ތުއްތު ކުއްޖަކަށް ޖިންސީ ގޯނާ ކުރިކަމުގެ ދައުވާ އުފުލިފައިވާ ކާފަ އާއި މުނިކާފަގެ ޝަރީޢަތް މާދަމާ
ގއ. ކަނޑުހުޅުދޫގައި ތުއްތު ކުއްޖަކަށް ޖިންސީ ގޯނާ ކުރި މައްސަލައާ ގުޅިގެން އެ ކުއްޖާގެ ކާފައާއި މުނިކާފަގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުން މާދަމާ ބޭއްވުމަށް ތާވަލު ކޮށްފިއެވެ.
މިޝަރީޢަތް ބޭއްވުމަށް ތާވަލު ކޮށްފައި ވަނީ މާދަމާ މެންދުރު 1:00 އަށެވެ.
އުމުރުން ދެ އަހަރުގެ ކުޑަ އަންހެން ކުއްޖާގެ ކާފަ، އިބްރާހިމް ދީދީ (62އ.) އާއި މުނިކާފަ ހަސަން މޫސާ ދީދީ (82އ.) ގެ މައްޗަށް އުފުލާފައި ވަނީ އާއިލާގެ މެންބަރަކު އެ އާއިލާގެ ކުޑަކުއްޖަކާއެކު ޖިންސީ އަމަލެއް ހިންގުމުގެ ކުށުގެ ދައުވާއެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ގެ 15 ވަނަ މާއްދާގެ (ހ) އާއި ހަވާލާދީ، އެމާއްދާގެ (ށ) ގެ ދަށުން، އާއިލާގެ މެންބަރަކު އެ އާއިލާގެ ކުޑަކުއްޖަކާއެކު ޖިންސީ އަމަލެއް ހިންގުމުގެ ކުށުގެ ދައުވާ، އެކުއްޖާގެ ކާފަ އާއި މުނިކާފަގެ މައްޗަށް އުފުލާ އެ މައްސަލަ ކޯޓަށް ފޮނުވާފައި ވަނީ މިއަހަރުގެ ފެބްރުއަރީ މަހުގެ 13 ވަނަ ދުވަހުއެވެ.
ކަނޑުހުޅުދޫ ކުޑަކުއްޖާގެ މައްސަލައާއި ގުޅިގެން އެކުއްޖާގެ ކާފައާއި މުނިކާފަ ހައްޔަރުކުރީ ޖަނަވަރީ މަހުގެ 21 ވަނަ ދުވަހުއެވެ. އަދި އޭގެ ފަހުން، ފިލައިގެން އުޅެނިކޮށް އެ ކުއްޖާގެ ބައްޕަ ވެސް ވަނީ ހައްޔަރު ކޮށްފައެވެ. ކަނޑުހުޅުދޫގައި ދެ އަހަރުގެ ކުއްޖާ ރޭޕް ކުރި މައްސަލާގައި އެ ކުއްޖާގެ މަންމަ އާއި ބައްޕަގެ މައްޗަށްވެސް ފަހުން ވަނީ ދައުވާ އުފުލާފައެވެ.
