ޙަސަދަ އުފެދި އާލާވާ ގުނަވަނަކީ ހިތް ، އެ ގުނަވަން ސާފުކުރޭ!
ޙަސަދައާއި އޭގެ ނުރައްކާތެރި ކަމަކީ އަހަރުމެންގެ ހިތަށް ތަސައްވަރު ކޮށްލެވޭ ވަރަށް ވުރެން މާ ނުރައްކާތެރި އެއްޗެކެވެ. އޭގެ ނުރައްކާތެރިކަން ޢާލިމަކު ބަޔާން ކޮށްދެއްވަމުން ވިދާޅުވެފައި ވަނީ " ޙަސަދައިގެ ވަސް ދުވާނަމަ އަހަރުމެންގެ ތެރެއިިން އެކަކު ވެސް ނޭވާލާން ބޭނުން ނުވާނެ ކަމަށެވެ." މިހާވަރުން ވެސް އޭގެ ނުބައިކަން ބުއްދިއަށް ވަޒަން ކޮށްލެވޭނެއެވެ.
އުޑާއި ބިމުގައި ވެސް ޙަސަދަވެރިކަމުގެ ހާދިސާތައް ހިނގާފައިވެއެވެ. އެގޮތުން އުޑުގައި އެންމެ ފުރަތަަމަ ފާފައެއް ކުރެވުނީ ވެސް ޙަސަދަވެރިކަމުގެ ސަބަބުންނެވެ. އާދެ އެއީ ( އިބިލީސް އާދަމުގެ ފާނަށް ޙަސަދަވެރިވުމުގެ ސަބަބުންނެވެ.) ހަމަ އެގޮތުން ބިމުގައި ޙަސަދައިގެ ސަބަބުން އެތައް ހާދިސާތަކެއް ހިނގާފައިވެއެވެ. އަދި ހިނގަމުން ވެސް ދެއެވެ. އަހަރުމެން ދިރިއުޅުމުން މިދާ ބިމުގައި އެންމެ ފުރަތަަމަ ލޭއޮހޮރުވުމެއް ހިނގީ ވެސް ޙަސަދަވެރިކަމުގެ ސަބަބުންނެވެ. އެއީ ޤާބީލް، ޚާބީލް ޤަތުލުކުރި ހާދިސާއެވެ.
މީގެ އިތުރުން ވެސް ޙަސަދަވެރިކަމުގެ ސަބަބުން އެތައް ކަންތައް ތަކެއް ހިނގައި ގޮސްފައިވެއެވެ. ގާތް ތިމާގެ ކަމުގެ ތެރެއިން ވެސް ޙަސަދަވެރިކަން ފެނިގެން ގޮސްފައިވެއެވެ. އާއިލާގެ ތެރެއިން ވެސް ޙަސަދައިގެ ހުޅު ފަޅައިގެން ހިނގަދާނެއެވެ. އެކަމުގެ ވަރަށް ސާފު މިސާލެއް ވަނީ ޔޫސުފްގެފާނު ޙަޔާތްޕުޅުން ފެނިގެން ގޮސްފައެވެ.
ގޭތެރޭގައި ދަރިން ކުޑައިރު ދަރިންގެ ކުރިމަތީގައި މައިންބަފައިން އެއްކުއްޖަކު އަނެއް ކުއްޖަކާއި ތަފާތު ކުރުމަކީ އެ ކުދިން ބޮޑެތިވެ އެއްކުއްޖަކު އަނެއް ކުއްޖަކަށް ޙަސަދަވެރިވާން ދިމާވާ އެއް ސަބަބެވެ. ހަމަ މި އުސޫލުން މުދައްރިސުން ދަރިވަރުންގެ ތެރޭގައި ތަފާތު ކުރުން ގެންގުޅުމަކީ ވެސް އެއް ކުއްޖަކު އަނެއް ކުއްޖަކަށް ޙަސަދަވެރިވެ އުފެދެން ކުރަން މެދުވެރިވާ ސަބަބެކެވެ.
އަދި މުޖުތަމަޢުތެރޭގައި އެއްބަޔަކު އަނެއް ބަޔަކަށް ޙަސަވެރި ވުމަކީ އެ މުޖުތަމަޢެއްގެ ހަލާކެވެ. އެހެނީ އޭގެ ސަބަބުން ފިތުނަ ފަސާދަ އުފެދި އެއްބަޔަކު އަނެއްބަކަށް ލަޢުނަތްދީ މުދަލާއި ތަކެއްޗަށް ގެއްލުންދޭ ހިސާބަށް ވެސް ރުޅިވެރިކަންދެއެވެ. ޙަސަދައިގެ ހުޅު ރޯކުރުމުގައި ޝައިޠާނާގެ ދަޢުރުގެ ވެސް ވަރަށް ބޮޑެވެ. ދެ މީހުން ދެމެދު ރުޅިވެރިކަން އުފައްދާ އެ ރުޅިވެރިކަން ޙަސަދަވެރިކަމަށް ބަދަލު ކުރުމުގެ މޭސްތިރިޔަކީ ޝައިޠާނާއެވެ.
ހަސަދައިގެ ޒަޚަމަކީ ވޭނީ ރިހުމެކެވެ. އެހެންކަމުން ރިހުން އަށަގަތުމުގެ ކުރިން މަސައްކަތް ކުރަންވީ ޙަސަދަވެރިކަމުގެ ސަލާމަތްވެވޭތޯ އެވެ. ޙަަސަދަ އުފެދި އާލާވާ ގުނަވަން ކަމުގައިވާ ހިތް ސާފުތާހިރު ކުރުމެވެ. މީހުންނާ މެދު ހެޔޮކޮށް މުޢާމަލާތްކޮށް ހިނިތުވެ ބައްދަލުކުރުމެވެ. ސަލާންގަލާން ކުރުން ގިނަ ކުރުމެވެ. ކުރިން ވެސް ބުނި ފަދައިން ޙަސަދަ އުފެއްދުމުގައި ޝައިޠާނާގެ ދައުރު ބޮޑު ވީމާ ޝައިޠާނާގެ ވަސްވާސްތަކާއި ދުރުވާނޭ ހުރިހާ ކަމެއް ކުރުމަކީ ޙަސަދައިން ސަލާމަތް ވުމަށް އެޅިދާނޭ މުހިއްމު ފިޔަވަޅެކެވެ.
އެންމެ މުހިއްމު ކަމަކީ ޙަސަދައިން ހިތް ތޯހިރު ކޮށްދެއްވުން އެދި ގިނައިން ﷲ ތަޢާލާގެ ހަޟުރަތަށް ދުޢާކުރުމެވެ.
