އާދީއްތަ ދުވަހު ދެން ސަލްޓަން ޕާކަށާއި ލޮނުޒިޔާރަތް ޕާކަށް ނުދާތި!
މާލާގައި މިވަގުތު ހުރި އެންމެ ބޮޑު ދެ ޕާކު ކަމުގައިވާ ސަލްޓަން ޕާކާއި ލޮނުޒިޔާރަތް ޕާކު ހުޅުވާފައި ހުންނާނެ ދުވަސްތަކަށް ބަދަލު ގެނެސްފިއެވެ.
މާލެ ސިޓީ ކައުންސިލުން މިއަދު ކޮށްފައިވާ އިއުލާނެއްގައި ބުނެފައިވަނީ މިއަދުން ފެށިގެން ސަލްޓަންޕާކު އަދި ލޮނުޒިޔާރަތް ޕާކު ހުޅުވާފައި ހުންނަ ދުވަސްތަކަށް ބަދަލު އައިސްފައިވާ ކަމަށެވެ.
އެގޮތުން މި ދެ ޕާކު ވެސް މީގެ ފަހުން ދެން ހުޅުވާފައި ހުންނާނީ ހޯމަ ދުވަހުން ފެށިގެން ހޮނިހިރު ދުވަހާ ހަމައަށް ކަމަށް ސިޓީ ކައުންސިލުން ވަނީ ބުނެފައެވެ. މިދުވަސްތަކުގައި އެ ދެ ޕާކު ވެސް ހުޅުވާފައި ހުންނާނީ ފަތިހު 4:30 އިން ހެނދުނު 9:30 އަދި ހަވީރު 4:30 އިން ރޭގަނޑު 9:30 އަށް ކަމަށް ވެސް ސިޓީ ކައުންސިލުގެ އިއުލާނުގައި ބުނެފައިވެއެވެ.
އާދީއްތަ ދުވަހު ސަލްޓަން ޕާކާއި ލޮނުޒިޔާރަތް ޕާކު ބަންދު ކުރަނީ ޕާކުތަކުގެ ގަސްހަގާގެއްސަށް ބޭސް ޖެހުމާއި، ކާނާ ދިނުމަށާއި އަދި ޕާކުތަކުގައި ކުރަންޖެހޭ އެހެނިހެން މަރާމާތު ކުރުމާއި، ތަން ސާފުކުރުމުގެ މަސައްކަތް ކުރުމަށް ކަމަށް ސިޓީ ކައުންސިލުން ބުންޏެވެ.
ކޮވިޑްގެ ހާލަތާ ގުޅިގެން ޕާކުތައް ބަންދު ކުރުމަށްފަހު އަލުން ސަލްޓަން ޕާކު ހުޅުވާލީ މިދިޔަ ނޮވެމްބަރު މަހުގެ 21 ވަނަ ދުވަހުން ފެށިގެންނެވެ. ސިޓީ ކައުންސިލުން ތަރައްޤީކުރި ލޮނުޒިޔާރަތް ޕާކު ހުޅުވާފައި ވަނީ، މާލޭގައި ޕާކް ހުޅުވުމުގެ ހުއްދަދީ ކޮވިޑް ކޭސްތައް 50 އަށް ވުރެ ދަށަށް ދާން ފެށުމުން ކަމަށް ސަރުކާރުން ބުނެއެވެ.
Ads by STO
