ދަބަހުގައި ބޮމެއް އޮތް ކަމަށް މަޖަލަކަށް ބުނި މިސްރުގެ ޑޮކްޓަރު ދޫކޮށްލައިފި
ދަބަހުގައި ބޮމެއް އޮތް ކަމަށް މަޖަލަކަށް ބުނި މިސްރުގެ ޑޮކްޓަރު ދޫކޮށްލައިފިއެވެ.
ޕީޓާ ސަމާން މަރުޒޫކް ސަމާން ކިޔާ އުމުރުން 38 އަހަރުގެ މިސްރުގެ ޑޮކްޓަރު ވެލާނާ އެއާޕޯޓުން ހައްޔަރުކުރީ މި މަހުގެ 19ވަނަ ދުވަހުއެވެ.
ޕީޓާ ހައްޔަރުކުރީ ރާއްޖެއިން ފުރަން އެއާޕޯޓުގެ ޑިޕާޗާގައި ގޮސްހުރި އިރު އޭނާގެ ދައްތަގެ ދަބަސް ޗެކިންކުރަމުން ދިޔައިރު އެ ދަބަހުގައި ބޮމެއް އޮތް ކަމަށް މަޖަލަކަށް ބުނުމުންނެވެ. އޭނާ ފަހުން ވަނީ އެއީ މަޖަލަކަށް ބުނި ވާހަކައެއް ކަމަށް ބުނެ މާފަށް ވެސް އެދިފައެވެ.
ނަަމަވެސް މަޖަލަކަށް ވެސް އެފަދައިން ބުނުމަކީ ގާނޫނީ ގޮތުން ކުށަކަށް ވާތީ އޭނާ ހުރީ ހައްޔަރުކޮށްފައެވެ.
މިސްރުގެ ނޫސްތަކުން ރިޕޯޓްކޮށްފައިވާ ގޮތުން މިސްރުގެ ފޮރިން މިނިސްޓަރު ބަދުރު އަބްދުލްއަތީ ލަންކާގައި ހުންނަ މިސްރުގެ އެމްބަސީ މެދުވެރިކޮށް ރާއްޖޭގެ ސަރުކާރާ ބޭއްވި ވާހަކަތަކަށް ފަހު ހައްޔަރުގައި ހުރި މިސްރު ޑޮކްޓަރު މިހާރު ވަނީ ދޫކޮށްލައިފައެވެ.
މިސްރުގެ ފޮރިން މިނިސްޓްރީން ވަނީ ގައުމުން ބޭރަށް ދަތުރުކުރާ އިރު އެ ގައުމު ތަކުގެ ގާނޫނާއި ގަވައިދަށް ތަބާވުމަށް ވެސް އިލްތިމާސްކޮށްފައެވެ.
