އެމެރިކާ ރިޔާސީ އިންތިހާބު: ނަތީޖާތަކުން ދައްކާގޮތުގައި އަދި ކުރީގައި އުޅެނީ ބައިޑަން
އެމެރިކާގެ ރިޔާސީ އިންތިހާބު އިއްޔެ ބާއްވާފައިވާއިރު، ނަތީޖާތައް މިހާރު އިއުލާނު ކުރަން ފަށައިފިއެވެ.
އެގޮތުން މިހާތަނަށް ނަތީޖާތަކަށް ބަލާއިރު، އެމެރިކާގެ ރައީސް ޑޮނަލްޑް ޓްރަމްޕް 16 ސްޓޭޓަކުން ކާމިޔާބީ ހޯދާފައިވާއިރު ރިޔާސީ ކެންޑިޑޭޓް ޖޯ ބައިޑަން އަށް ކާމިޔާބު ކޮށްފައި ވަނީ 13 ސްޓޭޓަކުން ވޯޓެވެ. ނަމަވެސް އިލެކްޓޮރަލް ވޯޓުގެ ޖުމްލަ އަދަދުން ބަލާނަމަ ކުރީގައި އުޅުއްވަނީ ބައިޑެން އެވެ.
އެގޮތުން ރިޔާސީ އިންތިހާބު ކާމިޔާބު ކުރުމަށް ޖުމްލަ 270 އިލެކްޓޮރަލް ވޯޓު ބޭނުންވާއިރު ޓްރަމްޕަށް މިހާރު ލިބިފައިވަނީ 118 ވޯޓެވެ. އަދި ބައިޑެން އަށް 209 އިލެކްޓޮރަލް ވޯޓު ލިބިވަޑައިގެންފައިވެއެވެ.
ނަތީޖާތަކަށް ބަލާއިރު، އެމެރިކާގެ ކުދިކުދި ސްޓޭޓްތަކުން ބޮޑު ތަރުހީބެއް ދީފައިވަނީ ރައީސް ޓްރަމްޕަށެވެ. ނަމަވެސް 2016 ވަނަ އަހަރު ބޭއްވި އިންތިހާބުގައި ޓްރަމްޕާއެކު ވާދަ ކުރެއްވި ރިޔާސީ ކެންޑިޑޭޓް ހިލަރީ ކްލިންޓަނަށް ސަޕޯޓު ކުރެއްވި ސްޓޭޓުތަކުން، މިފަހަރު ކުރި ހޯއްދަވާފައިވަނީ ބައިޑަން އެވެ.
އެގޮތުން ބައިޑަން އަށް ކުރި ލިބިފައިވާ ސިޓީތަކުގެ ތެރޭގައި ނިއު ހޭމްޕްޝަޔަރ، ކެލިފޯނިއާ، ކޮލޮރާޑޯ، ކަނެކްޓިކަޓް، ޑެލަވެއަރ، ޑިސްޓްރިކްޓް އޮފް ކޮލަމްބިއާ، އިލިނޮއިސް، މޭރީ ލޭންޑް، މެސެޗުސެޓްސް، ނިއު ޖާރސީ، ނިއު މެކްސިކޯ، ނިއު ޔޯކް، އޮރެގަން، ރޯޑް އައިލެންޑް، ވަރމޮންޓް، ވަރޖީނިއާ އަދި ވޮޝިންގޓަން ހިމެނެއެވެ.
