށް ގެންދިއުމަކީ ސަރުކާރުގެ އެންމެ ބޮޑު އެއް އަމާޒުކަން ޑރ. ޚަލީލްގެ ވާހަކަފުޅުގައި ފާހަގަކުރެއްވިއެވެ. އަދި އުމްރާނީ ތަރައްގީގެ އިތުރުން ފަރުދުންގެ ފުދުންތެރިކަން އިތުރުކުރުމަށް ޕީއެންސީން ހާއްސަ ސަމާލުކަމެއް ދޭކަން ވެސް އެމަނިކުފާނު ހާމަކުރެއްވިއެވެ.

ނިންމަވާލައްވަމުން ޑރ. ޚަލީލް ތަކުރާރުކުރެއްވީ، އެމްޑީޕީގެ އެތެރެ ގަޑުބަޑުވެފައި އޮތް ނަމަވެސް، ޕީއެންސީގެ މިސްރާބާއި ސިޔާސަތުތައް ވަރަށް ސާފު ކަމަށެވެ. އަދި ޕާޓީގެ ލީޑަރޝިޕާއި އާންމު މެމްބަރުން ތިބީ ގައުމުގެ ކުރިއެރުމަށްޓަކައި އެއްބައިވަންތަކަމާ އެކު ގުޅިގެން މަސައްކަތްކުރުމަށް ސާބިތުވެކަމަށް ވެސް އެމަނިކުފާނު ވިދާޅުވިއެވެ.