4 އަހަރުގެ އެކުވެރިކަން: ހަނދާން ނުނެތޭނެ އެތައް ކަމެއް
އެކުވެރިންނަކީ ދިރިއުޅުމުގައި އައިސްފައި ގެއްލިގެން ވެސް ދާނެ ބައެކެވެ. އެއްވެސް މީހަކީ ދާއިމަށް ދިރިއުޅުމުގައި ވެސް މި ދުނިޔޭގައި ވެސް އުޅޭނެ މީހެއް ނޫނެވެ. ދާއިމަށް ހަރުލައިފައި ހުންނަނީ އެކުގައި ޖެހިހާ ސަކަރާތާއި ކުރިހާ މަޖާތަކުގެ ހަނދާނެވެ.
މީގެ 4 އަހަރު ކުރިން އަހަރެން ތިބާއާ ދިމާވީ ސުކޫލުންނެވެ. އެއީ "އޭ ލެވެލް" ހަދަމުން ދަނިކޮށެވެ. ފުރަތަމަ ދުވަހު އެއްވެސް ވަރަކަށް މީހުންނާ އަހަރެން ވާހަކަ ދައްކާ ނޫޅެމުއެވެ. އެހެންނަމަވެސް ތިބާ އަހަރެންގެ ގާތަށް އައިސް އެންމެ ފުރަތަމަ ވާހަކަ ދައްކަން ފެށި ދުވަހަކީ އަހަރެންގެ ހިތުގައި ތިބާއަށް ޓަކައި ޤަދަރު އުފެދިގެން ދިޔަ ދުވަހެކެވެ. ޚާއްސަ ދުވަހެކެވެ.
އެއަށް ފަހު ސުކޫލުގެ ހުރިހާ ފިލާވަޅުތަކެއް ވެސް އަހަރެން ތިބާއަށް ހަދައިދިން ހަނދާން އަހަރެން ވެއެވެ. ތިބާ ބަލިވެގެން ސުކޫލަށް ނާންނަ ކޮންމެ ދުވަހަކީ ވެސް އަހަރެން ސުކޫލުގައި ވަރަށް ފޫހި ދުވަހެކެވެ. ކުލާހުގެ ރޫހު ގެއްލިފައިވާ ފަދަ ދުވަހެކެވެ. ތިބާ ކުލާހަށް އަންނަ ކޮންމެ ދުވަހަކީ މުޅި ކުލާސް ހިލުވާލާ ދުވަހެކެވެ. ތިޔައީ އެހާ މަޖާ މިޒާޖެއްގެ މީހެކެވެ.
އެންމެ ފަހުން ސުކޫލު ދައުރު ނިމި މުޖުތަމައަށް ވަޒީފާއަށް ވެސް ނިކުތީ ދެމީހުން އެއް އޮފީހަކަށް ނޫން ހެއްޔެވެ؟ އެތަނުގައި ވެސް ދެމީހުން އެތައް ސަކަރާތެއް ޖެހީމެއް ނޫން ހެއްޔެވެ؟ އަހަރެެން ވަރަށް ރަނގަޅަށް ހަނދާން އެބަ ހުއްޓެވެ. އެންމެ ފަހުން އެ އޮފީހުން ވެސް ދެމީހުން ކެނޑުނީއެވެ. އެއަށް ފަހު ތިބާއާއި އަހަރެންނާ ދެމެދު ފުރަތަމަ ފަހަރަށް ދުރު ކަމެއް އައީއެވެ. ތިބާ އެހެން ވަޒީފާއަކަށް ދާން ފެށުމާއެކު އެ ވަޒީފާގައި މާ ބުރަވާން ފެށީއެވެ.
އަހަރެން ވެސް އެހެން ވަޒީފާއަކަށް ދާން ފެށީއެވެ. އެހެން ނަމަވެސް އެ ދުރުކަން އައީ ދުވަސްކޮޅަކަށެވެ. ތިބާ އަނެއްކާވެސް އެ ވަޒީފާއިން ކެނޑިގެން ކިޔަވަން ފެށީއެވެ. ވަކީލުކަމެވެ. ނުކިޔަވާށޭ ބުނެ އަހަރެން ތިބާއަށް ދިމާކުރި ހަނދާން ވޭހެއްޔެވެ؟ އެންމެ ފަހުން ވީ ވެސް އެހެން ނޫން ހެއްޔެވެ؟ މިއަދު ތިބާ ކިޔަވަނީ މުޅިން އެހެން ދާއިރާއަކުންނެވެ.
ކޮންމެ ދުވަހަކު ވެސް އަހަރެން ވަޒީފާއިން ނިމޭ ގަޑީގައި ތިބާ ހުންނާނީ އަހަރެން އޮފީސް ދޮރުމަތީގައި އަހަރެން ބަލާ އައިހެވެ. އެތަނުން ދާހާ އަންހެނަކަށް ފަރިވަމުންނެވެ. މިހެން ގޮސް އެއް ދުވަހު އަހަރެން ޖެހުނީ ރަށަށް ދާށެވެ. ކުޑަ ދުވަސްކޮޅަކަށެވެ. އެހެން ނަމަވެސް ތިބާ އަހަރެންނަށް ގުޅާނޭކަމުގެ ފޮނި އުއްމީދުގައެވެ.
ކޮންމެ ދުވަހަކު ވެސް ހުޅުމާލޭގައި ސައިކަލު ދުއްވާ، އެކީގައި ކާން ގޮސް އެތައް ކަމެއް އެކީގައި ކުރެވުނެވެ. ރަށުގައި ހުރެ ކޮންމެ ވަގުތަކު ވެސް އަހަރެން ތިބާއަށް ގުޅުމުން ތިބާ ވަނީ "ބިޒީ" އެވެ. އަހަރެން ގަބޫލު ކުރަނީ ވެސް އެގޮތަށެވެ. އެހެން ނަމަވެސް ހަގީގަތް ހާމަވެގެން ދިޔައިރު ކަން ވެގެން ދިޔައީ ހީކުރިގޮތާ މުޅިން ޚިލާފަށެވެ.
ތިބާ ލޯބީގެ ގޮތުން ގުޅެވުނު އަންހެން ކުއްޖެއްގެ ސަބަބުން ތިބާ އަހަރެންނާ ގުޅުން ބާއްވަން ބޭނުން ނުވީއެވެ. މަގޭ ކުށަކީ ކޮބައި ކަމެއް ބުނެ ދިނިން ހެއްޔެވެ؟ ދެތިން މަސް ވީ ލޯބިވެރިޔާގެ ބުނުމަށް 4 އަހަރުވީ އެކުވެރިކަން ވެއްޔާ ލާ މޮޑެލީ ތިބާ ހިތުގައި މި އެކުވެރިކަމަށް އެއްވެސް ވަރެއްގެ ޤަދަރެއް ނެތުނީމަތާއެވެ. އަހަރެން ތިބާއަށް ވިސްނައިދޭން ނުކުރަނީ ކީއް ހެއްޔެވެ؟ އެންމެ ކުޑަމިނުން ތިބާގެ އާއިލާއަށް ވެސް ތިބާ ކޮބައިތޯ ބަލަން އަހަރެން ގުޅީމެވެ. ނަމަވެސް ތިބާ އެކަމާ ވެސް ހިތްހަމަ ނުޖެހުނީތާއެވެ.
އަހަރެން ވަގުތާއެކު ދިރިއުޅުން ކުރިއަށް ގެންދިޔައީއެވެ. ތިބާއަކީ އަހަރެންގެ މާޒީ ކަމުގައި އަހަރެން އެހިސާބުން ނިންމީމެވެ. އެހެން ނަމަވެސް ތިބާ މިއަދު ތިޔަ ސަލާން ޖަހަނީ އަހަރެން ކިބައިން ހަމަ އެ އެކުވެރިކަމަށެވެ. ލޯބިވެރިޔާ ބޭވަފާތެރިވުމުން ތިބާއަށް އެންމެ ފުރަތަމަ ވެސް ފެނުނީ އަހަންނެއް ނޫން ހެއްޔެވެ؟ މިދުވަސް އަންނާނެކަން އަހަންނަށް އެނގެއެވެ.
އެކުވެރިޔާއެވެ. އަހަރެން ތިބާއަށް މަޢާފުކުރިތާ އެތައް ދުވަހެކެވެ. އެހެން ނަމަވެސް ގެއްލިގެން ދިޔަ އެ ގުޅުން އަނބުރާ އަންނާނެކަމަށް އުއްމީދު ނުކުރާށެވެ. ތިބާ އަހަރެންނަށް ދަސްކޮށް ދިނީ ވަރަށް މުހިންމު ފިލާވަޅެކެވެ. އެކުވެރިކަމަކީ ވަގުތީ އެއްޗެއް ކަމާއި، އެއްވެސް މީހަކަށް އެހާ ބޮޑަށް އިތުބާރު ނުކުރުމަށެވެ. ތިބާ އާއި އަހަރެންނާ ދެމެދު މިއަދު އެ ގުޅުން ނެތުނު ނަމަވެސް ހަނދާންތައް އަބަދުމެ އަބަދަށް މިހިތުގައި ބިންވަޅު ނެގިފައި ވާނެއެވެ. ތިބާއަށް އަހަރެންގެ ހިތް ސާފެވެ.
