ނާސާގައި ތައުލީމާއި ތަމްރީނު ހޯދުމުގެ ފުރުސަތު ދިވެހި ދަރިވަރުންނަށް ހުޅުވާލައިފި
ކެނޭޑިއަން ސްޕޭސް އެޖެންސީގެ ޖޫނިއަރ އެސްޓްރޮނޯޓް ޕްރޮގްރާމުގައި ބައިވެރިވުމުގެ ފުރުޞަތު ދިވެހި ދަރިވަރުންނަށް ހުޅުވާލައިފިއެވެ.
މިފުރުސަތު ދިވެހި ދަރިވަރުންނަށް ހުޅުވާލާފައި ވަނީ ރާއްޖޭގައި ސްޕޭސް ސައިންސް ޕްރޮމޯޓް ކުރުމަށް އުފައްދާފައިވާ އިންސްޓިޓިއުޓް ފޯރ ގްލޯބަލް ސަކްސެސް (އައިޖީއެސް) ގެ ފަރާތުންނެވެ.
މިޕްރޮގްރާމާ ގުޅޭގޮތުން މިއަދު ނޫސްވެރިންނަށް މައުލޫމާތު ދެއްވަމުން އައިޖީއެސް ގެ ސީއީއޯ އަދި ޗެއާޕަރސަން ރިފްއަތު މުޙައްމަދު ވިދާޅުވީ ކެނޭޑިއަން ސްޕޭސް އެޖެންސީގެ ޖޫނިއަރ އެސްޓްރޮނޯޓް ޕްރޮގްރާމް ޚާއްސަކޮށްފައި ވަނީ ގްރޭޑް 7، 8، އަދި 9 ގެ ދަރިވަރުންނަށް ކަމަށާއި މިއީ ސްޕޭސްއާއި ސައިންސްގެ ދާއިރާއިން ދިވެހި ދަރިވަރުންނަށް އިތުރު ފުރުޞަތުތައް ފަހި ކޮށްދިނުމަށް އެއިންސްޓިޓިއުން ތަޢާރަފުކުރި ރާއްޖޭގެ ފުރަތަމަ ސްޕޭސް ޕްރޮގްރާމްގެ ތެރެއިން ކުރިއަށް ގެންދާ ޚާއްސަ ހަރަކާތެއް ކަމަށެވެ.
"މި ޕްރޮގްރާމުގައި ބައިވެރިވާ ދަރިވަރުންނަށް އިތުރު ތަމްރީނު ދިނުމުގެ ގޮތުން، އެމެރިކާގެ ޖައްވީ އިދާރާ (ނާސާ)އަށް ގޮސް އިތުރު ތަމްރީން ހޯދުމުގެ ފުރުޞަތު އަޅުގަނޑުމެން ތަނަވަސް ކޮށްދޭނަން. މިޕްރޮގްރާމް ފުރިހަމަކުރާ ދަރިވަރުންނަށް ކެނޭޑިއަން ސްޕޭސް އެޖެންސީގެ ސެޓިފިކެޓެއް ލިބޭނެ" ރިފްއަތު ވިދާޅުވެފައިވެއެވެ.
