ތިބާގެ މައްޗަށް އެހެންމީހަކު އިޚްތިޔާރު ކުރުމުން އެކަމާ ތިބާ ދެރަނުވާށެވެ. އެހެނީ ރާމާމަކުނަށް ދޮންކޭލަށް ވުރެ ފޮނި އެއްޗެއް ނުވާނެކަން ވިސްނައިދޭނީ ވެސް ކިހިނެއްހެއްޔެވެ؟
ދުނިޔެއަށް ތިބާ އަންނަނީ އެކަންޏެވެ. އަދި ދުނިޔެއިން ތިބާ ދާނީވެސް އެކަނިމާ އެކަންޏެވެ. މީހަކަށް ބަރޯސާވެގެން ކުރެވޭނެ ކަންކަން ބައިވަރެވެ. އެހެންނަމަވެސް އޭގެން ލިބޭނެ ވަކި ފައިދާއަކީ ކޮބާހެއްޔެވެ؟ އެންމެ ފަހުވަގުތުގައި ވެސް ތިބާވާނީ އެކަނިވެރިއަކަށެވެ. މިއީ ދުނިޔަވީ ހަގީގަތެވެ.
ކޮންމެ މީހަކީވެސް ގާތް މީހެކެވެ. އެހެން މީހުނަށްވުރެ މާ ގާތް ކޮށް ގެންގުޅުމަކީ ފަހުން މާބޮޑަށް ދެރަވާން ޖެހޭނެ ކަމެއް ކަމަށް ވަރަށް ގިނަ މީހުން ބުނެއެވެ. އެހެން ނަމަވެސް އަޅުގަނޑު މިކަމާމެދު ގަބޫލެއްނޫނެވެ. އެހެނީ ރައްޓެހިންނަކީ ވެސް އެގޮތުން ދޫކޮށްލަން ތިބޭ ބައެއް ހެއްޔެވެ؟ އެއްވެސް ޙާލެއްގައި އެ ރަހުމަތްތެރިޔާ އަނެކާއަށް ބޭވަފާތެރި ނުވާހާ ހިނދަކު ތިބާ އެކަމާމެދު ރޯކަށް ނުޖެހޭނެއެވެ. ދެމީހުންގެ ވިސްނުމާއި ފިކުރު އެއްގޮތް ވެ އެއްކޮށް މައްސަލަތައް ހައްލުކޮށް އުޅެވޭނަމަ އެ އެކުވެރިކަމަކީ ފަހުން އެކަމާ މެދު ހިތާމަ ކުރަންޖެހޭނެ ކަމެއް ނޫނެވެ.
ތިބާޣެ މައްޗަށް އެހެންމީހަކު ނެގުމަކީ ފަހަރުގައި ތިބާ ދެރަވެދާނެ ކަމެކެވެ. އެހެންނަމަވެސް އެކަން ތިބާ އެހެންމީހުނަށް ނުދައްކާށެވެ. އެފަދަ ކަންކަމަށް ކެތްކުރަން ދަސްކުރާށެވެ. އެހެނީ އެފަދަ ކަންކަމަށް ކެތްކުރަން ދަސްކުރަމަކީ، ފަހުން ތިބާގެ ދިރިއުޅުމަށް އައިސްދާނެ ކޮޅިގަނޑަކާއި ތިބާ އެކަނިމާއެކަނި ކުރިމަތިލާން ލިބޭ އިތުރު ހިތްވަރަކަށް ވެގެން ދާނެއެވެ. އަބަދުވެސް ތިބާ އެކަނިވެރިވެދާނޭ ކަމަށް މާބޮޑަށް މީހަކާއި ދުރުނުވާށެވެ. އަދި މީހަކާއި މާބޮޑަށް ގާތްވެވުމަކީ ފަހުން އެކަމާ ހިތާމަ ކުރަން ޖެހޭނެ ކަމެއް ކަމުގައި ނުވިސްނާށެވެ.
އަނެކާގެ ދިރިއުޅުމުގައި ކުރިމަތިވާ ބައެއް ކަންކަމުގެ ސަބަބުން ދިރިއުޅުމުގައި ކުރަމުން އަންނަ އުއްމީދުތައް ފުނޑުފުނޑުވެއެވެ. އެ އުއްމީދުތައް އަލުން ހާސިލު ކުރުމަށް އެހީތެރިވުމަށްޓަކައި އެއަންނަ ގާތް ރަޙުމަތްތެރިއަކީ ހެޔޮ ރަޙުމަތެއްކަމުގައި ދެކޭށެވެ. އެ އެކުވެރިޔާ އަބަދުވެސް ތިބާއާއިއެކު ހުންނަކަމީ ވެސް ޚުދު ތިބާ މިއަދު އުފާކުރަންޖެހޭ ކަމެކެވެ. އެއްބައި މީހުނަށް އެމީހުންގެ ރަހުމަތްތެރިން ގެއްލިފައިވަނީ ވަރަށްވެސް ހިތިކޮށެވެ. އަދި އަނެއްބައި ރަހުމަތްތެރިންނަށް ގެއްލިފައިވާ ރަހުމަތްތެރިން ލިބިފައިވަނީ ވަރަށް ވެސް މަސައްކަތުންނެވެ.
އެފަދަ ރަހުމަތްތެރިންނަކީ ދޫކޮށް ގޮސްދާނެތީ ތިބާގެ އެކުވެރިކަމާއިިމެދު ވިސްނާފައި އެކަމާ ފިކުރުކުރާ ރަހުމަތްތެރިންނެވެ. އަދި އެ އެކުވެރިކަން ދެމެހެއްޓުމަށްޓަކައި ގަދައަޅައި މަސައްކަތް ކުރާ ބައެކެވެ. ދުވަހަކުވެސް އެފަދަ ރަހުމަތްތެރިޔާ ދޫނުކޮށްލާށެވެ. މިއީ ނަސޭހަތެކެވެ.
