އިންޑިއާ އާއި މޮލްޑޯވާއިން އދ. ގެ ސަލާމަތީ މަޖިލީހަށް ބަދަލުގެނައުމާއި ޓެރަރިޒަމާ ދެކޮޅަށް މަސައްކަތްކުރުމަށް މަޝްވަރާކޮށްފި

އިންޑިއާގެ ރައީސް ދްރައުޕަދީ މުރުމޫ މޮލްޑޯވާގެ ވެރިރަށް ކިޝިނޯއަށް ކުރައްވަމުން ގެންދަވާ ފުރަމާނަ ދަތުރުފުޅުގައި، އދ. ގެ ސަލާމަތީ މަޖިލީހަށް އިސްލާހު ގެނައުމާއި، ޓެރަރިޒަމާ ދެކޮޅަށް ގުޅިގެން މަސައްކަތްކުރުމާ ގުޅޭގޮތުން ދެ ގައުމުގެ ދެމެދުގައި މަޝްވަރާކުރައްވައިފިއެވެ. 1992 ވަނަ އަހަރު ދެ ގައުމުގެ ދެމެދުގައި ޚާރިޖީ ގުޅުން ގާއިމުކުރި ފަހުން މިއީ އިންޑިއާގެ އެންމެ އިސްވެރިއަކު މޮލްޑޯވާއަށް ވަޑައިގެންނެވި ފުރަތަމަ ފަހަރެވެ.

މޮލްޑޯވާގެ ރައީސް މާޔާ ސަންޑޫއާއެކު ބޭއްވެވި ރަސްމީ ބައްދަލުވުމުގައި، ވިޔަފާރިއާއި އިންވެސްޓްމަންޓް، ޑިޖިޓަލް ޓްރާންސްފޯމޭޝަން، އިންފޮމޭޝަން ޓެކްނޮލޮޖީ، ސިއްހީ ދާއިރާ، ބޭސްވެރިކަން، ދަނޑުވެރިކަން، ތައުލީމު، ސަގާފަތް އަދި އިންސާނީ ވަސީލަތް ތަރައްގީކުރުމުގެ ރޮނގުން ގުޅުން ބަދަހިކުރުމާ ގުޅޭގޮތުން ދެ ލީޑަރުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.

އިންޑިއާގެ މިނިސްޓްރީ އޮފް އެކްސްޓާނަލް އެފެއާޒް (އެމްއީއޭ) ގެ ސެކްރެޓަރީ (ވެސްޓް) ސިބީ ޖޯޖް ނޫސްވެރިންނަށް މައުލޫމާތު ދެއްވަމުން ވިދާޅުވީ، ޓެރަރިޒަމާ ދެކޮޅަށް މަސައްކަތްކުރުމުގައި އެއްބާރުލުން ދިނުމާ ގުޅޭގޮތުން ދެ ލީޑަރުން ވާހަކަފުޅުދެއްކެވި ކަމަށެވެ. އަދި އދ. ގެ ސަލާމަތީ މަޖިލިސް ހިމެނޭ ގޮތަށް ބައިނަލްއަގުވާމީ ޖަމިއްޔާތަކަށް އިސްލާހު ގެނައުމުގެ މުހިންމުކަމާ މެދު ދެ ފަރާތުން ވެސް ޚިޔާލު ބަދަލުކުރެއްވި ކަމަށް އޭނާ ވިދާޅުވިއެވެ.

އެކުވެރިކަމުގެ ޚާއްސަ ރަމްޒެއްގެ ގޮތުން، ރައީސް މުރުމޫ ވަނީ މޮލްޑޯވާގެ ރައީސް ސަންޑޫއަށް މަހާތުމާ ގާނދީގެ ބުސްޓެއް (ކޮނޑާ ހަމައަށް ހަދާފައިވާ ބިނާއެއް) ހަދިޔާކުރައްވާފައެވެ. އަދި މޮލްޑޯވާގެ ތާރީޚީ ގައުމީ ބަތަލެއް ކަމަށްވާ ސްޓެފަން ދަ ގްރޭޓް (ސްޓެފަން ސެލް މާރޭ ސީ ސްފަންޓް) ގެ ހަނދާނީ ބިނާއަށް ރައީސް މުރުމޫ ވަނީ މާބޮނޑިއެއް ވެދުންކުރައްވާފައެވެ.

މި ދަތުރުފުޅުގެ ތެރެއިން، މޮލްޑޯވާގެ ގާނޫނުހަދާ މަޖިލީހުގެ ރައީސް އީގޯރ ގްރޯސޫއާ ބައްދަލުކުރައްވައި، އިންޑިއާ-މޮލްޑޯވާ ޕާލަމެންޓަރީ ފްރެންޑްޝިޕް ގްރޫޕުގެ މެންބަރުންނާ ވެސް ރައީސް މުރުމޫ ވަނީ ބައްދަލުކުރައްވާފައެވެ.

ފަރަންސޭސިވިލާތާއި ޖަރުމަނުވިލާތް ފަދަ ހުޅަނގުގެ ބޮޑެތި ބާރުތަކުގެ އިތުރުން ޔޫރަޕްގެ އެހެން ގައުމުތަކާ ގުޅުން ބަދަހިކުރުމަށް އިންޑިއާއިން ކުރަމުންދާ މަސައްކަތުގެ ދަށުން، ރައީސް މުރުމޫ ކުރިއަށް އޮތް ދުވަސްތަކުގައި ނޯތު މެސެޑޯނިއާ އަދި ރޫމޭނިއާއަށް ވެސް ވަޑައިގަންނަވާނެއެވެ.

މީގެ އިތުރުން، ދެ ގައުމުގެ ރައީސުން ވަނީ އިންޑިއާ-މޮލްޑޯވާ ބިޒްނަސް ފޯރަމްގައި ބައިވެރިވެވަޑައިގެން ތަގުރީރުކުރައްވާފައެވެ. މި ފޯރަމްގައި ދެ ގައުމުގެ ވިޔަފާރިވެރިން ވަނީ ވިޔަފާރިއާއި އިންވެސްޓްމަންޓް އަދި ޓެކްނޮލޮޖީގެ ދާއިރާއިން ހުރި އައު ފުރުސަތުތައް ދެނެގަނެފައެވެ. އިންޑިއާގެ ޚާރިޖީ ވުޒާރާއިން ބުނި ގޮތުގައި، ޑިޖިޓަލް ޕަބްލިކް އިންފްރާސްޓްރަކްޗަރާއި އިންޮވޭޝަން، ފުޑް ޕްރޮސެސިންގ، ލޮޖިސްޓިކްސް އަދި ހުނަރު ތަރައްގީކުރުމުގެ ރޮނގުން ގުޅުން ބަދަހިކޮށް، ދެ ފަރާތަށް ފައިދާހުރި އިންވެސްޓްމަންޓްތަކާއި ވަޒީފާގެ ފުރުސަތުތައް ފަހިކުރުމަށް ދެ ގައުމުން އަންނަނީ މަސައްކަތްކުރަމުންނެވެ.

އިންޑިއާއިން މޮލްޑޯވާއަށް ދިޔަ 20 މެންބަރުންގެ ވިޔަފާރި ވަފުދުގައި އެގްރިޓެކް، އައިޓީ، ކޮންސަލްޓިންގ، ދިފާއީ، އީ-ކޮމާސް، އެކްސްޕޯޓް، އިންޖިނިއަރިންގ، އިމާރާތްކުރުން، ހޮސްޕިޓާލިޓީ، އެޗްއާރު، މެނުފެކްޗަރިންގ، ފާމަސޫޓިކަލްސް އަދި ސިއްހީ ދާއިރާ ފަދަ އެކި ދާއިރާތަކުގެ މަންދޫބުން ހިމެނެއެވެ. މީގެ އިތުރުން، މިހާރު ވެސް އިންޑިއާގެ ގާތްގަނޑަކަށް 2،000 ދަރިވަރުން މޮލްޑޯވާގައި މަތީ ތައުލީމު، ޚާއްސަކޮށް މެޑިކަލް ދާއިރާއިން ހާސިލުކުރަމުންދެއެވެ. މި ދަތުރުފުޅުގައި، ރައީސް ސަންޑޫއަށް ފަސޭހަފުޅު ވަގުތެއްގައި އިންޑިއާއަށް ވަޑައިގަތުމަށް ރައީސް މުރުމޫ ވަނީ ދައުވަތު އަރުވާފައެވެ.