އާބާދީގެ ނިސްބަތުން އެންމެ ގިނައިން ހަނގުރާމަތަކުގައި ބައިވެރިވާން ދަނީ ދިވެހިން: އެންސީޓީސީ
މުޅި ދުނިޔޭގެ އާބާދީގެ ނިސްބަތަށް ބަލާއިރު އެންމެ ގިނައިން ހަނގުރާމަތަކުގައި ބައިވެރިވާން ގޮސްފައިވަނީ ދިވެހިން ކަަމަށް ނޭޝަނަލް ކައުންޓާ ޓެރަރިޒަމް ސެންޓަރ (އެންސީޓީސީ) އިން ބުނެފިއެވެ.
ރާއްޖެޓީވީ ގެ "ފަލަސުރުޙީ" ޕްރޮގްރާމުގައި ރޭ ވާހަކަ ދައްކަވަމުން އެސެންޓަރުގެ ޑިރެކްޓަރ ޖެނެރަލް ބްރިގޭޑިއާ ޒަކަރިއްޔާ މަންސޫރު ވިދާޅުވީ ދުނިޔޭގެ އާބާދީގެ ނިސްބަތުން އެންމެ ގިނަ މީހުން ހަނގުރާމަތަކުގައި ބައިވެރިވަމުން އަންނަނީ ދިވެހިން ކަމަށާއި ރާއްޖޭގެ އާބާދީ އަށް ބަލާނަމަ ހަނގުރާމަތަކުގައި ބައިވެރިވާ ދިވެހިންގެ އަދަދު ގިނަކަމަށެވެ.
"ރާއްޖޭގެ އާބާދީގެ ނިސްބަތުން އެ އަދަދަކީ ވަރަށް މަތީ ޕަސެންޓޭޖެއް. މުޅި ދުނިޔޭގެ އާބާދީގެ ނިސްބަތުން އެންމެ ގިނައީ ދިވެހިންނޭ ބުނާ ހިސާބަށް ކަންތައްތައް ދިމާވެފައި އެބަހުރި" ބްރިގޭޑިއާ ޒަކަރިއްޔާ ވިދާޅުވެފައިވެއެވެ.
މީގެއިތުރުން ބްރިގޭޑިއާ ޒަކަރިއްޔާ ވިދާޅުވީ ގިނަ އަދަދެއްގެ ދިވެހިން އެނބުރި ރާއްޖެ އަންނަން ބޭނުންވެގެން އެދެމުން އަންނަ ކަމަށާއި އެހެންނަމަވެސް އެކަމަށް ގިނަ ގޮންޖެހުންތަކެއް ކުރިމަތިވާ ކަމަށެވެ.
"އެގޮންޖެހުންތައް އެގޮތަށް ކުރިމަތިވި ނަމަވެސް އެމީހުން ގެނައުމަށް މަސައްކަތް ކުރަމުން މިދަނީ. އެގޮތުން ފޮރިން މިނިސްޓްރީ އާއި ގުޅިގެން އެކަމާއި ގުޅޭ ގިނަ މަސައްކަތްތަކެއް ވެސް ކުރަމުން މިދަނީ" ޒަކަރިއްޔާ ވިދާޅުވިއެވެ.
