މި ގަބޫލުކުރުންތައް ގެންގުޅޭނަމަ މުޅި އުމުރަށް ވެސް "ސިންގަލް" ކޮށް ހުންނަން ޖެހިދާނެ!
ހުސްހަށިބަަޔަށް ހުރުމަކީ ބައެއް ފަހަރަށް ވަރަށް ފައިދާހުރި ކަމެކެވެ. ނަމަވެސް ބައެއް ފަހަރަށް ހުސްހަށިބައިކޮށް ހުންނަ ނަމަ ތިބާ އަކީ އެކަނިވެރިއެއް ކަމަށް ހީވާ ފަހަރު ވެސް އާދެއެވެ. ތިބާގެ ދިރިއުޅުމުގައި ވާ ކަންތައްތައް އެއްވެސް ޖެހިލުމެއް ނެތި ހިއްސާ ކޮށްލާނެ ބައިވެރިއަކު ބޭނުންވާނެ ކަން ޔަގީނެވެ. އަދި އުފަލާއި ހިތާމައިގައިވެސް ތިބާއަށް ޓަކައި ހުންނާނެ ލޯބިވެރިއަކު ކޮންމެ މީހަކުވެސް ބޭނުން ވާނެއެވެ.
ތެދެކެވެ. ކޮންމެ މީހަކުވެސް ހަޔާތުގެ ބައިވެރި އެއް ބޭނުންވާނެއެވެ. އެކުގައި ދިރިއުޅުން ހިއްސާ ކުރާނޭ މަދަދުވެރި ވަފާތެރިއަކު ބޭނުންވާނެއެވެ. މުޅި އުމުރު ދުވަހު "ސިންގަލް" ކޮށް ހުންނާކަށް އެކަކުވެސް ބޭނުން ނުވާނެ ކަން ޔަގީނެވެ. އެހެން ނަމަވެސް ބައެއް މީހުންގެ ހުންނަ ސިފަތަކެއްގެ ސަބަބުން ހަޔާތުގެ ބައިވެރިއެއް ހޯދުމަކީ ވަރަށް އުނދަގޫ ކަމެކެވެ.
1- އަމިއްލަ ކުށް ގަބޫލު ނުކުރުން
ކޮންމެ އިންސާނަކީ ކުށް ކުރެވޭނެ މީހެކެވެ. އެހެނީ ކުށް ކުރުމަކީ އިންސާނާގެ ތަބީއަތަކަށް ވާތީއެވެ. ބައެއް ފަހަރު ނޭނގުމެއްގެ ތެރޭގައިވެސް މީހަކަށް ކުށެއް ކުރެވިދާނެއެވެ. އަދި އަނެއްބައި ފަހަރަށް އެނގިހުރެވެސް ބައެއް މީހުން ކުށްތަކަށް އަރައިގަނެއެވެ. ނަމަވެސް ތިމަންނާއަށް ކުށެއް ކުރެވިއްޖެކަން އެނގިއްޖެ ނަމަ އެކުށް ތަކުރާރު ނުކުރުމަކީ އެންމެ ރަނގަޅު ގޮތެވެ. އަދި ކުށެއް ކުރެވިއްޖެ ނަމަ އެކަމަކަށް ތިބާގެ ބައިވެރިޔާގެ ގާތުން މާފަށް އެދެން ވާނެއެވެ. އަދި ދެވަނަ ފަހަރަށް އެކުށް ތަކުރާރު ނުވާނެ ކަމުގެ ޔަގީންކަން ވެސް ދޭން ވާނެއެވެ. ނަމަވެސް އެކަން ކުރުމަށް ޓަކައި އެންމެ ފުރަތަމަ ކަމަކަށް ތިބާއަށް ކުރެވުނީ ކުށެއް ކަން ތިބާ ގަބޫލު ކުރަން ޖެހެއެވެ.
2- ބައިވެރިއަކު އިޚްތިޔާރު ކުރުމުގައި މާ ގިނަ ކަންކަމަށް ރިޢާޔަތް ކުރުން
ކޮންމެ މީހަކުވެސް ދިރިއުޅުން ހޭދަކުރުމަށް ބައިވެރިއަކު އިޚްތިޔާރު ކުރާއިރު އެމީހެއްގެ ގައިގައި ވަކި ހާއްސަ ސިފަތަކެއް ހުރިތޯ ބަލާނެކަން ޔަގީނެވެ. އަދި އެކި މީހުން ބޭނުންވާނީ އެކި މިޒާޖުގެ މީހުންނެވެ. އަދި އެކި މީހުންނަށް ރީތި ވާނީ އެކި މީހުންނެވެ.
ބައެއް ފަހަރަށް އެކަންކަމަކީ ފަހުން ބަދަލުވެސް ވެދާނެ ކަންކަމެވެ. އިންސާނާގެ ހިތަކީ ފާޑެއްގެ އެއްޗެއް ވިއްޔާއެވެ. ދެއިރު ދެ ދަޅައަށް ބައިވެރިޔާ ބަދަލު ކުރާ މީހުންވެސް މަދެއް ނޫން ވިއްޔާއެވެ. ގިނަ ފަހަރަށް "ސިންގަލް" ކޮށް ހުންނައިރު ތިބާ ބޭނުންވަނީ ކޮންކަހަލަ މީހެއް ތޯ ސުވާލު ކުރުމުން ދޭ ޖަވާބާއި، އެންމެ ފަހުން ތިބާ ކައިވެނި ކުރާ މީހެއްގެ ސިފަތަކާ އަޅާކިޔާއިރު ހާސްބައި ތަފާތުވެސް ވެދާނެއެވެ.
އެހެންކަމުން، އެންމެ ފުރިހަމަ މީހާ ހޯދަން މަސައްކަތް ކުރާ ކަމުގައި ވަނީ ނަމަ ތިބާ އަބަދުގެ އަބަދަށް "ސިންގަލް" ކޮށް ހުންނަން ޖެހިދާނެއެވެ. އެންމެ ފުރިހަމަ މީހެއް ހޯދުމުގެ ބަދަލުގައި ތިބާ ދެކެ ލޯބިވާ މީހެއްގެ ފަރާތުން އެ ސިފަތައް ހޯދަން މަސައްކަތް ކުރާށެވެ.
3- ހުރިހާ ކަމެއް ބަލާ ދިރާސާ ކުރުން
ތިބާގެ ބައިވެރިޔާ ކުރާ ހުރިހާ ކަމެއް ގާތުން ބަލާ ދިރާސާ ކުރުމަކީ ވަރަށް "ކަޑަ" ކަމެކެވެ. އެއީ ފާރަލުން ކަމުގައިވެސް ބުނެވިދާނެއެވެ. ތިބާގެ ބައިވެރިޔާގެ ފޯނުގައި ހުންނަ ހުރިހާ މެސެޖަކާއި، އޭނާ އުޅޭ ހުރިހާ ގޮތަކާއި ވާހަކަ ދައްކާއި އެންމެންގެ ވަނަވަރު ބަލަން ވެއްޖެނަމަ ތިބާއެކޭ "ސީއައިޑީ" އެކޭ ތަފާތެއް ނެތެއް ނޫން ހެއްޔެވެ. ތިބާގެ ބައިވެރިޔާއަށް ތިބާ އިތުބާރު ކުރާ ނަމަ އެހުރިހާ ކަމެއް ބަލައި ދިރާސާކޮށް ނުހަދާނެ ކަން ޔަގީނެވެ. އަދި އެގޮތަށް ކަންތައް ކުރުމަކީ ތިބާގެ ބައިވެރިޔާ ތިބާދެކެ ފޫހިވެދާނެ ސަބަބެއް ކަމުގައިވެސް ވެދާނެއެވެ.
މިގޮތަށް އުޅޭކަމުގައި ވަނީ ނަމަ ތިބާއަށް ދިިރިއުޅުމުގައި ހަޔާތުގެ ބައިވެރިޔާއާ އެއްކޮށް ނޫޅެވުމަކީ އެކަށީގެންވާ ކަމެކެވެ. އަދި މި ސިފަ ތިބާ ރަނގަޅު ނުކޮށްފިނަމަ ތިބާ އަބަދުގެ އަބަދަށް ހުސްހަށިބައިކޮށް ހުރެދާނެ ކަމަށް ލޯބީގެ މާހިރުން ބުނެއެވެ.
4- ބައިވެރިޔާ ތިބާ ދޫކޮށް ގޮސްފާނެ ކަމަށް އަބަދާއި އަބަދު ބިރުގަތުން
ބައެއް މީހުންނަކީ ކުދިކުދި ކަންތައްތަކާވެސް ވަރަށް ގިނައިން ވިސްނާ ބައެކެވެ. އަދި އެމީހުން ގިނަ ފަހަރަށް ވިސްނާ ވިސްނުމަކީ ފައްސި ވިސްނުމެއް ނޫނެވެ. އަބަދުވެސް ކޮންމެ ކަމެއްގެ ވެސް އެމީހުން ވިސްނާނީ އެންމެ ނައްސިކޮށެވެ. އެގޮތުން ބައިވެރިޔާ ތިބާ ދޫކޮށް ގޮސްފާނެ ކަމަށް ތިބާ ވިސްނަފާނެއެވެ. އަދި އެކަމާ ކަންބޮޑުވެ ހާސްވެދާނެއެވެ. އަބަދު އެގޮތަށް ވިސްނޭ ނަމަ އެއްވެސް މީހަކާއެކު އުފަލުގައި ނޫޅެވޭނެކަން ޔަގީނެވެ.
އެހެންކަމުން، ތިބާގެ ބައިވެރިޔާ ތިބާދެކެ ލޯބިވާކަން ތިބާ ގަބޫލުކުރަން ވާނެއެވެ. އަދި ދޫކޮށް ނުދާނެ ކަން ޔަގީން ކުރަން ވާނެއެވެ. އިތުބާރަކީ ލޯބީގެ ތަޅުދަނޑިއެވެ. ކޮންމެ ދެމީހެއްގެ ދޭތެރޭގައިވެސް މައްސަލަތައް ޖެހޭނެއެވެ. ބަހާރު މޫސުމާއި ޚަރީފު މޫސުން ކޮންމެ ދެމީހެއްގެ ދޭތެރެއަށްވެސް އަންނާނެ ކަން ޔަގީނެވެ. ނަމަވެސް ބޭނުމަކީ ދެމީހުން އެކަކު އަނެކަކަށް ބަހާރުގައި ހިނިތުންވާ ފަދައިން ޚަރީފުގައި އެކަކު އަނެކަކަށް ހިނިތުންވުމަށް އެހީތެރިވުމެވެ.
5- އަމިއްލަ ނަފްސަށް އިތުބާރު ނުކުރުން
އަމިއްލަ ނަފްސަށް އިތުބާރު ނުކުރުމަކީ ވަރަށް ގިނަ ފަހަރަށް ލޯބީގެ ގުޅުންތައް ނިމުމަަކަށް އަންނަ ސަބަބެކެވެ. ތިބާއަށް ތިބާގެ ބައިވެރިޔާ އުފާ ނުކޮށްދެވޭ ކަމަށް ތިބާގެ ހިތަށް އަރާފާނެއެވެ. އަދި ތިބާއަށްވުރެ މާ ރަނގަޅު މީހަކު ތިބާގެ ބައިވެރިޔާއަށް ލިބިދާނެ ކަމަށް ތިބާ ހީކޮށްފާނެއެވެ. އަދި ތިބާ ދޭ ވަަރަށްވުރެ ގިނަ ވަގުތު ތިބާގެ ބައިވެރިޔާއަށް ދޭނެ މާ ރަނގަޅު މީހަކު ތިބާގެ ބައިވެރިޔާއަށް ލިބިދާނެ ކަމަށްވެސް ތިބާ ހީކޮށްފާނެއެވެ.
އެހެން މީހަކު ދެކެ ލޯބިވުމުގެ ކުރިން، ތިބާގެ އަމިއްލަ ނަފްސު ދެކެ ލޯބިވާން ދަސްކުރާށެވެ. އަދި ތިބާގެ އަމިއްލަ ނަފްސަށް އިތުބާރު ކުރަން ދަސްކުރާށެވެ. ތިބާގެ އަމިއްލަ ނަފްސު ދެކެ ތިބާ ލޯބި ނުވާ ކަމުގައި ވާނަމަ އެހެންމީހަކު ތިބާ ދެކެ ލޯބިވާކަމަަށް ގަބޫލުކުރަން ތިބާއަށް ދަތިވާނެއެވެެ. ކަން މިހެން ވާނަމަ ތިބާދެކެ ކިތަންމެ ލޯބިވާ މީހަކު ތިބާއަށް ލިބުނު ކަމުގައިވިޔަސް ތިބާއަށް އެކަމެއް ގަބޫލެއް ނުކުރެވޭނެއެވެ.
އެހެންކަމުން ލޯބީގެ ގޮތުން މީހަކާ ގުޅިގެން އުޅުމަށް ޓަކައި އަމިއްލަ ނަފްސަށް އިތުބާރުކޮށް އަމިއްލަ ނަފްސު ދެކެ ލޯބިވާން ދަސްކުރާށެވެ. އެހެން ނޫން ނަމަ ތިބާ ހުސްހަށިބައިކޮށް ދިިރިއުޅުން ހޭދަ ކުރަން ޖެހިދާނެއެވެ.
މިލިޔުމުގެ އެހީގައި ތިބާއަށް ތިބާ ހުސްހަށިބައިކޮށް ހުންނަން ތިޖެހޭ ސަބަބެއް ކިޔައި ދެވުނު ކަމަށް އުއްމީދު ކުރަމެެވެ. އަދި އުފާވެރި ދިރިއުޅުމެއް ބޭނުން ނަމަ މި ގަބޫލުކުރުންތައް ތިބާ ދޫކޮށްލަން ޖެހޭނެއެވެ. ނޫންނަމަ ތިބާ ހަމަ ހަގީގަތުގައިވެސް މުޅި އުމުރު ދުވަހު "ސިންގަލް" ކޮށް ހުންނަން ޖެހިދާނެއެވެ.
