އެމެރިކާގެ އިންތިޚާބު: ތާރީޚްގައިވެސް އެންމެ ގިނަ ވޯޓް ލިބުނު ކެނޑިޑޭޓަކަށް ބެއިޑަން
އެމެރިކާގެ ތާރީޚްގައިވެސް މިހާތަނަށް އެންމެ ގިނަ ބަޔަކު ރައީސް ކަމަށް ވޯޓް ލި ކެނޑިޑޭޓްގެ ރިކޯޑް ޑިމޮކްރެޓިކް ކެންޑިޑޭޓް ޖޯ ބައިޑަން މުގުރާލައިފިއެވެ.
މިހާތަނަށް އެމެރިކާގެ ތާރީޚްގައި އެންމެ ގިނަ ބަޔަކު އެއް ކެނޑިޑޭޓަކަށް ވޯޓް ލާފައިވަނީ 2009 ވަނަ އަހަރު އޮތް އިންތިޚާބުގައި އޭރުގެ މޮކްރެޓިކް ކެންޑިޑޭޓް އަދި ދެ ދައުރު އެމެރިކާގެ ރައީސްކަން ކުރައްވާފައިވާ ބަރަކް އޮބާމާއަށެވެ. އެ އަހަރު އޮބާމާއަށް ވަނީ 69.4 މިލިޔަން ވޯޓް ލިބިވަޑައިގެންފައެވެ.
މިހާތަނަށް 70,954,759 (70 މިލިޔަން) ވޯޓް ލިބިފައިވާއިރު، އެއީ ވޯޓް ލީ ޖުމްލަ މީހުންގެ 50.3 އިންސައްތައެވެ. އެންމެ ފަހުގެ ނަތީޖާތަކާ އެކު ބައިޑަން އުޅުއްވަނީ 264 އިލެކްޓޯރަލް ވޯޓުން ކުރީގައެވެ. އިންތިޚާބު ކާމިޔާބު ކުރަން އެމަނިކުފާނަށް ދެން ބޭނުން ވަނީ ހަ އިލެކްޓޯރަލް ކޮލެޖް ވޯޓެވެ.
ޓްރަމްޕަށް ލިބިވަޑައިގެންފައި ވަނީ 214 އިލެކްޓޯރަލް ކޮލެޖް ވޯޓެވެ. ޓްރަމްޕަށް މިހާތަނަށް ލިބިވަޑައިގެންފައި ވަނީ 68,065,815 ވޯޓެވެ. އެއީ ޖުމްލަ ވޯޓުގެ 48.17 ޕަސެންޓެވެ.
މިހާތަނަށް ނަތީޖާ ނުލިބި ވަނީ ޖޯޖިއާ، ނެވާޑާ، ނޯތު ކެރޮލީނާ އަދި ޕެންސިލްވޭނިއާ އެވެ.
އެމެރިކާގެ އިންތިޚާބުގައި މި ފަހަރު 160 މިލިއަން މީހުން ވޯޓުލާފައިވާ ކަމަށް ލަފާކުރެވެއެވެ. އޭގެ ތެރޭން 101.1 މިލިއަން މީހުން ވޯޓުލާފައި ވަނީ އާލީ ވޯޓިންގެ ގޮތުގައެވެ. މިއީ އެމެރިކާގެ ތާރީޚަށް ބަލާއިރު ރިކޯޑް އަދަދެކެވެ. އާލީ ވޯޓިންގެ 65.2 މިލިއަން މީހުން ވޯޓުލާފައި ވަނީ ޕޯސްޓުންނެވެ.
Ads by STO
