ހުވަފެންތަކުގައި ކުލަ ޖެއްސުމަށް ނިޔާ ކުރި ބުރަ މަސައްކަތުގައި، ހަސަދަވެރިން ހުޅުޖަހާ އަންދާލައިފި!

ޒިއްމާދާރު، ހަރުދަނާ ކޮންމެ މީހަކީ އެމީހަކާއި އެމީހެއްގެ ޢާއިލާއަށް ފާގަތި އުފާވެރި މުސްތަޤުބަލެއް ހޯދައި ދެވޭތޯ ގަދައަަޅާ ބުރަ މަސައްކަތްކުރާ މީހުންނެވެ.

ލ. ގަން އަހުމަދު ނިޔާޒް ވެސް ދިރިއުޅުމަށްޓަކައި ދެކެމުންދިޔައީ އެފަދަ ހުވަފެެންތަކެކެވެ. އަމިއްލައަށް ބުރަ މަސައްކަތް ކޮށްގެން ޙަލާލް ފައިސާ ހޯދީ، މުސްތަޤުބަލުގައި ދިރިއުޅުން އިތުރަށް އުޖާލާ ކުރުމުގެ ސާދާ ނިޔަތުގައެވެ.

ނަމަވެސް ނިޔާޒާމެދު ހަސަދަވެރިވާ ބަޔަކު، ރޭގެ ވަގުތެއްގައި މިވަނީ އޭނާގެ ހުވަފެންތަކުގައި ހުޅުޖަހާ އަންދާ އަޅިއަށް ހަދާފައެވެ.

ނިޔާޒް އަކީ އެމްޕީއެލް ގައި މަސައްކަތް ކުރާ ހީވާގި ޒުވާނެކެވެ. ފާއިތުވީ އަހަރަކަށްވުރެ ގިނަ ދުވަސް އޭނާ ހޭދަކުރީ ލިބުނު މުސާރައިން ބައެއް ނަގައިގެން، އަމިއްލަ ލޯންޗެއް ބަނުމުގައެވެ.

"ދެން" އަށް މައުލޫމާތު ދެމުން ނިޔާޒް ބުނީ އޭނާ އެލޯންޗު ބަނުމުގައި އުޅޭތާ މިހާރު އަހަރަކަށްވުރެ ގިނަ ދުވަސް ވެއްޖެ ކަމަށެވެ. އެގޮތުން އޭނާ އެމަަސައްކަތް ފެށީ މިދިޔަ އަހަރުގެ ރަމަޟާން މަހުގައި ކަމަށް ވެސް ބުންޏެވެ. ނަމަވެސް މިއަދު ފަތިހުގެ ވަގުތެއްގައި ބަޔަކު ވަނީ އެލޯންޗު އެއްކޮށް އަންދާހުލި ކޮށްލާފައެވެ.

"ހީވަނީ ރޯކޮށްލާފައި އެވަނީ ރޭ ދަންވަރު 3:00 އާއި ފަތިސް ނަމާދާއި ދެމެދުގެ ވަގުތެއްގައިހެން. ނިދާފަ އޮއްވާ މީހަކު އައިސް ގޮވީ. ދިޔައިރު އެއްކޮށް އަނދާ ހުލިވެފަ އޮތީ. ޕެޓްރޯލް ޖަހާފަ ހަމަ މުޅި ލޯންޗާއި ލޯންޗުގެ މަސައްކަތް ކުރަމުންދިޔަ ހަރުގޭގަ ވެސް ރޯކޮށްލާފަ އޮތީ. އެތަނުގައި ހުރި ލަކުނޑިތަކާއި އެތަންތަނަށް ވެސް ޕެޓްރޯލު ޖަހާ ރޯކޮށްލާފަ އޮތީ." ނިޔާ ކިޔައިދިނެއެވެ.

މިހާދިސާ ފުލުހުންނަށް ރިޕޯޓު ކުރިކަމަށާއި ނަމަވެސް ފުލުހުންނަށް އެތަނަށް ދެވުނީ ފުދޭވަރަކަށް ލަހުން ކަމަށް ނިޔާޒް ބުންޏެވެ.

"މިކޮޅަށް ވެސް، މާލެއަށް ވެސް ރިޕޯޓު ކުރިން މިކަމާއި ގުޅިގެން. އަހަރުމެން ގުޅީ 6:46 ހާއިރު. ފުރަތަމަ އަޒީ ކިޔާ ކުއްޖެއްގެ ފޯނުން އަހަރުމެން ގުޅީ އެތަނުގައި ތިބެ. ގުޅީމަ އާނއެކޭ ބުނެފައި ޚަބަރެއް ނުވީމަ ދެން އަޅުގަނޑު ގުޅީ. ގުޅީމަ ބުނީ މިދަނީ އޭ ކޮންމެވެސް ކަމެއް ވެގެން ލަސްވީއޭ. ފުލުހުން އައީ އޭގެ ގާތްގަނޑަކަށް 25 ވަރަކަށް މިނެޓު ފަހުން." ނިޔާޒް ބުންޏެވެ.

"ފުރަތަމަ އެތަނުގައި އެމީހުންގެ (އަލިފާން ރޯކޮށްލި މީހުންގެ) ފިޔަވަޅުތައް ވެސް ހުރި. އެކަމަކު ފަހުން ވަރަށް ބޯކޮށް ވާރޭ ވެހިގެން ފިޔަވަޅުތައް ފުހެވިފަ ހުރީ. ފުލުހުން ލަހުން އައިމަ އަޅުގަނޑު ބުނިން، ދެން ކިހިނެއްހޭ އެވިޑެންސެއް ހޯދާނީ"

ނިޔާޒް ބުނި ގޮތުގައި ފުލުހުން އެތަނުން ދިޔައީ ތަހުގީގަށް އެއްޗެއް ހިފައިގެންނެވެ.

އަހަރަކަށްވުރެ ގިނަ ދުވަސް ވަންދެން ނިޔާޒް ކުރި އެމަސައްކަތުގައި މިއަދު ބަޔަކު ހުޅުޖަހާފައި މިވަނީ، އެމަސައްކަތް އެއްކޮށް ނިމުމަކާ ވަރަށް ގާތްވެފައި ވަނިކޮށެވެ. އެގޮތުން އޭނާ ބުނިގޮތުގައި ލޯންޗުގައި ރޯކޮށްލިއިރު، އޭގެ ފިނިޝިންގ ވެސް ނިމި، ބާކީ ހުރީ ޕޮލިޝިންގެ މަސައްކަތެވެ.
މިމަސައްކަތަށް އޭނާއަތުން 130،000 (އެއްލައްކަ 30 ހާސް) އަށްވުރެ ގިނަ ރުފިޔާ ހޭދަވެފައިވާ ކަަމަށް އޭނާ ބުނެފައިވެއެވެ.

މިވަރުގެ ބޮޑު ގެއްލުމެއް ދީފައިވުމުން ޝައްކުކުރެވެނީ ކާކަށްތޯ އެހުމުން ނިޔާޒް ބުނީ އެހެން ވަކި މީހަކާއިމެދު ޝައްކު ނުކުރެވޭ ކަމަށާއި ނަމަވެސް އޭނާގެ މާޒީގެ ސަބަބުން ހަސަދަވެރިވެދާނެ ނުވަތަ ރުޅިއައިސްފައި ތިބެދާނެ ކަމަށް ޤަބޫލު ކުރެވޭ ކަމަށެވެ.

"އަޅުގަނޑުގެ މައްސަލަތަކެއް ކުރިން ހުރީމަ މިބަލަނީ އެގޮތުން އަދިވެސް ރުޅިވެރިކަމެއް ހުރީ ކަމަށް. އަޅުގަނޑު ކުރިން ޖަލަށް ވެސްލި މައްސަލައެއްގައި. އެކަމަކު މިނިވަންވީ ރަނގަޅަށް އުޅެން ފެށުމުން. މިނިވަންވީ ފަހުންވެސް ހަމަ ރަނގަޅަަށް އުޅުނީ. ފަސް އަހަރުވީ އެމްޕީއެލްގައި ވަޒީފާގައި އުޅޭތާވެސް. އެތަނުން ލިބޭ ފައިސާއިން ލޯންޗު ބަނީ ވެސް" ނުހަނު ފުން އަސަރެއް ކޮށްފައިވާ ނިޔާޒް ބުންޏެވެ.

މިއީ ހަގީގަތުގައި ވަަރަށް ވެސް ހިތާމަހުރި ކަމެކެވެ. މީހަކުދެކެ ކިތަންމެ ނުރުހުނަސް، ނުވަތަ ހަސަދަވެރިވިޔަސް، އެއްވެސް މީހަކަށް މިފަދަ ބޮޑު ގެއްލުން ދޭން ހެޔޮ ނުވާނެއެވެ.