މުސާރަ ލިބުނީ އިއްޔެ، މިއަދު ހުސްވެއްޖެ!
ގިނަ މީހުންނަކީ ދިރިއުޅުމުގައި ޢާމުދަނީ ހޯދުމަށް ގިނަ މަސައްކަތް ތަކެއް ކުރަމުން ދާ ބައެކެވެ. އެކި ދާއިރާއިން އެކި ކަހަލަ މަސައްކަތް ކުރާ މީހުން އުޅެއެވެ. ވީއިރު ޚުދު އަޅުގަނޑުމެންގެ މި ކުޑަކުޑަ ދިވެހިރާއްޖެއަށް ބަލާލި ނަމަވެސް މިފެންނަނީ މި މަންޒަރެެވެ.
މަހުގެ 1 ނުވަތަ 2 ވަނަ ދުވަހު ގިނަ އޮފީސް ތަކުން މުސާރަ ލިބެއެވެ. އެހެން ނަމަވެސް މަހުގެ ފުރަތަމަ 10 ދުވަސް ނިމެންވާއިރު ލިބިފައިވާ މުސާރަ އޮންނަނީ ހުސްވެފައެވެ. ވަނީ ކިހިނެއް ކަމެއް އަދި ދަނީ ކޮންތާކަށް ކަމެއް ވެސް ނޭނގެއެވެ.
ކަމުގެ ހަގީގަތް ބަލާލާއިރު، ކޮފީއަށާއި، ބޭކާރު ޚަރަދަށް ދުއްވާފައިވާ ބައި މުސާރައިގެ 75 އިންސައްތަ އާއި ގާތް ކުރެއެވެ. ވީއިރު ކިތަންމެ ބޮޑު މުސާރައެއް ލިބޭ ވަޒީފާއެއްގައި އުޅުނު ނަމަވެސް މުސާރަ އަރައިގެން ދާނެތާއެވެ. މިކަމާއި މެދު ވިސްނައިފިނަމަ މިކަމުގެ ހައްލެއް ވެސް އެނގެން ޖެހޭނެއެވެ.
މުސާރައިން އެއްބައި ރައްކާ ކުރުމަށް އާދަކުރާށެވެ. އެހެނީ މާދަމާ ވެސް ކަމަކު ޖެހިގެން ފައިސާގެ ބޭނުމެއް ޖެހޭނީ ކޮން އިރަކުން ކަމެއް އެނގޭނީ ފަހެ ކާކަށް ހެއްޔެވެ؟ ކޮންމެ މަހެއްގެ ވެސް ކޮންމެ ވެސް ވަރެއް ރައްކާ ކުރަން އާދަކުރާށެވެ. އެއީ ރީތި ސިފައެކެވެ.
އެހެން ނަމަވެސް ގަބޫލުކުރަން ޖެހޭ ހަގީގަތަކީ މުސާރަ ލިބުނު ނަމަވެސް ގެ ކުއްޔާއި، އެހެނިހެން ތަންތަނަށް ދައްކަން ޖެހޭ ތަންތަނަށް ދެއްކުމަށް ފަހު އަތުގައި ގިނަ ފަހަރު ރުފިޔާ ނުހުންނަ ކެމެވެ. ގިނަފަހަރު އަތުގައި އޮތަސް އޮންނަނީ އެންމެ 500 ރުފިޔާއެވެ. މަސް ދެބައި ވަންދެން ވެސް އެރުފިޔާ ކޮޅުން ފުއްދާލާނީ ފަހެ ކިހިނެއް ހެއްޔެވެ؟
ދުވަސްވަރަކީ ކޮވިޑު-19 ގެ ސަބަބުން ގިނަ ބައެއްގެ ޢާމުދަނީ އަށް ނޭދެވޭ އަސަރު ކޮށްފައިވާ ފަރާތްތަކެވެ. ވަޒީފާ ނުލިބި ވެސް އެތައް ބައެއް މިއަދު އެބަ ތިއްބެވެ. އެމީހުންގެ ހާލާއި މެދު ވިސްނާފައި މިއަދު އަޅުގަނޑު ނުހަނު ދެރަވެއެވެ. އަދި އެކަމުން އިބުރަތެއް ލިބި، މިހާރު ވަޒީފާގައި އުޅޭ ފަރާތްތަކުން ވެސް ފަހަށް ފައިސާ ރައްކާކުރެވޭތޯ މަސައްކަތް ކުރަމާ ހިނގާށެވެ.
