އިޙްތިރާމް އަށަގެންނެވުމުގެ ޤައުމީ މަޝްރޫއުގެ ވިލަރެސް ކޮމިޓީ އެކުލަވާލައި މަސައްކަތް ފަށައިފި
ރައީސުލްޖުމްހޫރިއްޔާގެ ރިޔާސީ ވައުދުފުޅެއް ކަމުގައިވާ، އިހުތިރާމް އަދާކުރުމުގެ ގައުމީ މަޝްރޫއު ހިންގުމަށްޓަކައި ޚާއްޞަ ވިލަރެސް ކޮމިޓީއެއް އެކުލަވާލައި، އެ ކޮމިޓީގެ ފުރަތަމަ ބައްދަލުވުން ފަންނާއި ސަގާފަތާއި ތަރިކައާ ބެހޭ ވުޒާރާގައި މިއަދު ބާއްވައިފިއެވެ.
ދިވެހި މުޖުތަމަޢުގައި އެކަކު އަނެކަކަށް އިޙުތިރާމުކުރުމުގެ މާތް ސިފަ އާލާކުރުމަށް ރައީސް ޚާއްޞަ އިސްކަމެއް ދެއްވައިގެން ފައްޓަވާ މި ކެމްޕޭން ރަސްމީކޮށް އިފުތިތާޙުކުރުމަށްޓަކައި ވާންޖެހޭ އެންމެ ފަހުގެ ތައްޔާރީތައް ކަމާ ބެހޭ ވުޒާރާއިން މިހާރު ދަނީ ވަމުންނެވެ. މި މަޝްރޫއުގެ ކަންކަން ރާވައި ހިންގުން ހަރުދަނާކުރުމުގެ މަސްއޫލިއްޔަތު މަތިކޮށްފައި ވަނީ އަލަށް އެކުލަވާލި 9 މެންބަރުންގެ މައްޗަށް އެކުލެވޭ ކޮމިޓީއާއެވެ.
ސަރުކާރުގެ މުހިންމު ވުޒާރާތަކާއި ދަޢުލަތުގެ މީޑިއާ ތަމްސީލުވާގޮތަށް އެކުލަވާލާފައިވާ މި ވިލަރެސް ކޮމިޓީގައި ހިމެނިވަޑައިގަންނަވާ ބޭފުޅުންނަކީ:
- ފަންނާއި ސަގާފަތާއި ތަރިކައާ ބެހޭ ވުޒާރާގެ ޑެޕިއުޓީ މިނިސްޓަރ އިބްރާހިމް ސޮބާހް،
- ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާގެ ޑިރެކްޓަރ ނަސްރީނާ އިދްރީސް
- ދިފާޢީ، ވަޠަނީ ޚިދުމަތާ ބެހޭ ވުޒާރާގެ ކެޕްޓަން ޢަލީ ފަހުމީ
- ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާގެ އެޑިއުކޭޝަން ސްޕްރިންޓެންޑެންޓް މުޙައްމަދު ނާތީމް
- މާލީ ވުޒާރާގެ ޑެޕިއުޓީ މިނިސްޓަރ އަޙްމަދު އައިމަން
- ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާގެ ޑެޕިއުޓީ މިނިސްޓަރ މަރްޔަމް ލަހުފާ ޙަލީލް
- އިސްލާމީ ކަންތައްތަކާ އައުޤާފާ ބެހޭ ވުޒާރާގެ ވާއިޡް އައްޝައިޚް އަޙްމަދު ފަހުމީ ދީދީ
- ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ ޑިރެކްޓަރ ޝާދިޔާ އަޙުމަދު
- ޕަބްލިކް ސަރވިސް މީޑިއާގެ އެގްޒެކެޓިވް ޑިރެކްޓަރ އިބްރާހިމް އިޤްބާލް
ފުރަތަމަ ބޭއްވުނު މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވިފައި ވަނީ މި ޤައުމީ މަޝްރޫޢު އެންމެ ފުރިހަމަ ގޮތެއްގައި ތަންފީޒުކުރުމަށް ރޭވިފައިވާ ގޮތްތަކާއި، ކޮމިޓީގެ ދައުރާ ގުޅޭގޮތުންނެވެ. މީގެ އިތުރުން، ދައުލަތުގެ އެކިއެކި މުއައްސަސާތައް ގުޅިގެން މި މަސައްކަތް ކާމިޔާބުކަމާ އެކު ކުރިއަށް ގެންދިއުމަށް އެޅިދާނެ ފިޔަވަޅުތަކާ މެދު މެންބަރުންގެ މެދުގައި ވަނީ ފުޅާ ދާއިރާއެއްގައި ޚިޔާލު ބަދަލުކުރައްވާފައެވެ.
