އަދީބު މިހާރު ކުރައްވާ މަސައްކަތަކީ ޤައުމީ މަސައްކަތެއް: އަހުމަދު ހަލީމް
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ބޮޑު ޚިޔާނާތަށް އިއުތިރާފުވެ ވަޑައިގެން މިހާރު 20 އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ނައިބު ރައީސް އަހުމަދު އަދީބު، މިހާރު އެކުރައްވަމުން ގެންދަވަނީ ޤައުމީ މަސައްކަތެއް ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް ހަލީމް) ވިދާޅުވެއްޖެއެވެ.
މެންބަރު ހަލީމް މިފަދައިން ވިދާޅުވެފައި ވަނީ ނުހައްގު މުއްސަނދިކަން ކުށަކަށް ހެދުމަށް ގާނޫނުލްއުގޫބާތަށް ހުށަހަޅާފައިވާ އިސްލާހުގެ އިބްތިދާއީ ބަހުސް މަރުހަލާގައި މިއަދު ވާހަކަ ދައްކަވަމުންނެވެ.
އެގޮތުން ހަލީމް ވިދާޅުވީ އެމްއެމްޕީއާރުސީ ވައްކަމުގެ މައްސަލަތައް ނުބެލޭ ކަމަށް ބަޔަކު ކިޔަމުން ދިޔަ ނަމަވެސް މި ސަރުކާރުން އެމައްސަލަ ބަލައި ކާމިޔާބު ކޮށްފި ކަމަށެވެ.
"މިއަދު އަހުމަދު އަދީބު އެކުރައްވާ ކަމަކީ ގައުމީ މަސައްކަތެއް. މިއަދު އަދީބު ގޭގައި ބަހައްޓައިގެން އަދީބަށް ބޭސްކޮށްދީގެން ވެސް އަދީބުގެ ފުރާނަ ސަލާމަތް ކޮށްގެން އަދީބު ލައްވާ އަޅުގަނޑުމެން ހުރިހާ އެއްޗެއް ނެރުވަން ޖެހޭ. އެމަނިކުފާނު ހުރީ މި ރާއްޖެއަށް ޓަކައި ހުރިހާ ވާހަކައެއް ދައްކަން. އަދީބު އަމިއްލަޔަށް އަދީބަށް ކުރެވުނު ކުށަށް މާފަށް އެދި އެދަނީ ހުރިހާ ވާހަކައެއް ކިޔައިދެމުން." މެމްބަރު އަހުމަދު ހަލީމް ވިދާޅުވެފައިވެއެވެ.
Ads by STO
