ކޮވިޑް ފެތުރޭ މިންވަރު އިތުރުވުން، އަނެއްކާވެސް ނުރައްކަލުގެ ރަނގަބީލެއް ޖެހެނީބާ؟

2020ގެ މިތާރީޚީ ރީތި އަދަދު ހިމެނޭ އަހަރަށް އެންމެން ވެސް ފެށީ ނުހަނު ފޮނި އުންމީދު ތަކަކާއެކުގައެވެ. ދިރިއުޅުމަށް އެތައް ބަދަލުތަކެއް ގެނެސް، އެތައް ލަނޑުދަނޑިތަކެއް ވެސް ހާސިލު ކުރުމަށް ގިނަ ބަޔަކު ދިޔައީ ހުވަފެންތައް ދެކެމުންނެވެ.

ނަމަވެސް އަހަރު ފެށިގެން ނިމުމަކާ ހަމައަށް މިހާރު އައިސްފައިވާއިރު ގިނަ މީހުންނަށް މިއަހަރު ވޭތުކުރަން މިޖެހުނީ މޫނުމަތީގައި އަޅާ މާސްކަކަށް ބަރޯސާވެ، ރައްކާތެރިކަމުގެ އެތައް ފިޔަވަޅުތަކެއް އަޅައިގެންނެވެ.

ދައްކަން މިއުޅެނީ އަަޅުގަނޑުމެން އެންމެންނާ ވެސް މިއަހަރު ދައުވަތަކާއި ނުލާ ބައްދަލު ކޮށްފައިވާ މެހެމާނެއް ކަމަށްވާ ކޮވިޑް-19 ގެ ވާހަކައެވެ.

ރާއްޖޭގައި ވެސް މިނުރައްކާތެރި ބަލި ފެތުރުމުން މާލެ ސަރަޙައްދުގައި ވަނީ ޢާއްމު ސިއްޙަތުގެ ކުއްލި ނުރައްކަލުގެ ހާލަތު ވެސް އިއުލާނު ކޮށްފައެވެ. މިއަހަރު ކުރީކޮޅު އިއުލާނު ކުރި އެހާލަތު، އަދިވެސް އަންނަނީ ދަމަހައްޓަމުންނެވެ. ސަބަބަކީ ބަލިން އެއްކޮށް ސަލާމަތްވާން އުޅޭ ކަމުގެ ފެހި ސިގްނަލް އަދިވެސް ލިބެން ނެތުމެވެ.

ކޮވިޑް-19 އެންމެ ހަލުވިކަމާއެކު ފެތުރެމުން ދިޔައީ މާލެ ސަރަޙައްދުގައި ކަމަށްވުމުން، އެސަރަޙައްދު މިއަހަރުގެ ރޯދަމަހުން ފެށިގެން ވަކި ވަގުތުތަކަކަށް ފުރަބަންދު ވެސް ކުރިއެވެ. އޭގެ ފަހުން ލުޔެއް ދިނުމަށްފަހު އަނެއްކާވެސް ބައްޔަށް ފައްސިވާ އަދަދު މަތިވަމުން ދިޔުމުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމީ އިތުރު ފިޔަވަޅުތައް އެޅުމަށެވެ.

އެގޮތުން ރޭގަނޑު 10:00 އިން ފެށިގެން އަނެއް ދުވަހުގެ 5:00 އާއި ހަމައަށް ބޭރުގައި އުޅުމާއި އެއްގަމު އުޅަނދުފަހަރު ދުއްވުން ވެސް މަނާ ކުރިއެވެ. އަދި އޭގެ ފަހުން މިދިޔަ މަހުގައި އެވަގުތު 23:00 އިން ފަތިހު 4:00 އަށް ލުއިކޮށްދިނެވެ.

އެޗްޕީއޭ އިން މިފަދައިން ފިޔަވަޅުތައް އެޅުމުން ތަފާތު ވަރަށް ބޮޑަށް ފެންނަން ފެށިއެވެ. ކުރިން 200 އިން ނުވަތަ އެއަށްވުރެ ވެސް ގިނައިން ފައްސިވާ މީހުންގެ އެރި އަދަދު، ގިނަރޭ ރޭ 30 އަށް ވެސް ނާރައެވެ. މިކަމުގެ އިނާމެއްގެ ގޮތުން މިމަހުގެ ކުރީކޮޅު އަނެއްކާވެސް ލުޔެއް ދިނެވެ. މިފަހަރު މެންދަމު 00:00 އިން ފަތިހު 4:00 އަށް ބޭރުގައި އުޅުމާއި އެއްގަމު އުޅަނދުފަހަރު ދުއްވުން މަނާވާފަދަ ލުޔެކެވެ.

ނަމަވެސް މިހާރު އަނެއްކާވެސް ފެންނަމުން މިދަނީ ހިތާމަވެރި މަންޒަރެކެވެ.

ފާއިތުވީ ތިން ދުވަހުގެ ސާވެލެންސް ޑޭޓާއަށް ބަލާލާއިރު މިމަހުގެ 14 ވަނަ ދުވަހު 42 މީހުން، އިއްޔެ 50 މީހުން އަދި މިއަދު 110 މީހުން މިވަނީ ރާއްޖެއިން ކޮވިޑް ބައްޔަށް ފައްސިވެފައެވެ.

މިއަދުގެ މިއަދަދު ފެނުމާއެކު ގިނަ ބައެއްގެ ހިތްތަކަށް ވަނީ ބިރުވެރިކަން ވެރިވެފައެވެ. އަނެއްކާ ވެސް ނުރައްކަލުގެ ރަނގަބީލެއް ޖެހެން އުޅޭކަމުގެ ހާސްކަން މިވަނީ ފެތުރިފައެވެ.

ރައްކާވެ ތިބިއްޔާ ދަތުރެވެ. އަދިވެސް ވަގުތު ފާއިތެއް ނުވެއެވެ. ބަލިން ރައްކާތެރިވުމަށް އެޗްޕީއޭ އިން އަންގަމުންދާ އިރުޝާދުތަކަށް ބޯލަނބަމާތޯއެވެ. ތިމާއާއި ތިމާގެ ވަށައިގެންވާހާ ބައެއްގެ ރައްކާތެރިކަމަށް އިސްކަންދީ، ވިސްނުންތެރިކަމާއި ހޭލުންތެރިކަމާއެކު ދިރިއުޅުން ކުރިއަށް އޮތްތަނުގައި ބައްޓަން ކުރަމާތޯއެވެ.