"ބެސްޓުފްރެންޑް" ވަރަށް ކުރު އެހެންނަމަވެސް ވަރަށް މާނަ ފުން ލަފުޒެއް
"ބެސްޓުފްރެންޑް" ނުވަތަ އެންމެ ގާތް އެކުވެރިއަކީ ކޮބައިބާއެވެ؟ އެމީހުން ދިރިއުޅުމުގައި އެހާ މުހިންމު ވަނީ ކޮން ސަބަބަކާއި ހުރެ ހެއްޔެވެ؟ އެމީހުން ނެތި އުޅެވޭނެބާއެވެ؟ މިއީ ހަމަ ގައިމުވެސް އަޅުގަނޑުގެ ހިތަށް އަރާ ސުވާލުތަކެކެވެ. ކޮންމެ މީހެއްގެ ވެސް ހަޔާތުގެ އެކި ކަންކަން ހިއްސާކޮށް ލަފާ ހޯދުމުގެ އިތުރުން ދިރިއުޅުމުގައި އަންނަ އަޑިގުޑަންތަކާއި އުފާވެރިކަން އެކުގައި ހިއްސާ ކޮށްލަން ބޭނުންވާ މީހަކު ހުރެދާނެއެވެ. އަދި އެފަދަ ކަންކަން ހިއްސާ ކުރާ ރަހުމަތްތެރިން ވެސް ހުންނާނެއެވެ. "ބެސްޓްފްރެންޑް" ގެ ނަން ނުދިން ނަމަވެސް އެއީ ތިމާގެ ބެސްޓްފްރެންޑެވެ.
ބެސްޓުފްރެންޑަކީ ދިރިއުޅުމުގައި ތިމާއާއި އެކުގައި އެންމެ ގާތުގައި ވާ އެކުވެރިޔާއެވެ. ތިމާއަށް ގޯސްކޮށް އެއްވެސް ކަމެއް ކުރެވޭނަމަ އެކަން ހުއްޓުވަން އަބަދުވެސް މަސައްކަތް ކުރާ ދެވަނައެއް ނެތް އެކުވެރިޔާއެވެ. ވަފާތެރި މިތުރެކެވެ. ބެސްޓުފްރެންޑަކީ ސިފައަށް ބެލުމަށް ފަހު ޚިޔާރު ކުރާ ބައެއް ނޫނެވެ. އެހެން ނަމަވެސް ބައެއް މީހުން ބެސްޓްފްރެންޑުން ހޯދަނީ އެހެންމީހުނަށް ދެއްކުމަށް ނޫނީ އަނެކާއަކީ މީހުންގެ ތެރޭގައި މަގުބޫލު މީހަކަށް ވުުމުންނެވެ. މިއީ ގަބޫލު ކުރިޔަސް ނުކުރިޔަސް ހިތި ހަގީގަތެވެ.
ބެސްޓްފްރެންޑުން އެކަކު އަނެކަކަށް އެއްވެސް ކަމެއް ސިއްރެއް ނުކުރާނެއެވެ. ފުރިހަމަ އިތުބާރު ކުރާނެއެވެ. އަބަދުވެސް ގާތުގައި ވާނެއެވެ. އެންމެ ބޭނުންވާ ދުވަހު ގާތުގައި ނެތް ނަމަވެސް ކޮންމެވެސް ގޮތަކުން އަބަދުވެސް ގާތުގައި ވާނެއެވެ. އެއީ ހިތާ ހިތުގެ ގުޅުމެކޭ ބުނި ނަމަވެސް ދޮގަކަށް ނުވާނެއެވެ. ހިތުގައި އެއްވެސް ނުތަނަވަސް ކަމެއް ވާނަމަ އެކަން އެންމެ ފުރަތަމަ ހިއްސާ ކުރާނީ އަބަދުވެސް ތިމާގެ ބެސްޓުފްރެންޑަށެވެ. މައްސަލައެއް ޖެހޭކޮންމެ ފަހަރަކު ދެމީހުން ވާހަކަ ދައްކައިގެން މައްސަލަ ހައްލު ކުރެވޭތޯ އަބަދުވެސް މަސައްކަތް ކުރާނެއެވެ.
ދިރިއުޅުމުގައި ކުރެވޭ ބައެއް ކަންކަމުގެ ސަބަބުން ގެއްލުން ވެދާނެ ކަމަށްޓަކައި އަބަދުވެސް ނަސޭހަތް ދޭނެއެވެ. އަދި އަނެކާ ދޭ ނަސޭހަތް އަބަދުވެސް ގަބޫލު ކުރާނެއެވެ. ދެބަސް ވާންޖެހޭ ވަގުތު ދެބަސް ވެސް ވާނެއެވެ. އެހެންނަމަވެސް އެއީ ޙާލަތަށް ރިޢާޔަތް ކޮށެވެ. ފަހުން ހުރިހާ ކަމެއް ވެސް ރަނގަޅުވާނެއެވެ. އެވަގުތު ކިތަންމެ ދެރަ ވިޔަސް ފަހުން އެކަން ކުރީ ކީއްވެކަން އެނގޭނެއެވެ. އަދި އެވާހަކަ ނުބުންޏަސް އެކަން އަމިއްލައަށް ނަގައިގަންނާނެއެވެ. މިއީ ބެސްޓް ފްރެންޑުންނެވެ.
ބެސްޓް ފްރެންޑުންނަކީ ވަރަށް ވެސް މުހިންމު ބައެކެވެ. "ހިއުމަން ޑައިރީ" އަކީ ވެސް އެމީހުންނޭ ބުނުމަކީ ދޮގަކަށް ނުވާނެއެވެ. ހަޔާތުގެ ކޮންމެ ޞަފުޙާއެއްގައި ވާ ކޮންމެ ބަހަކީ ވެސް އޭނައަށް އެނގިގެން ވާ ކަންކަމެވެ. ދިރިއުޅުމުގައި މިފަދަ ބެސްޓް ފްރެންޑެއް ހުރުމަކީ ހާދަހާ މާތް ނަސީބެކެވެ. އިތުބާރާއި އެހީތެރިކަމުގެ ގޮށުން އެކުވެރިކަމުގެ ގުޅުން އަބަދުވެސް ދެފަރާތުން މަސައްކަތް ކުރަންވާނެއެވެ.
ތިމާގެ ބެސްޓްފްރެންޑު އެހެން މީހަކާ ވާހަކަ ދެއްކުމުން، ބެސްޓްފްރެންޑު ގެއްލިގެން ގޮސްދާނެ ކަމަށް ހީކޮށް ތިމާގެ ހިތް ނުތަނަވަސް ވުމަކީ އާންމު ކަމެކެވެ. އެކަމަކީ ތިމާ އެކަމާ ދެރަވާން ޖެހޭ ކަމެއް ނޫނެވެ. ފަހަރުގައި އަނެކާ ތިމާއާއި ދޭތެރޭ އެހާ ގާތް ކޮށް ނުދެކުނަސް ތިމާ އޭނައާއި ދޭތެރޭ ގާތްކޮށް ދެކެވޭ ކަމުގެ ނިޝާނެކެވެ. އެގޮތަށް ކަންތައް ކުރިއަށް ދާނަމަ އެވާހަކަ ދައްކަން އަނެކާއާއި ހިއްސާކުރަން ވާނެއެވެ. ހިތްހަމަ ނުޖެހޭ ކަމެއް ވާނަމަ އެކަން ބުނަން ފަސްނުޖެހޭށެވެ.
ގަބޫލު ކުރަމެވެ. އޭރުގެ ބެސްޓްފްރެންޑަކީ މިހާރު ތިމާގެ ދުޝްމިނަކަށް ވެފައި ވެސް ހުރެދާނެއެވެ. އެހެން ނަމަވެސް އެއީ ތިމާ އެކަމާ މެދު އެއްވެސް ވަރަކަށް އުއްމީދު ކަނޑާލަންވީ ކަމެއް ނޫނެވެ. ބައެއް މީހުނަށް ހީވެފައި އޮންނަނީ އެފަދަ ލަނޑެއް ތިމާގެ މިތުރެއްގެ ކިބައިން ލިބުމުން ދެން ހަގީގީ އެކުވެރިކަމަކީ ވުޖޫދުގައިވެސް ވާ އެއްޗެއް ނޫން ގޮތުގައެވެ. ނަމަވެސް އެއީ ކުށްހީއެކެވެ. އެކުވެރިކަމަކީ އަބަދުވެސް ވާ އެއްޗެކެވެ. ބޭނުންވަނީ ރަނގަޅު، ތިމާއަށް ހެޔޮ އެދޭ އަދި އަބަދުވެސް ތިމާއާއި އެކުވާ ރަނގަޅު އެކުވެރިއެކެވެ.
